“Bakı” klubunun mənə 180 min dollar borcu qaldı” - Müsahibə

Üç il (2011-2014) “Bakı” futbol klubunda çıxış etmiş Deyvidas Çesnauskis paytaxt təmsilçisinin azarkeşlərinin sevimli oyunçularından olub. Litvalı keçmiş yarımmüdafiəçi hazırda ölkəsinin "TransINVEST” klubunun idman direktoru vəzifəsində çalışır. 

QOL.az saytının suallarını cavablandıran 44 yaşlı veteran futbolçu Azərbaycanla bağlı xoş xatirələrinin olduğunu bildirib.

- Azərbaycanı, ölkəmizdəki çıxışınızı necə xatırlayırsınız?

- Mən Azərbaycanı səmimi hisslər və böyük istiliklə xatırlayıram. Azərbaycan müasirliyin, dərin ənənələrin və zəngin mədəniyyətin bir harmoniyada birləşdiyi heyrətamiz bir ölkədir. Xüsusilə Bakı ilə bağlı xatirələrim çox doğmadır. Gözəl, canlı və özünəməxsus ab-havası olan bir şəhərdir.

Orada üç il yaşadım və özümü həqiqətən evimdəki kimi hiss edirdim. İnsanlar çox səmimi və qonaqpərvərdir, hər zaman sənə kömək etməyə hazırdırlar. Həyat yoldaşımla tez-tez bulvarda gəzirdik, Xəzər dənizinin mənzərəsindən zövq alır, tarixi məkanları, İçərişəhəri ziyarət edirdik. Şəhərin ritmini yaşamaq xoşumuza gəlirdi — səhərlər məşq, axşamlar gəzinti və rahat restoranlarda şam yeməyi.

Biz yerli sakinlər kimi yaşamağa çalışırdıq. Bazardan təzə meyvə-tərəvəz alır, satıcılarla söhbət edir, milli mətbəxi kəşf edirdik. Azərbaycan mətbəxi isə ayrıca bir hekayədir — plov, kabab, dolma — hamısı çox dadlı və ürəklə hazırlanır.
Bu illər mənim üçün təkcə peşəkar baxımdan deyil, şəxsi həyatımda da mühüm mərhələ oldu. Azərbaycan mənə dəyərli təcrübə, yeni dostlar və uzun müddət yaddaşımda qalacaq çoxlu isti xatirələr bəxş etdi.

- Dostlarınızın olduğunu dediniz. Kimlərlə əlaqəniz qalır?

- Hələ də dörd nəfərlə dostuq. Ad çəkməyəcəm. Bizi indi də futbol birləşdirir.

- Hazırda futbol sahəsində çalışdığınızı bilirik. Bu haqda danışmağınızı istərdik.

- "TransINVEST” klubunun idman direktoru vəzifəsində çalışıram. Bir il əvvəl komandanı yüksək liqaya çıxarmaq məqsədi ilə burada işə başladım və biz buna nail olduq. Bu il bizim üçün yeni bir mərhələdir. Yüksək Liqada debüt edirik. Əsas seçim prosesi demək olar ki, başa çatıb, heyət tam hazırdır. Bəzi işlər görülməlidir.

- Uzun illər çıxış etdiyiniz Litva yığması UEFA Millətlər Liqasında Azərbaycan millisinin rəqiblərindən biridir. Bu komandaların mübarizəsindən nə gözləyirsiniz? 

- Əvvəla, milli komandalar arasında bu matçı səbirsizliklə gözləyirəm. Düşünürəm ki, komandalar təxminən eyni səviyyədədirlər. Ona görə də bizi çox maraqlı və gərgin bir mübarizə gözləyir. Komandamız həqiqətən keyfiyyətlidir. Oyunçular həmişə meydanda, xüsusən də rəqabətli matçlarda əllərindən gələni edirlər. Həm hücumda, həm də standart vəziyyətlərdə fərq yarada bilən keyfiyyətli və intizamlı futbolçularımız var. Düşünürəm ki, çox şey futbolçuların oyuna yanaşmasından, taktikadan və kimin fürsətlərdən ən yaxşı şəkildə istifadə etməsindən asılı olacaq. Bu kimi oyunlarda detallar çox vaxt hər şeyi həll edir. Gərgin bir oyun gözləyirəm və əminəm ki, azarkeşlər əsl futbol döyüşü izləyəcəklər.

- Azərbaycan – Litva matçı yenidən Bakıya gəlməyiniz üçün zəmin yaradır. Belə bir planınız var?

- Bəli, bu barədə düşünürəm. Amma səfəri hələ dəqiq planlaşdırmamışam. Əlbəttə ki, Bakıya getmək istərdim. Qeyd etdiyim kimi, Bakı orada yaşadığım 3 il ərzində həyatımda çox güclü iz buraxıb. Bakı ilə bağlı çoxlu isti və gözəl xatirələrim var. Ona görə də oraya qayıtmaq mənim üçün həqiqətən xüsusi olardı.

- Həmyerliniz, “Sabah”ın baş məşqçisi Valdas Dambrauskasın Azərbaycandakı işindən xəbərdarsınız? 

- Bəli, əlbəttə ki, bilirəm. Mətbuatımız da bu barədə yazır. Onun "Sabah"dakı işi həqiqətən hörmətə layiqdir. O, gözəl insan və çox güclü məşqçidir. Komandanın hazırda birinci yerdə olması məni heç də təəccübləndirmir. Valdas işini çox yaxşı başa düşür, komandanı necə birləşdirməyi, soyunma otağında düzgün atmosfer yaratmağı və taktiki tələbləri oyunçulara aydın şəkildə çatdırmağı bilir. Bundan əlavə, Dambrauskas rəqibləri diqqətlə təhlil edir və onların zəif cəhətlərindən məharətlə istifadə edir. Məhz buna görə də komanda ardıcıl qələbələr qazanır və layiq olduğu ilk pillədədir.

- Sizcə, Dambrauskas “Sabah”ı çempion edə bilər? Onun komandası “Qarabağ”la rəqabət apara bilər?

- İnanıram ki, Valdas Dambrauskasın rəhbərliyi altında "Sabah" çempionluq uğrunda mübarizə aparmaq üçün real şansa malikdir. Dambrauskas güclü liqalarda və iddialı komandalarla işləmək təcrübəsinə malikdir və komanda daxilində intizam,  taktika qurmağı, düzgün atmosfer yaratmağı bilir. Lakin "Qarabağ" uzun illərdir Azərbaycan futbolunda dominantlıq edən, güclü və təcrübəli komanda olaraq qalır. Buna görə də rəqabət çox çətin olacaq. Mübarizə hələ qabaqdadır və mövsümün sonunda çox şey müəyyənləşəcək.

- Uzun müddətdir tarixə qovuşan “Bakı” klubu ilə bağlı hansı xatirləriniz var?

-“Bakı” klubunu qarışıq hisslərlə xatırlayıram. O vaxt klub prezidenti (Hafiz Məmmədov – QOL.az) yeni, müasir bir futbol bazası inşa etdirmişdi. Hər şey çox iddialı görünürdü. Belə mənzərə yaranmışdı ki, klub böyüyəcək və bunun üçün bütün potensiala malikdir. Hətta ölkə prezidenti İlham Əliyev klubun təlim-məşq bazasının açılışda iştirak edərək layihənin ciddiliyini və “Bakı”ya göstərilən diqqət səviyyəsini nümayiş etdirmişdi.

Madrid “Atletiko”su ilə əməkdaşlıq da quruldu ki, bu, böyük ümidlər yaradan vacib bir addım idi. Təəssüf ki, sonradan çox şey dəyişdi və hər şey gözlənildiyi kimi getmədi. Klub hələ də mənə borcludur. Amma buna baxmayaraq, ən xoş xatirələrim “Bakı”da kuboku qazanmaqdır. Həmin an, final fitindən sonrakı hisslər, komandanın və azarkeşlərin sevinci - bunlar yaddaşımda əbədi olaraq qalacaq.

- “Bakı”nın sizə nə qədər borcu qaldı?

- Bunu deməyim vacibdirmi?

- Artıq klub fəaliyyətini dayandırıb. Amma əgər sirrdirsə, deməyə bilərsiniz. 

- 180 min dollar.

- Kifayət qədər böyük məbləğdir.

- Bəli, amma mən əslində bu haqda danışmaq istəmirdim. 

- Sizə uğurlar.

- Mən də sizə uğurlar arzu edirəm və Azərbaycana salamlarımı çatdırıram.

Ramiq Ağaməmmədov