Azərbaycanda badminton

Azərbaycanda badminton
MEDİA 18 Avqust 2022 / 10:05 1231
-  A +

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

Son illərdə Azərbaycanda xüsusi diqqət ayrılan və inkişaf etməkdə olan idman növlərindən biri də badmintondur.

Azərbaycan Badminton Federasiyası son 6 ay müddətində bu idman növünün geniş yayılması və ona marağın artırılması üçün bir sıra işlər görüb. Qurum mart ayının 29-da DOST İnklüziv İnkişaf Yaradıcılıq Mərkəzi ilə əməkdaşlıq görüşü keçirib. Burada məqsəd aztəminatlı ailələr, şəhid və qazi övladlarına idman sahəsində inkişaf etməyə köməklik göstərmək, professional badmintonçular yetişdirmək, fiziki məhdudiyyətli şəxsləri isə parabadminton növündə kəşf etmək, hakimlər yetişdirərək onları işlə təmin etmək olub.

Ölkənin bank sektorunda badminton idman növünə marağın artırılması üçün müxtəlif tədbirlər və bankların həvəskar komandaları arasında yarış təşkil edilib. 10 may tarixində Azərbaycanda fəaliyyət göstərən banklar arasında Ümumilli Lider Heydər Əliyevin xatirəsinə həsr olunan yarış keçirilib. Bu addımların atılmasında məqsəd isə Korporativ Badminton Üslubunun yaradılmasıdır.

20 may tarixində isə bank işçiləri arasında Həvəskar Badminton Turniri keçirilib. Yarışda 32 kişi və qadın badmintonçu şəxsi kateqoriyada qüvvəsini sınayıb. Həmçinin federasiya tələbələri də unutmayıb. Mayın 24-də Azərbaycan Badminton Federasiyasının və Azərbaycan Tələbə Gənclər İttifaqının birgə təşkilatçılığı ilə “FunnyFy” proqramı çərçivəsində badminton yarışı keçirilib. Layihə ərzində tələbələr həm maraqlı konsert proqramlarında iştirak ediblər, həm də badminton haqqında ətraflı məlumatlar əldə ediblər. Daha sonra isə yarışın qalibləri təşkilatçılar tərəfindən mükafatlandırılıblar.

1 iyun Beynəlxalq Uşaqların Müdafiəsi Günündə balacalar maraqlı yarışlarla sevindiriliblər. Dövlət Tarix-Etnoqrafiya Qoruğunda Azərbaycan Badminton Federasiyasının təşkilatçılığı, Milli Olimpiya Komitəsi, Gənclər və İdman Nazirliyi, DOST İnküliziv İnkişaf və Yaradıcılıq Mərkəzi və “İçərişəhər” Dövlət Tarixi Memarlıq Qoruğu İdarəsinin birgə dəstəyi ilə açıq havada həvəskar badminton yarışları keçirilib. Ardınca açıq havada quraşdırılan badminton meydançası azyaşlıların ixtiyarına verilib. Onlar DOST İnküliziv İnkişaf və Yaradıcılıq Mərkəzinin hazırladığı əl işləri ilə tanış olublar. Həmçinin uşaqlar arasında müxtəlif əyləncəli oyunlar təşkil olunub.

Federasiya gələcəkdə uğurlu badmintonçularımızın yetişməsi üçün də bir sıra işlər görüb. Onların arasında Naxçıvanda təşkil olunan “Level 1” məşqçilik kursları da var. Kursların təşkilində Milli Olimpiya Komitəsinin, Naxçıvan Muxtar Respublikası Gənclər və İdman Nazirliyinin, Beynəlxalq Olimpiya Komitəsinin Həmrəylik Fondunun və Dünya Badminton Federasiyasının dəstəyi də böyük rol oynayıb. Naxçıvanda 1 həftə müddətində eyni məkanda hər gün texniki və nəzəri təlimlər keçirilib. Kurslara Naxçıvan Muxtar Respublikasının şəhər və rayonlarından ümumilikdə 22 nəfər qatılıb. Sonda isə imtahanlar keçirilib və buna əsasən sertifikatlar təqdim olunub.

Azərbaycanda ilk dəfə keçirilən “Air Badminton Challenge” isə uğurla başa çatıb. Heydər Əliyev Mərkəzinin parkında 5 iyul – Dünya Badminton Gününə həsr olunmuş tədbirdə idman həvəskarları badmintonla tanış olublar. Həyata keçirilən yarışda müxtəlif yaş qruplarından olan iştirakçılar həm badmintondan zövq aldılar, həm də hədiyyə qazanmaq şansı əldə etdilər.

Bunu da nəzərə çatdıraq ki, Azərbaycanın yeniyetmə badmintonçuları tarixi uğura imza atıblar. Onlar Serbiyanın Novi şəhərində keçirilən “Youth İnternational” turnirində 13 yaşadək şəxsi və qoşa yarışında bürünc medal qazanıblar. Mübarizə aparan Leyla Camalzadə-Nəzrin Mehrəlizadə cütlüyü ilk pley-off görüşündə Serbiya və Rumıniyanı təmsil edən badmintonçulara qalib gələrək 1/4 finala yüksəliblər. Bu mərhələdə Bolqarıstan badmintonçularını məğlub edən idmançılarımız yarımfinala adlamaqla bürünc medalı təmin ediblər.

Azərbaycan Badminton Federasiyasının gördüyü işlər arasında Abşeron Olimpiya və İdman Kompleksində yeni badminton zalının açılması da var. Zal 5 iyul – Dünya Badminton Günündə federasiyanın, DOST İnklüziv İnkişaf və Yaradıcılıq Mərkəzinin birgə əməkdaşlığı, Gənclər və İdman Nazirliyinin dəstəyi ilə istifadəyə verilib. Zalda eyni anda 50-yə yaxın şəxsin badminton məşqlərini həyata keçirməsi nəzərdə tutulub. Abşeron Olimpiya və İdman Kompleksinin nəzdində fəaliyyət göstərən badminton zalı həm də gələcəkdə parabadminton üzrə milli komandamızın formalaşması üçün baza rolunu oynayacaq.

Onu da qeyd etməliyik ki, Azərbaycan Badminton Federasiyasının və Lənkəran şəhər Gənclər və İdman İdarəsinin təşkilatçılığı ilə Heydər Əliyev Mərkəzinin qarşısında “Air Badminton Challenge” keçirilib. Açıq havada təşkil olunan master-klass Lənkəran şəhər sakinlərinin böyük marağına səbəb olub. Uşaq və böyüklərin asudə vaxtını səmərəli və əyləncəli keçirməsi üçün sakinlər arasında müxtəlif oyunlar, hədiyyəli viktorinalar təşkil olunub. Axşam saatlarına kimi davam edən master-klassdan sonra bir neçə uşaq badminton bölmələrinə yazılıb.

Yeri gəlmişkən, 2023-cü ildə Avropa Badminton Konfederasiyasının nümayəndə heyətinin sayca 56-cı görüşü Bakıda olacaq. Mötəbər tədbirə ev sahibliyi etmək hüququ 3 namizıd şəhər arasından paytaxtımıza verilib. Konqres çərçivəsində 2022-ci ildə müxtəlif nominasiyalar üzrə ilin ən yaxşılarının mükafatlandırılma mərasimi Bakıda təşkil olunacaq. Avropanın badminton federasiyalarının prezidentləri ölkəmizə səfər edəcəklər.

Federasiyanın beynəlxalq əməkdaşlıqlar nəticəsində gördüyü işlər arasında “Shuttle Time” proqramının təşkili də var. Proqram Azərbaycan Badminton Federasiyasının və Dünya Badminton Federasiyasının birgə dəstəyi ilə keçirilib. Bu, ölkəmizdə badmintonun təbliği və ən əsası, kütləviliyi baxımından çox effektivdir. Layihənin əsas məqsədi Azərbaycanda badmintonun kütləviliyinə nail olmaq, məktəblər arasında bu idman növünə maraq oyatmaq və gənc badminton məşqçiləri yetişdirməkdir. İlkin mərhələdə Bakı ilə yanaşı, Lənkəran, Gəncə, Quba və Sumqayıtda yüzlərlə idman müəllimi və məktəbli “Shuttle Time”a cəlb olunub.

İnanırıq ki, bütün bu görülən işlərin ardı gələcək və badminton idman növü Azərbaycanda daha da məşhurlaşacaq, seviləcək.

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub

Daha çox


Son xəbərlər
23.09.22  22:53

Nedved istefa verir?