"Avropadakı akademiyalarda bizdəkindən 5-6 dəfə çox insan çalışır"

Medianın İnkişafı Agentliyinin layihəsi

AFFA və UEFA Akademiyasının birgə əməkdaşlığı çərçivəsində təşkil olunan "Elite Club Programme" təhsil layihəsinin ikinci mərhələsi Almaniyanın Frankfurt şəhərində keçirilib. Seminarda AFFA-nın, PFL-in və Misli Premyer Liqasında mübarizə aparan klubların nümayəndələri iştirak ediblər. İştirakçılardan biri də "Araz-Naxçıvan"ın icraçı direktoru Eldəniz Yusubovdur. 

Maraqlıdır, "Elite Club Programme" təhsil layihəsi klublarımıza nəyi öyrədir? Azərbaycanlı mütəxəssislər Almaniyada hansı yenilikləri öyrəniblər? Bu və digər suallara cavab tapmaq üçün məhz Eldəniz Yusubovla söhbətləşdik.

O, Almaniyaya yollanmaqlarından danışıb və layihənin təşkilinə görə AFFA-ya təşəkkür edib: “Elite Club Programme” çərçivəsində PFL və AFFA nümayəndələri əməkdaşlığa dəvət olunmuşdu. AFFA-ya təşəkkür edirik ki, belə layihənin təşkil olunmasına əmək verib, Azərbaycan klublarının iştirakını təmin edib. Bu layihə 3 moduldan ibarət olan bir layihədir. İlk modul Bakıda olmuşdu, bu dəfə isə biz 4 gün ərzində Almaniyanın Frankfurt şəhərində təhsili davam etdirdik. İkinci modul əsasən, əvvəlkindən fərqli olaraq, klub idarəetməsinin idman tərəfinə fokuslanmışdı. Yəni klub əməliyyatlarının idarə olunması, skautların işi, akademiyanın fəaliyyəti, idman direktorunun, idman departamentin fəaliyyəti, qadın futbolu, transfer danışıqlarının aparılması qaydaları və transfer prosesinin hüquqi aspektləri kimi mövzulara daha çox önəm verildi".

Mütəxəssis seminarların fəal və keyfiyyətli keçdiyini qeyd edib: "Seminara kifayət qədər də təcrübəli mütəxəssislər cəlb olunmuşdu. Məsələn, İsveçrə millisinin sabiq oyunçusu, “Servett” klubunun keçmiş idman direktoru Filip Senderos, “Maynz”ın futbol direktoru Martin Şmidt, “Bayer”in məşqçilər heyətinin rəhbəri Keld Bordinqqard  və s. Bunlar kifayət qədər tanınmış mütəxəssislərdir və biz onların zəngin təcrübəsini öyrənməyə çalışdıq.  Mühazirələr çox aktiv keçirdi: həm onları dinləyirdik, eyni zamanda bizlə səfərdə olan bütün əməkdaşlar onları maraqlandıran  suallara cavab axtarmağa çalışırdılar. Bu mənada seminarlar debatlarla, sual-cavab prosesləri ilə zəngin oldu. Cəmi 3 günlük seminar oldu. Amma o qədər maraqlı idi ki, 1 dəqiqəni belə itirmək istəmirdik".

E.Yusubov qeyd edib ki, belə səfərlər Avropa futbolunun nümunəvi modellərinin Azərbaycanda tətbiq olunmasına böyük köməklik edə bilər: "Qeyd edim ki, seminarlar stadionda keçirilirdi. “Ayntraxt”ın “Deutch  Bank Park”  və “Maynz”ın “MEWA Arena” stadionunda təşkil olundu. Daha sonra biz Almaniya Futbol Federasiyasının baş qərərgahında olduq. Stadionların infrastruktur imkanları ilə tanış olduq, eyni zamanda bu nəhəng idman qurğularının idarə olunmasını əyani gördük. 
“Maynz” klubunun futbol direktoru Martin Şmidt klub strukturundan danışarkən bacarıqlı kadrların işə cəlb olunmasını vacibliyini qeyd etdi.  Yəni, təkcə infrastruktur deyil, klubu idarə edəcək bacarıqlı işçilərin də olmasını əsas amil adlandırdı. Bir sözlə, orada həm nəzəri həm də praktiki tərəfdən çox zəngin informasiyalar topladıq. Təbii ki, gələcəkdə bunları öz fəaliyyətimizdə nəzərə ala bilsək, həm öz klubumuza, həm Azərbaycan futboluna yeni nəsə vermək imkanımız olacaq". 

O, klub infrastrukturu və akademiyaya yanaşma baxımından Azərbaycanla Avropa arasındakı fərqlərdən danışıb: "Biz bu sahəyə düşüncə baxımından avropalılardan bir az fərqliyik. Dediklərim bəlkə də kiməsə təəcüblü gələ bilər, amma onlardan öyrənəcəyimiz çox şey var. Məncə akademiyanın təkcə infrastrukturunu deyil, eyni zamanda  fəaliyyət istiqamətləri, fəlsəfəsi, skautinq prosesi, uşaqların cəlb olunması və onlar üçün tətbiq olunan iş metodları, verilən təhsilin keyfiyyəti bizim futbol strategiyamızın  əsas hədəflərindən olmalıdır.

Adi bir şey deyim ki, “Arsenal"ın skaut-analitiki Tom Cooper  akademiyasının strukturunda çalışanların sayını təqdim etdi. Bu say bizi çox təəccübləndirdi. Orada bizimkilərlə müqayisədə 5-6 dəfə çox insan çalışır. ”Ayntraxt” klubunun akademiyasında olan zaman bir daha gördük ki,  akademiya futbolun  müasir inkişaf  meylləri ilə yerli ənənənin vəhdətindən yaranan  biznes modeli kimi qurulur. Yəni həm mənfəət götürmək, həm də klubun davamlığını saxlamaq, daim yeni futbolçularla heyəti zənginləşdirmək istəyirlər".

“Araz-Naxçıvan”ın icraçı direktoru klublarımızda futbol strategiyasının yaradılmasının vacibliyinə də toxunub: “Bayer 04” klubunun məşqçilər heyətinin rəhbəri Keld Bodinqqardın çıxışı daha çox xoşuma gəldi. O öz təcrübələrindnən danışarkən qeyd etdi ki, 2018-ci ildə 5 illik strategiya tətbiq olunub və qısa zaman ərzində onlar kifayət qədər böyük uğurlar əldə ediblər. Məhz bunun nəticəsidir ki, “Bayer 04” Almaniyada ilk dördlükdə yer alır və Avropanın 16 ən nəhəng klubraı arasındadır. Yəni 5 il əvvəl hərtərəfli əsaslandırılmış futbol strategiyası bu günkü ugurların əsas səbəbidir.”

E.Yusubov “qazandığı təcrübənin  "Araz Naxçıvan"da tətbiqi haqqında nə deyə bilərsiniz?” sualına belə cavab verib: "Araz Naxçıvan”ın klubu yenidən qurulur. Biz bu prosesə iyul ayından başlamışıq. Hələ formalaşma mərhələsindəyik. Almaniya səfərindən sonra təbii ki mənim üçün də ümumi fikir formalaşdırdı.  Bunlardan ən önəmlisi futbol strategiyamızın yaradılması, müasir futbolun prinsiplərinin işimizdə tətbiq olunması, akademiyanın fəaliyyətinin müasir skauting ve texnoloji qaydalara uygn qurulması və.s istiqamətlərdə klubda iş aparmaq olar. Ən əsası da bacarıqlı kadrların işə cəlb olunmasının vaciliyinə bir dah əmin oldum. Müasir futbol biliklərini uşaqlara ötürə biləcək məşqçilərin olmasını istəyərdim. Çünki uşaq və yeniyetmə həmişə tapmaq olar, amma onlarla kimin işləyəcəyi önəmlidir".

Sonda idman direktoru layihənin Bakıda keçiriləcək 3-cü modulundan gözləntilərindən də danışıb: "3-cü modul Bakıda keçiriləcək və ümid edirəm ki, bu dəfə də bizə yaxşı mənada təəccüblənəcəyik. Bu modulda klub əməliyyatları, kommunikasiya və maliyyə üzrə mövzular üzrə təhsil alacağıq.”

Cavad Musayev

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub