“Günah”ı da “Qarabağ”ındır, savabı da

“Qarabağ”ın “Bayer”lə möhtəşəm oyunu bitər-bitməz telefonuma mesajlar, sonra zənglər gəlir. Mesajların çoxu Ağdamdan - mənim doğulduğum Qaradağlı kəndindəndir. Hamısının da məzmunu eynidir: “Qarabağ” niyə uda bilmədi, niyə o qolları buraxdı?” 

Bu suallara görə “Qarabağ”a böyük təşəkkür düşür, amma bu haqda bir qədər sonra...

Əslində “Qarabağ”ı sevən bütün azərbaycanlıların ürəyində komandalarının “Bayer”lə oyunda hesabı qoruya bilməməsinin bir təəssüfü var. Mən özüm məsələyə nə qədər peşəkar yanaşsam da, komandaların hansı şərtlər altında mübarizə apardığını anlasam da,  yenə oyunun gedişində hesabın 2:2 olmasına təəssüfləndim. Amma bu, yalnız qarşılaşmanın həyəcanından, “Qarabağ”ın tarixi qələbə qazanmasını istəməyimizdən irəli gəlir. Tarixi qələbə ifadəsini həm də ona görə deyirəm ki, “Bayer” bu mövsüm heç bir turnirdə məğlub olmayıb. Bu düşüncələr oyunun gedişində və görüş yeni bitəndə ola bilər.

Soyuq başla düşünəndə isə xatırlayırsan ki, “Bayer” hazırda dünyanın, bəli, dünyanın ən güclü komandalarından biridir. “Qarabağ”la bu matçı da nəzərə alsaq, bu mövsüm artıq 35 oyunluq məğlubedilməzlik seriyaları var. Bunun 30-da qalib gəliblər. Məğlub etdikləri komandalardan biri də “Bavariya”dır. Ardıcıl 11 mövsümdür Bundesliqanın qalibi olan Avropa nəhəngini ötən ay 3 cavabsız qolla uddular.  Bundesliqada turnir cədvəlinin mənzərəsi də hər şeyi deyir. Lider “Bayer” ən yaxın izləyicisi olan “Bavariya”nı düz 10 xal qabaqlayır. Biz də “Bayer”i uda bilməməyimizə görə üzülürük. 

Oyundan sonra “Bayer”in futbolçuları alman azarkeşlərə tərəf yaxınlaşdı. Tribunada onları dəstəkləyən 400-ə qədər fanat  var idi. Onlar elə sevinclə oxuyurdu ki, komandalarından və oyuna görə nəticədən razı qaldıqları aşkar görünürdü. Bəli, alman azarkeşlər “Qarabağ”la heç-heçəyə görə komandalarını bir xeyli alqışladılar. Doğrudan da görmədiyimiz bir mənzərədir.   

“Qarabağ”la “Bayer”in heyətləri, futbolçularının qiyməti, çıxış etdikləri çempionatların müqayisəyə gəlməyəcək dərəcədə fərqlənməsi hamıya məlumdur. Klubların büdcələri arasında isə yerlə göy qədər fərq olduğunu görünür, yenə xatırlatmaq lazımdır. 

Bir məqamı da qeyd etmək yerinə düşər ki, bütün bunlara baxmayaraq, oyundan əvvəl “Qarabağ”ın çalışdırıcısı Qurban Qurbanov çox inamlı danışmışdı. Biz “Braqa” ilə oyundan əvvəl də bu inamı, sonra isə nəticəni gördük. 

Qurbanovun “Bayer”lə görüşdən əvvəlki çıxışından bu hissəni xatırlayaq: “İki ölkə futbolu arasındakı fərqi həmişə nəzərə almışıq. Amma bunu çox dərindən düşünməmişik. Biz sadəcə rəqibimizə qarşı necə oyun qurmaq lazımdır, onu düşünürük. Bunu bacarırıq deyə, inamla hazırlaşırıq. Bəli, bu komandanın nə qədər üstünlüyü olsa da, böyümək üçün çəkinmədən "Bayer"ə qarşı mübarizə aparmalıyıq”.

Bir baş məşqçinin çətin oyundan əvvəl belə fikirlər səsləndirməsi futbolçularının motivasiyası üçün çox lazımdır. Şübhəsiz ki, millimizin sabiq baş məşqçisi Canni De Byazi kimi oyundan əvvəl “Rəqib bizdən güclüdür”, “Uduzmamağa çalışacağıq” kimi qorxaq açıqlamalar verilsəydi, bunun futbolçuların psixologiyasına təsirini və onun meydandakı nəticəsini mütləq görəcəkdik.

“Qarabağ”la oyundan sonra “Bayer”in baş məşqçisi Xabi Alonsonun dediklərinə də fikir verək: "Bizim bəxtimiz gətirdi ki, hesabı 2:2 etdik. “Qarabağ”ın bəxti gətirmədi. Şanslardan yararlana bilmədilər. Bir həftədən sonra da Leverkuzendəki matçda şanslar 50/50-dir".

Alonso bəxtlərinin gətirdiklərinə görə uduzmadıqlarını deyir. Bəxti gətirən insan da buna yalnız sevinə bilər. Yəni Xabi Alonso, “Bayer” klubu və almanlar bu heç-heçəyə sevinir, biz isə yox.

Sual yaranır: “Qarabağ” hansı rəqiblə oynamalıdır ki, heç-heçəsinə üzülməyək? “Real”, yoxsa “Mançester Siti”? Yox, onda da düşüncəmiz eyni olacaq. Bunun “günah”ı da, savabı da “Qarabağ”ındır. Çünki bizi neçə illərdir avrokuboklarda sevindirən də, “Bayer” kimi komanda ilə heç-heçəyə görə sevinməyə qoymayan da “Qarabağ”dır.  

Və sonda, “Qarabağ” bugündən “Zirə” , “Bayer” isə “Volfsburq”la oyuna köklənməlidir.  

Ramiq Ağaməmmədov