Azarkeşlik mədəniyyəti güclənir: Gənclər idmanın aparıcı gücünə çevrilir

Medianın İnkişafı Agentliyinin layihəsi

Azərbaycanda idman könüllüləri və azarkeşləri mövzusunda əhəmiyyətli işlər görən qurumlardan biri "İdman Könüllüləri və Azarkeşləri" İctimai Birliyidir. 

Sözügedən birlik 2022-ci ildə yaradılıb. Artıq 3 ildən çoxdur ki, fəaliyyət göstərən birliyin üzvləri isə əsasən gənclərdən ibarətdir. "İdman Könüllüləri və Azarkeşləri" İctimai Birliyi ölkəmizdə keçirilən önəmli turnirlərdə həm könüllüləri, həm də azarkeş qrupu ilə ön plana çıxmağı bacarır.

Bugünkü mövzumuz da məhz azarkeş birliyinə və onların idmançılara təsirinə həsr olunub. Həmsöhbətimiz isə "İdman Könüllüləri və Azarkeşləri" İctimai Birliyinin İdarə Heyətinin rəhbəri Atanur Cəfərlidir.

O, əvvəlcə gənclərin idman yarışlarına marağının çox böyük olduğunu bildirib: "Məqsədimiz Azərbaycanda idmanın kütləviliyinin artırılmasına dəstək vermək və gənclərin asudə vaxtlarını səmərəli keçirməsini təmin etməkdir. Bildiyiniz kimi, ölkəmiz bir çox beynəlxalq yarışlara ev sahibliyi edir. Biz də bu yarışlar üçün könüllülərimizdən çoxlu müraciətlər alırıq. Onlar bu yarışların təşkilində birbaşa iştirak etmək istəyirlər. Könüllülərimizi bu proseslərə cəlb etmək üçün öz bazamızı genişləndiririk. Üzv olmaq istəyən hər kəs müsahibə mərhələmizdən keçməlidir. Bundan sonra bizim sıralarımıza qoşula bilirlər. Onu da qeyd edim ki, getdikcə sayımız artır. İnanıram ki, gələcəkdə sayımız artıq minlərlə nəfər olacaq. Ən çox maraq göstərilən idman növü futboldur. Daha çox "Qarabağ"ın avrokuboklardakı oyunları üçün müraciətlər daxil olur. Digər idman növlərindən isə güləş və cüdonun adını çəkə bilərəm".

A.Cəfərli bu sahədə gördükləri işlərdən danışıb:

"Biz Gənclər və İdman Nazirliyi ilə daim əməkdaşlıq aparırıq. Bundan əlavə, ölkəmizdə fəaliyyət göstərən idman federasiyalarının əksəriyyəti ilə müqaviləmiz var. Gənclərimiz həmin federasiyaların yarışlarının təşkilində bilavasitə könüllü olurlar və ya ölkəmizdə təşkil olunan beynəlxalq yarışlarda idmançılarımızı dəstəkləmək üçün azarkeş qrupu kimi fəaliyyət göstərirlər".

Atanur Cəfərli

Həmsöhbətimiz qeyd edib ki, 3 il ərzində demək olar ki, ölkəmizdə keçirilən bütün beynəlxalq yarışların təşkilində könüllü və ya azarkeş kimi iştirak ediblər:

"İndiyədək o qədər idman yarışında könüllü və azarkeş olmuşuq ki... Dəqiq say deyə bilməyəcəyəm. Gənclər və İdman Nazirliyinin dəstəyi ilə beynəlxalq idman turnirlərində Azərbaycanı təmsil edən idmançıları dəstəkləmək üçün səfərlər etmişik. Konyadakı İslam Həmrəyliyi Oyunlarını, Polşadakı Avropa Oyunlarını, Parisdəki Yay Olimpiya Oyunlarını və Serbiyadakı yeniyetmələr arasında gimnaziadanı misal çəkə bilərəm".

A.Cəfərli qeyd edib ki, gənclərin idman könüllüsü olmasında bir çox həvəsləndirici məqam var:

“Bunlardan birincisi sosiallaşmaqdır. Onlar istəyirlər ki, bizim kimi könüllü təşkilatlarında fəaliyyət göstərərək yeni tanışlıqlar, dostluq əlaqələri qursunlar. İdman könüllüsü olaraq komanda işi və s. şəxsi bacarıqlarını inkişaf etdirmək üçün bizə qoşulurlar. Əlavə olaraq onlar həm də ölkəmizə gələn idmançıları görmək fürsəti əldə edirlər. Məsələn, bu mövzuda "Qarabağ"ın oyunları, cüdo, güləş çempionatlarını misal çəkmək mümkündür".

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub.