Vaqif Sadıqov: “Gənclər “Qarabağ”ın oyunçularına bənzəməyə çalışırlar”

Medianın İnkişafı Agentliyinin layihəsi

2025/26 mövsümündə tarixində 2-ci dəfə Çempionlar Liqasının əsas mərhələsinə yüksələn "Qarabağ" uğurlu çıxışı ilə azarkeşlərini sevindirdi. Ağdam təmsilçisi Liqa mərhələsində "Benfika", "Kopenhagen", "Ayntraxt"a qalib gəldi, İngiltərə nəhəngi "Çelsi"dən isə xal almağı bacardı. Bununla da "Qarabağ" daha bir ilkə imza ataraq ÇL-də pley-offa adlamağı bacardı. Azərbaycan klubunun önünü yalnız "Nyukasl" kəsə bildi. 

Həmin vaxt 3 cəbhədə çıxış edən "Qarabağ" üçün Misli Premyer Liqasındakı gedişat fərqli oldu. Belə ki, komandanın 3 turnirdəki mübarizəsi səbəbindən yaranan yorğunluq vacib xal itkilərinə səbəb oldu. Beləliklə, cari mövsümdə cəmi 2 məğlubiyyət yaşayan "Sabah" sona 4 tur qalmış çempionluğu rəsmiləşdirdi. Qurban Qurbanovun komandası isə sona 2 tur qalmış sıralamada 2-cidir.

Bəs cari mövsümü "Qarabağ"ın adına necə qiymətləndirmək olar? Komandanın beynəlxalq səviyyədəki uğurları yeniyetmə və gənc futbolçulara necə təsir göstərir? Bu barədə QOL.az saytına müsahibəsində futbol mütəxəssisi Vaqif Sadıqov danışıb.

O, "Qarabağ"ın "Neftçi"yə uduzduğu son oyunun əsas qırılma nöqtəsi olduğunu deyib: "Qarabağ"ın 2025/2026 mövsümündəki çıxışını həm beynəlxalq, həm də yerli səviyyədə yüksək qiymətləndirmək olar. Komanda UEFA Çempionlar Liqasının yeni formatında tarixi uğura imza ataraq pley-off mərhələsinə yüksəlib, yerli Premyer Liqada isə liderlik uğrunda gərgin mübarizəsini davam etdirib. "Qarabağ" üçün bu mövsüm iki fərqli dünyanı xatırlatdı: Avropada qazanılan tarixi uğurlar və daxili çempionatda yaranan gözlənilməz böhran. Komandanın həm Çempionlar Liqasındakı ağır qrafiki, həm də Premyer Liqadakı rəqiblərin müqaviməti artırması vəziyyəti kritik həddə çatdırmışdı. "Neftçi"yə son məğlubiyyət sadəcə üç xal itkisi deyil, bir eranın sarsılması kimi görünür. Uzun müddət "Qarabağ"ın kölgəsində qalan "Neftçi" üçün bu oyun həm nüfuz, həm də çempionluq yarışına qayıdış xarakteri daşıyırdı. "Qarabağ"ın müdafiədə buraxdığı nadir səhvləri "Neftçi" amansızcasına cəzalandırdı".

Vaqif Sadıqov bildirib ki, Çempionlar Liqasındakı sıx qrafik Ağdam təmsilçisində ağır yorğunluq yaradıb: "Qarabağ" həmişə Qurban Qurbanovun rəhbərliyi altında stabilliyi ilə seçilib. Lakin bu dəfə bir neçə faktor titulların əldən çıxmasına səbəb oldu. Klubun bütün enerjisi Çempionlar Liqasının yeni formatında pley-offa yüksəlməyə yönəldi. "Liverpul" və "Nyukasl" kimi nəhənglərlə oyunlardan sonra komandanın həm fiziki, həm də emosional boşluğa düşməsi aşkar hiss olunurdu. Bu da daxili cəbhədə, yəni, Premyer Liqada diqqət dağınıqlığına yol açdı. Həm də artıq Premyer Liqada təkcə "Neftçi" yox, "Sabah", "Turan Tovuz", "Zirə", "Araz-Naxçıvan" kimi klublar da "Qarabağ"ın oyun üslubuna qarşı "immunitet" inkişaf etdiriblər".

Mütəxəssis cari mövsüm "Qarabağ" üçün uğurlu adlandırıb: "Qarabağ" Avropanın ən güclü 24 klubu sırasına daxil olmaqla onsuz da bir titul qazanmış sayılır. Bu, həm maliyyə, həm də nüfuz baxımından böyük uğurdur. Amma Premyer Liqada çempionluğun itirilməsi azarkeşlər üçün çox məyusedicidir. Həm də Premyer Liqa titulu növbəti il yenidən Çempionlar Liqasına qayıtmaq üçün yeganə bilet deməkdir. "Qarabağ"ın bu mövsümü uğurlu, amma acı adlandırıla bilər. Lakin düşünürəm ki, Avropadakı parlaq çıxışın fonunda daxili titulların əldən çıxması gələn mövsüm komandanın heyət genişliyini, motivasiyanı daha da artıracaq. Bu, bir son deyil".

O, "Sabah"ın durumdan məharətlə istifadə etdiyini vurğulayıb: "Qarabağ"ın çempionluğu itirməyindən danışanda "Sabah"ın nümayiş etdirdiyi modern və aqressiv futbolu mütləq qeyd etmək lazımdır. "Sabah"ın "Qarabağ"ın "pas futbolu"na qarşı pressinq, sürətli əks-hücum taktikasını da vurğulamaq istəyirəm. Bu, "Qarabağ"ın daxili çempionatda oyun nəzarətini itirməsinə səbəb olan əsas amillərdən biridir. "Sabah"ın "Qarabağ"la oyunlarda göstərdiyi qorxusuz çıxış digər orta sıralı komandalara da "Qarabağ"dan xal almaq olar" mesajını verdi".

Sonda V.Sadıqov "Qarabağ"ın uğurlarının yeniyetmə və gənclərə təsirindən söz açıb: "Qarabağ"ın Çempionlar Liqasındakı tarixi uğurları Azərbaycanın gənc nəslinə dərindən təsir göstərir. Gənc futbolçular özlərini "Qarabağ"ın oyunçularına bənzətməyə çalışırlar. Beynəlxalq arenadakı qələbələr həmişə idmançılar üçün ən böyük stimuldur. "Qarabağ"ın əsas komandasının uğuru U-19 komandasının da Gənclər Liqasında çıxış etmək üçün qapı açır. "Çelsi", "Atletiko" və "Roma" kimi dünya nəhənglərinin həmyaşıdları ilə rəqabət apararaq böyük təcrübə qazanırlar. "Qarabağ"ın "Liverpul", "Ayntraxt" kimi klublarla qarşılaşması futbolu ölkədə kütləvi maraq obyektinə çevirir. Hətta 6-7 yaşlı uşaqlarda da "Qarabağ"ın oyunçularına qarşı böyük heyranlıq yaranır".

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub.