İşğaldan azad olunmuş bölgələrimizdə idmanın inkişafı - II yazı

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

44 günlük Vətən müharibəsi ilə Ermənistan işğalından azad olunmuş ərazilərimizdə bərpa prosesi sürətlə davam edir. Əvvəllər də xəbər verdiyimiz kimi, həmin bölgəmizdə artıq bir neçə idman yarışı keçirilib və bu tədbirlərin daha geniş miqyas alması üçün işlər görülür.

İşğaldan azad olunmuş ərazilərimizdə idmanın inkişafı ilə əlaqədar “Milenium” turizm şirkətinin rəhbəri, Azərbaycan Sağlamlıq və Termal Turizmə Dəstək Assosasiyasının sədri, Azərbaycan Sahibkarlar Konfederasiyasının rəyasət heyətinin üzvü, eyni zamanda Turizm Komissiyasının sədri Ruslan Quliyevlə söhbətləşdik.

- Ruslan bəy, işğaldan azad olunmuş bölgələrimizə artıq turlar təşkil etmisinizmi?

- Bəli. Bir neçə dəfə Şuşa-Ağdam istiqamətində turizm sənayesi nümayəndələri üçün infoturlar, mediaturlar təşkil olunub. Hal-hazırda müxtəlif işlər, mina təmizləmə prosesləri ilə bağlı müntəzəm turlar təşkil edilmir. Lakin yaxın perspektivdən qeyd etmək istəyirəm ki, dövlətin imfrastruktur layihələrində uğurlu iştirakı, yerli və xarici sahibkarların investisiya ilə bağlı təşviq olunması qısa zaman kəsiyində müxtəlif fəaliyyətlərin bərpa edilməsinə şərait yaradacaq.

- Ümumiyyətlə, işğaldan azad olunmuş ərzilərimizdə gələcəkdə idman yarışları və tədbirlərinin sıx-sıx təşkil olunması üçün hansı işlər görülür?

- Qarabağda bərpa və quruculuq işlərinin həyata keçirilməsi ilə yanaşı, müxtəlif sahələr üzrə inkişaf strategiyaları hazırlanıb. O cümlədən də turizm və idmanla bağlı. Bu bölgənin həm idman, həm də digər sahələrlə bağlı müxtəlif ənənələri olub.

- Bəs, qarşıya hansı məqsədlər qoyulub?

- Əsas məqsəd keçmişin ənənələri üzərində yeni bir yanaşma ilə yeni bir təqdimat həyata keçirməkdir. Gördüyünüz kimi, son vaxtlar müxtəlif idman yarışları, veloturlar, mototurlar, su idmanı növləri ilə bağlı ilkin yarışlar keçirilib. Bu, rəmzi xarakter daşısa da, düşünürük ki, gələcəkdə belə imkanları daha da genişləndirmək, beynəlxalq tədbirləri məhz bu bölgədə həyata keçirmək üçün şərait yaradılacaq.

- Qarabağ regionu hansı idman yarışları üçün əlverişlidir?

- Müxtəlif idman qurğularının, idman komplekslərinin inşa prosesi uğurla həyata keçirilərsə, bütün idman növləri ilə bağlı yarışlar təşkil etmək mümkündür. Ekstrimal idman növləri də ola bilər. Bu bölgə müxtəlif tədbirlərin də məkanı ola bilər. İstər festivallar, istər yarışlar, istərsə də beynəlxalq tədbirlərin keçirilməsi mümkündür. Bu, mərhələli şəkildə həyata keçirilməlidir.

- Bu məsələlər üzərində nə kimi işlər görmüsünüzmü?

- Biz turizm təyinatlı təşkilatlarla bərabər çalışırıq. Müvafiq qurumların təşkil etdiyi tədbirlərdə iştirak təbii ki, bütün maraqlı tərəfləri bu sahənin inkişaf etdirilməsinə sövq edir.

- Ruslan bəy, bəs, daha əvvəl hansı idman yarışlarının, idman turlarının təşkilində iştirak etmisiniz?

- Biz bundan əvvəl idman turizmi ilə bağlı bir sıra layihələr həyata keçirmişik. Konkret olaraq 21 min kilometrlik - Malaziyada başlayıb, Türkiyədə başa çatan mototur həyata keçirmişik. Onun Azərbaycana aid olan hissəsini də biz təşkil etmişik. Trans Asiya 3 - İstanbuldan Çinə qədər 17 min kilometrlik avtoturlar həyata keçirmişik. Bundan başqa, beynəlxalq yarışlarda müxtəlif milli və klub komandalarının həm fanatlarını, həm də heyətini turizm xidmətləri ilə təmin etmişik.

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub