Kiçik Bük, Əsədova vəd olunan qol - Macarıstandan reportaj

İyunun 5-də Macarıstan səfəri üçün hava limanında həmkarlarla toplaşdıq. Bir qədər sonra qırmızı və göy formalı oğlanlar da görünməyə başladı. “Qırmızılar” əsas millimizin, “göylər” isə U-21-in üzvləri idi. Hər iki komanda yoldaşlıq oyunları üçün eyni təyyarə ilə səfərə çıxırdı. İlk diqqətimi çəkən məqam bu komandalar arasındakı mehribanlıq oldu. Bu millilərin birgə səfərinin, onların bir-birinə qarışmasının yaxşı və vacib təşəbbüs olduğunu da qeyd edim.

Bakıdan əvvəlcə Avstriyanın Qrats şəhərinə yollandıq. 4 saat çəkən uçuş zamanı millimizin futbolçuları və məşqçi heyəti rahat görünürdü. Əcnəbi baş məşqçinin olmaması heyətdə bir nikbinlik də yaradıb sanki. Bu mənzərəni görəndə bir daha istəyirsən ki, kaş, yeni baş məşqçi də yerli mütəxəssis olardı. Düzdür, əsas olan komandamızın səfərə gedəndə yox. qayıdanda yaxşı əhval-ruhiyyədə olmasıdır. Amma yenə də millidə hazırda olan ab-havanı qısaca da olsa, sizə çatdırmaq istədim.

Qratsdan avtobusla Macarıstanın Bük şəhərinə gəldik. Şəhər adlandırılsa da, daha çox kəndə bənzəyir. Əhalisi isə cəmi təqribən 3500 nəfərdir. Bük Macarıstanda məşhur istirahət məkanı, Mərkəzi Avropanın əsas SPA və sağlamlıq mərkəzlərindən biri kimi tanınır. 

Bükdə əhalinin sıxlığı çox azdır. Yəni məsələn, 1 saat gəzirsən və bu müddətdə təxminən 10-15 adam qarşına çıxır. Əksəriyyət isə yaşlılardır. Hansı ki, dincəlməyə ehtiyacı daha çox olanlar. Bükü Avropanın səfər etdiyim heç bir yerinə bənzədə bilmirəm. Onu ancaq öz kəndimizlə müqayisə edərdim. Çünki burada getdiyimiz yolların sağı da taxıl, yonca, qarğıdalı zəmiləridi, solu da. Elə qaldığımız otelin eyvanından baxanda da lap yaxınlıqda qeyd etdiyim sahələr görünür. Bir dənə də olsun çoxmərtəbəli bina yoxdur. Evlərin hamısı bir mərtəbəlidir.

Adam az olduğundan maşın da çox deyil. Nəqliyyat vasitəsi kimi elektrikli qatara bənzəyən nəqliyyat vasitəsi istifadə olunur ki, bu da ekologiyanın qorunmasına hesablanıb. Hava həddindən artıq təmizdi. Çox sakitlikdi. Hazırda qaldığımız oteldə bu yazını yazıram və pəncərə də açıqdı. Amma quşların oxumağından başqa heç bir ikinci səs gəlmir. 

Ötən gün milli komandamızın məşqçisi Arif Əsədovun mətbuat konfransı üçün Sombatxey şəhərinə yollandıq. Millimizi baş məşqçi əvəzi kimi artıq 4-cü oyuna çıxaracaq Əsədov komandanın uğuru üçün əlindən gələn hər şeyi etdiyini bildirdi. İndiyədək Azərbaycan millisində heç kim baş məşqçi əvəzi kimi komandanı 4 oyuna çıxarmayıb. Bu göstəricidə rekordçu olan Arif Əsədova millinin hücumçusu Mahir Emreli jest etmək istəyir. Mətbuat konfransına qatılan Mahir Albaniya ilə oyunda qol vursa, bunu Arif Əsədova həsr edəcəyini bildirdi.

Hazırda millimizin Albaniya ilə yoldaşlıq oyununa saatlar qalır. Avro-2024-ə vəsiqə qazanan albanlar bu oyuna ciddi yanaşır. Bizim komandamız da ən azından bəlkə də bugünkü oyunu izləyəcək yeni baş məşqçiyə özünü göstərmək istəyəcək. Bu gün Azərbaycan millisi həm də AFFA-nın yeni rəhbərliyinin dövründə ilk oyununa çıxacaq. Həm də bu baxımdan yaxşı nəticə yerinə düşərdi. Millimiz sentyabrda UEFA Millətlər Liqasında vacib oyunlarına çıxacaq ki, buna da çox vaxt qalmayıb.

Bugünkü və iyunun 11-də Qazaxıstanla keçiriləcək oyun qarşıdakı turnir üçün ümidverici ola bilər.

Hələ Macarıstanda daha 5 günümüz var. Ona görə də məncə, hələlik bu qədər bəs edər. 

Sonda isə jurnalistlərin Macarıstan səfərinin təşkili üçün “Misli”yə təşəkkür edirik.  

Ramiq Ağaməmmədov
Macarıstan, Bük