"Hazırda bizdə yaxşı gənc futbolçuların sayı çox deyil"

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

2-ci hissə

Misli Premyer Liqasında 2024/25 mövsümü başa çatdı. 36 turun matçları həm də rəngarəng məqamlarla diqqət çəkdi. 2024/25 mövsümü ərzində Premyer Liqa komandalarının heyətində yeni adlarla qarşılaşdıq. Söhbət azərbaycanlı gənc futbolçulardan gedir. 

Azərbaycan futbolunda ciddi oyunçu çatışmazlığını nəzərə alsaq, gənc futbolçuların Premyer Liqada debütünü, oyun şansı almağını görmək əlbəttə ki, futbol ictimaiyyətini sevindirir. 

Bugünkü mövzumuz da Misli Premyer Liqasının 2024/25 mövsümündə Premyer Liqada üzə çıxan gənclərimizə həsr olunub. 

Həmsöhbətimiz, Azərbaycanın Əməkdar məşqçisi Ağasəlim Mircavadov mövzu haqda fikirlərini bölüşüb.

Mütəxəssis gənc futbolçuların ortaya çıxmağı üçün onların məşqçilərlə birgə işləməli olduqlarını söyləyib: "Meydana çıxan gənclərimiz oldu. Amma mütəmadi oynamadılar. Gənc futbolçunun davamlı oynamağı üçün həm özünün, həm də məşqçinin birgə əməyi olmalıdır. Futbolçunun psxiologiyası burada böyük rol oynayır. Gənc futbolçunu hazırlamaq vaxt aparır. Çempionatımızda ilk 4 pillə uğrunda mübarizə aparmayan klublar əksər hallarda cavanlara şans verirlər. Məlum məsələdir ki, gənclərlə nəticə qazanmaq çətindir. Amma cavanlara şans vermək, onları hazırlaşdırmaq əlbəttə ki, yaxşıdır. Məşqçi amili də böyük rol oynayır. Gənc futbolçunun özü də get-gedə artırmalıdır. Hal-hazırda bizdə güclü gənclər çox deyil. Az oyun şansı qazanırlar".

A.Mircavadov gənc futbolçuların oyununun onu qane etmədiyini deyib: "Gənclər var, amma mənim istədiyim səviyyədə deyillər. Ola bilər ki, hansısa futbolçu bir oyunda çıxır, fərqlənir. Bu, başqa məsələdir. "Sabah" Xəyal Əliyevi hazırladı, milli səviyyəsinə qədər gətirdi. Amma gəlin belə düşünək ki, Xəyal yığmada necə oynayır? Samir Abasov Ağadadaş Salyanskiyə tez-tez şans verdi. İnanır, ona görə meydana buraxır. Məşqçi futbolçuya inanmalıdır. Çox qəribə haldır... La Liqaya baxırsan, klublardakı gənc futbolçular çox seçilirlər. Bizdə futbolçuların keyfiyyətlərini ortaya çıxartmaq lazımdır. Bu da məşqçilərin işidir. Gənc futbolçular nadir hallarda stabil çıxış edirlər. Bizim gənclərlə İspaniyanın cavan futbolçuları arasındakı fərq həddindən artıq böyükdür. Dünya görüşü, oyunu oxumaq, meydanda öz güclü qabiliyyətlərini göstərmək..."

A.Miecvadov vurğulayıb ki, legioner limitinin aradan qaldırması gənclərə mane ola bilər: "Gənclərə inanmaq və onların üzərlərində işləmək lazımdır. Klublar qarşılarına hədəf qoymalıdırlar ki, biz azərbaycanlı uşaqları inkişaf etdirməliyik. Xarici klublar bu işə artıq biznes kimi baxırlar. Futbolçuları yetişdirirlər, satırlar. Futbolçu məhsuldur də. Bəs bizim məhsulumuza xaricdə ehtiyac var? Limit olmayacaq. Cavanlar harada oynayacaqlar? Onlara ehtyac olacaqmı? Bir qapını bağıayanda o birini açmaq lazımdır. Mən limitin ləğvinin tərəfdarı deyiləm. Çünki biz o səviyyəyə çatmamışıq. Aşağı yaş qruplarından ibarət komandaları inkişaf etdirsəydik, qarşıdakı hansısa ildə limiti ləğv edə bilərdik. İndiki halda gənclərin şans qazanıb-qazanmayacağı sual altındadır".

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub