“Son 15-20 ildə heç vaxt belə yanaşma olmamışdı”

Xəbər verdiyimiz kimi, AFFA-nın baş katibi Cahangir Fərəcullayev Regional Futbol Federasiyalarının (RFF) rəhbərləri ilə geniştərkibli görüş keçirib. Görüşdə Regional Futbol Federasiyasının prezidenti İsgəndər Cavadov, eləcə də quruma üzv olan digər regional federasiyaların nümayəndələri iştirak ediblər.

Toplantı zamanı ölkə futbolunun regionlarda mövcud problemləri və onların aradan qaldırılması yolları müzakirə edilib. Xüsusilə futbol infrastrukturunun təkmilləşdirilməsi, uşaq və yeniyetmə futbolunun sistemli şəkildə inkişafı, eləcə də yerli məşqçi kadrlarının hazırlanması əsas prioritet istiqamətlər kimi önə çəkilib.
Bununla yanaşı, federasiyalar arasında əməkdaşlığın daha da gücləndirilməsi, yeni təşəbbüslərin təşviqi və regionlara göstərilən dəstəyin genişləndirilməsi məsələlərinə xüsusi diqqət ayrılıb. Bu istiqamətdə atılacaq məqsədyönlü addımların ölkə futbolunun inkişafına və regionlarda daha geniş yayılmasına töhfə verəcəyi vurğulanıb.

Görüşdə iştirak edənlərdən biri də Bakı Futbol Federasiyasının (BFF) prezidenti Tahir Süleymanov da olub. O, görüş barədə QOL.az saytına geniş açıqlama verib:

“AFFA-nın region federasiyaları rəhbərləri ilə rəsmi görüşünün təşkili təqdirəlayiqdir. Təsəvvür edin, son 15-20 ildə heç vaxt belə yanaşma olmamışdı. Baş katib Cahangir Fərəcullayevin timsalında AFFA rəhbərliyi səviyyəsində regionlara olan münasibəti çox müsbət dəyərləndirirəm.

Azərbaycan futbolunun inkişafının əsas istqamətlərindən biri, AFFA Nizamnaməsinə uyğun strukturun, hüquqi bazasının formalaşdırılmasıdır. Keçmişin dağıdıcı mirasından yaxa qurtarılmalıdır. Hüquqi futbol  strukturuna, qanunlara söykənərək idarəçilik sistemi yenidən bərpa edilməli, proses inkişafı təmin edəcək işlək mexanizmə çevrilməlidir. 

Bu yanaşma illərdi axsayıb, məqsədli şəkildə region federasiyaları kənarda saxlanılıb. “Bölgələrdə futbol inkişaf etməlidir” deyəndə, əsas amillərdən biri, hüquqi statusa malik region federasiyalarının prosesə cəlb edilməsidir. Necə ki, BFF olaraq, biz Futbolun İnkişaf Strategiyasının hazırlanmasında öz təkliflərimizi verdik, əməli iştirakımız oldu. Bunun nəticəsi olaraq regionlarda 8 futbol mərkəzi-akademiyalarının yaradılması layihəmiz dəyərləndirildi və qəbul edildi. Bu iş böyük həcm, maliyyə resursları tələb edir və artıq AFFA nümayəndələri bölgələrdə infrastrukturla bağlı manitorinqlər keçirir, mövcud durum araşdırılır, futbol mərkəzlərinin yaradılması üçün yerlər müəyyən edilir, yerli və dövlət orqanları ilə məsləhətləşmələr aparılır”.

Tahir Süleymanov

Tahir Süleymanov görüşün konstruktiv keçdiyini deyir: “Görüşdə infrastruktur, uşaq-gənclər futbolunda olan problemlər geniş müzakirə olundu. Futbolçuların yetişməsi, müxtəlif yarışların müasir tələblərə uyğun keçirilməsi üçün  güclü məşqçi, hakim, idarəçi futbol kadrlarının, sahələr üzrə mütəxəssis potensialının olmasıdır. İnfrastrukturla yanaşı kadrların hazırlığı, innovativ yanaşma, tədris, təbliğat, media və ictimaiyyətlə əlaqələr, inteqrasiya prioritet istiqamət olaraq göstərildi. 

Bu yöndə AFFA ilə birgə ilk addımları atırıq. Artıq BFF olaraq federasiyanın müvafiq departament və şöbələri ilə D məşqçi kurslarının ikinci mərhələsini bitirmişik. AFFA Hakimlər Departamenti ilə yeni layihə hazırlanır, görüşlərimiz keçirilir və yaxın zamanda gənc hakimlərin futbola cəlb edilməsi, hazırlığı mərhələsinə start veriləcək. Nəinki keyfiyyət, bu sahədə kütləvi yarışların təşkili üçün hakim sayı çatışmır. 

Eyni zamanda "Sabahın ulduzları" layihəsinin yenidən, daha üst səviyyədə təşkili işləri davam edir. İnanıram ki, yaxın illərdə yeni-yeni elvinlər, bəhlullar, mahirlər, musalar, muradlar ölkə futboluna bəxş ediləcək. Azərbaycanda istedadlar yetərincədir, sadəcə onları sistemli şəkildə böyük futbola gətirib çatdırmaq lazımdır. Bu işlərdə peşəkar klubların prosesə cəlb edilməsi böyük əhəmiyyət daşıyır.

Uşaq-gənclər futbolunda məşqçilərin hazırlığı prosesinə ciddi önəm verilməlidir. Bölgələrdə bu sarıdan böyük çatışmazlıqlar var, uşaq məşqçiləri olmaq istəyənlərin tədrisinə xüsusi diqqət ayrılmalıdır. Məşqçi və hakimlərin hazırlığı yönündə sahələr üzrə təlimatçı qıtlığı yaşanır. İllər boşa verilib! Bunları aradan qaldırmaq üçün çox ciddi təşkilatı, strateji addımlar atılmalı, yeni layihələr hazırlanaraq həyata keçirilməlidir. Təbii, bu işlərin görülməsi üçün maddi-texniki bazanın yaradılması mütləqdir! 

De-yure hüquqi səlahiyyətlərə sahib region federasiyaları, bu illərə kimi de-fakto və bilərəkdən kənarda saxlanılmışdı. Hər bölgəyə aid Premyer Liqa, l, ll, region liqaları klubları var, onların region federasiyaları ilə əlaqələri hüquqi aspektdə möhkəmləndirilməli,  sıx əməkdaşlıq telləri yaradılmalıdır. Necə ki, FİFA, UEFA-nın klublarla əlaqələri AFFA vasitəsi ilə tənzimlənir. Bu da vahid futbol idarəçiliyi sistemini, işlək mexanizmi təmin edir. 

AFFA - federasiyaları özündə birləşdirən assosiasiyadır. İllər sonra AFFA tərəfindən qanuna söykənən təşəbbüs göstərilib. Region rəhbərləri də bu missiyanın vacibliyinin fərqinə varmalı,  assosiasiyanın yeni rəhbərliyinin Nizamnamə tələblərinə uyğun çağırışına səs verməli, işlərə məsuliyyətlə yanaşmalı, təşəbbüskarlıq göstərilməli, Azərbaycan futbolunun gələcəyi naminə qarşılıqlı işbirliyi yaradılmalıdır”.

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub.