"Dünya çempionu olmağımız minifutbola marağı artıracaq"

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

Məlum olduğu kimi, minifutbol üzrə 2025-ci il dünya çempionatı vətənimizdə keçirildi. 32 komandanın iştirak etdiyi turnirdə Azərbaycanın minifutbol millisi öz azarkeşləri qarşısında planetin ən güclüsü adını qazandı. 

Bugünkü həmsöhbətimiz isə minifutbol millimizin üzvü Vüsal İsayevdir.

- Dünya çempionu olmaq necə hissdir? Komandada əhval-ruhiyyə necədir?

- Dünya çempionu olmaq çox gözəl hissdir. Bu hissi izah etmək olmur. Çox şükür ki, doğma meydanımızda dünya çempionu adını qazandıq. Daha əvvəl Avropa çempionu olmuşduq. Amma dünya çempionluğu sözlərlə izah olunmayan bir hissdir. 

- Bir az hazırlıqdan danışaq. Dünya çempionatına necə hazırlaşmışdınız?

- Yarışa çox yaxşı hazırlamışdıq. 2 ay əvvəldən toplanmışdıq. Taktiki, texniki - bütün məşqləri etmişdik. Beynəlxalq turnirlər, təlim-məşq toplanışları... Çox ciddi şəkildə hazırlıq prosesi keçmişdik. 

- Sizcə, mundialın Azərbaycanda keçirilməsi komanda üçün əlavə üstünlük yaratdımı?

- Əlbəttə. Dünya çempionatının Bakıda keçirilməyi bizim üçün stimul idi. Blirdik ki, azarkeşlərimiz qarşısında oynayacağıq. Bu, həm məsuliyyətlidir, həm də çox gözəldir. Düzdür, bir az həyəcan da var idi.

- Yeri gəlmişkən, azarkeşlərin dəstəyindən razı qaldınızmı? 

-  Bilirsiniz ki, o arena hər oyunda tam dolurdular. Azarkeşlər sağ olsunlar, dəstək olurdular. Möhtəşəm idilər. Onlar bizə əlavə güc verdilər. Hər oyun bitəndə arenanın dolu orduğunu görmək stimul verirdi. Şükürlər olsun ki, hər kəsi sevindirə bildik.

- Bəs, dünya çempionatının ən yadda qalan və ən çətin oyunu hansı idi? 

- Bizim üçün ən çətin oyun 1/8 finalda Rumıniyaya qarşı matç idi. Çünki biz onları tanıyırdıq, bilirdik. Altıqat Avropa çempionudurlar. Bakıya son dünya çempionu olaraq gəlmişdilər. Gördüyünüz kimi, çətin oyun keçdi. Hesab 1:1 oldu. Penaltilər seriyasında biz qalib gəldik və növbəti mərhələyə keçdik. Məncə, ən çətin oyun bu idi.

- Artıq dünya çempionu olan komanda kimi növbəti hədəfiniz nədir? 

- Hədəfimiz Avropa və dünya çempionatlarında yenə yaxşı nəticələr qazanmaqdır. Bundan sonra klub məşqləri başlayacaq. Bildiyiniz kimi, Azərbaycan Çempionlar Liqasında iki komanda ilə təmsil olunacaq. Hədəfimiz yaxşı nəticə qazanmaqdır. Daha sonra gələn il Avropa çempionatı keçirləcək. Bu turnirə də yaxşı hazırlaşacağıq. 

- Dünya çempionatından əvvəl bu mundial üçün məqsədiniz nə idi? Dünya çempionu olacağınıza inanırdınız? 

- Məqsədimiz finala çıxmaq idi. Federasiya tərəfindən hədəf qoyulmuşdu ki, doğma azarkeşlər qarşısında ən azından final oynamalıyıq. Çünki böyük bir təşkilatçılıq var idi. Hər şey yüksək səviyyədə idi. Biz də buna uyğun hazırlaşmışdıq. Özümüzə güvənirdik. Çünki biz 2022-ci ildə Avropa çempionu olmuşduq. Son dünya çempionatında 4-cü yerə çıxmışdıq. Yəni, ən azından medal qazanmalı idik. Bu medal qızıl oldu.

- Son olaraq, ölkəmizdə minifutbola marağı necə qiymətləndirirsiniz?

- Minifutbola maraq gündən-günə artır. Biz 2022-ci ildə Avropa çempionu olduqdan sonra marağın səviyyəsi daha da yüksəlmişdi. İnanıram ki, dünya çempionluğumuzdan maraq bir az da artacaq. Sponsorlar cəmlənəcək, Azərbaycan çempionatı lap yüksək səviyyədə keçiriləcək. Mən belə düşünürəm. Azərbaycanda minifutbolun inkişafında az da olsa, bizim də əməyimiz var. 

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub