“Biz milliləşdirilmiş legionerlərdən zəif deyilik”

AZAL-ın yarımmüdafiəçisi Murad Səttarlı Azərbaycanın A milli komandasına dəvət alması ilə bağlı Qol.az saytına müsahibə verib.

- Milli komandamızın baş məşqçisi Robert Prosineçki təlim-məşq toplanışı və Qazaxıstanla yoldaşlıq oyunu üçün sənə də dəvət göndərdi. Bu barədə fikirlərini bilmək istərdik.

- Milliyə dəvət aldığım üçün çox şadam. Hər bir futbolçu əsas milli komandada oynamaq istəyir. Qarşıma məqsəd qoymuşdum ki, Robert Prosineçkinin diqqətini cəlb edib. Son vaxtlar öz üzərimdə çox işləyirdim.

- Adətən futbolçu formada olanda millidə oynamağa can atır. Prosineçkinin dəvətini gözləyirdinmi?

- Açığı, təklif gəlməsə də təəccüblənməzdim. Ancaq son vaxtlar eşidirdim ki, məşqçilər məni izləyir, tez-tez oyunumuza gəlirlər. Mən də bundan istifadə etdim. Şükürlər olsun ki, oyunumla Prosineçkinin diqqətini cəlb edə bildim.

- İndiyədək milliyə dəvət almışdın?

- “Simurq”da çıxış etdiyim zaman Berti Foqts məni bir dəfə seleksiya xarakterli toplanışa dəvət etsə də, əsas heyətə daxil etməmişdi. O zaman millimiz üç günlük təlim-məşq toplanışı keçdi. Ancaq meydana çıxmaq mənə qismət olmadı.

- Deməli, indi özünü göstərmək üçün əlinə yaxşı fürsət düşüb.

- Əlbəttə, Qazaxıstanla oyunu səbirsizliklə gözləyirəm. Baş məşqçimiz şans versə, çalışacam ki, onun etimadını doğruldum və milliyə daim dəvət alım.

- Prosineçki özünü yaxşı tərəfdən göstərən futbolçulara şans verir. Bundan sonrası futbolçulardan asılıdır.

- Düzdür, hər bir futbolçuya şans verməyə çalışır. Bundan əvvəl Ağabala Ramazanov və Rəşad Eyyubova şans vermişdi. Ağabala özünü yaxşı tərəfdə göstərdi. Rəşad Eyyubov da pis deyildi. İnanıram ki, mən də özümü sübut edə biləcəm.

- Yerli futbolçularımız millidə sözünü desə, milliləşdirilmiş legionerlərə ehtiyac olmaz. Razısan?

- Bu məsələyə qarışmaq istəməzdim. Ancaq fikrimcə, çempionatımızda çıxış edən yerli futbolçular milliləşdirilmiş legionerlərdən zəif deyillər.

- Xeyli müddətdir ki, AZAL-dan milli komandamıza futbolçu çağırılmırdı.

- Bəli, artıq heyətimizdə bir neçə futbolçu milliyə dəvət almağa layiqdir. Rail Məlikov hazırda çox yaxşı formadadır. Düzü, onun milliyə çağırılacağını gözləyirdim.  Özləri bilər. Bundan başqa Emin Cəfərquliyev və İlqar Ələkbərov da milliyə dəvət ala bilər.

- Millimizin yarımmüdafiə xəttində rəqabət güclüdür. Sənin üçün çətin olmayacaq ki?

- Bəli, heyətimizə baxanda yarımmüdafiə xəttində xeyli güclü futbolçuların olduğunu görürük. Bilirəm ki, çox çətin olacaq. Ancaq onların hər biri ilə rəqabət aparmağa hazıram.

- Məlum çətinliklərə baxmayaraq, AZAL bu mövsüm daha inamlı oyun nümayiş etdirir. Komandada Avroliqa həvəsi var?

- Avropkuboklara can atırıq. Tərlan Əhmədov uşaqlara çox yaxşı motivasiya verir, hərtərəfli kömək edir. Ona görə də hamımız çalışırıq ki, həm özümüzü göstərək, həm də komandaya uğur qazandıraq. Düzdür, bəzən oyunumuz alınmır, ancaq heç bir komandadan çəkinmirik. Əsas odur ki, istək var.

- Topaz Premyer Liqanın növbəti turunda “Zirə” ilə qarşılaşacaqsınız. Bu oyun haqda nə düşünürsən?

- “Zirə” son vaxtlar mükəmməl oyun sərgiləyir. Kubokda “Qəbələ”yə uduzduqları oyunlarda heyətlərində dəyişiklik olmuşdu. Gördüyünüz kimi, çempionat oyununda “Qəbələ”ni məğlub etdilər. Bildiyimə görə, rəqibimiz hələ ki, öz meydanında uduzmayıb. Onların bu uğurlu seriyasını qırmağa çalışacağıq. 

Ramiq AĞAMƏMMƏDOV