"Qol.az yüksək reytinqi "sarı mətbuat"a çevrilmədən, ciddi xəbərlərlə yığa bilib"

Bu gün Qol.az saytının yaranmasının 15-ci ildönümüdür. 2008-ci ilin bu günü, noyabrın 17-də Qol.az idman-xəbər saytı olaraq oxucularla görüşə gəlib və qısa bir zamanda Azərbaycanın idman mətbuatında böyük populyarlıq qazanıb.

Modern.az saytın baş redaktoru Aydın Bağırovla həmsöhbət olub. Müsahibəni təqdim edirik.

- Aydın bəy, Qol.az saytının 15 ildəki fəaliyyətini necə qiymətləndirirsiniz?
 
- Qol.az fəaliyyətə başlayanda indiki kimi sayt bolluğu yox idi. İdman sahəsində bir neçə sayt fəaliyyət göstərirdi. Qol.az-ın adının qısa və lakonik olması, eləcə də iş prinsipi tezliklə onun oturuşmuş sayta çevrilməsinə səbəb oldu. Daha sonra Azərbaycanda idman saytları çoxalmağa başladı. Bildiyimə görə, hazırda 40-50 idman saytı var. 

Qol.az saytının ötən dövrünü xarakterizə edəndə onun ən çox oxunan idman saytı olması ən yaddaqalan faktdır. Bir idman, eləcə də ictimai-siyasi sayt üçün 20-25 min İP yüksək göstəricidir.

Qol.az-ın təxminən 10 il ərzində lider mövqeyini qoruyub saxlamasını müsbət fakt kimi qeyd edə bilərəm.

Reytinqimiz "sarı mətbuat"a çevrilmədən, ciddi xəbərlərlə belə yüksək olub. Bu, məni ikiqat sevindirir.

Qol.az bu müddət ərzində məktəb funksiyasını da yerinə yetirib. Bu gün redaksiyada çalışanlar istisnasız olaraq, Qol.az-ın öz yetirmələridir. Təcrübələrini burada toplayıblar. Yetərincə də peşəkarlaşmış kadrlara çevriliblər.

- Saytınızın hazırda neçə əməkdaşı var?

- Hazırda saytın 6 nəfər əməkdaşı var. Azərbaycan üçün bu yaxşı göstərici sayıla bilər. Lakin ümumilikdə götürəndə bu say olduqca azdır. Çünki idmanın qolları çoxdur. Mənim istədiyim sayt olması üçün ən azı 30-40 nəfər əməkdaşa ehtiyac var. Lakin buna saytın iqtisadi potensialı imkan vermir. Azərbaycan mətbuatının mövcud iqtisadi potensialında bu, mümkün görünmür.

- Qol.az saytı demək olar ki, daha çox futboldan yazır. Amma başqa idman növləri də var axı. Bunun səbəbi nədir?

- Çox düzgün qeyd etdiniz. Lakin bu tək Qol.az-la bağlı məsələ deyil. Bu, ümumilikdə Azərbaycan idman jurnalistikasının problemidir. Bir neçə saytı çıxmaq şərtilə, demək olar ki, bütün saytların xəbərləri əsasən futbol üzərində qurulur. Mənim özümü idman jurnalisti kimi təqdim edəndə heç vaxt bununla razılaşmamışam. Həmişə demişəm ki, mən futbol jurnalistiyəm. İdman jurnalisti anlayışı genişdir. Bu gün şəxsən mənim və digər əməkdaşlarımızın enerjisi çatmır ki, idmanın digər sahələrinə də vaxt ayıraq. Ona görə də heç olmasa 15-20 nəfər əməkdaşın olmalıdır. Heç olmasa onlardan 5 nəfəri digər idman sahələrinə yönəlməlidir. Biri boksdan, biri güləşdən, biri də basketboldan yazmalıdır. Məsələn, qardaş Türkiyədə, xüsusən də Rusiyada hər sahə üzrə peşəkarlaşmış kadr ola bilər.

Azərbaycanda idman jurnalistlərinin əsasən futbolu seçməsi təsadüfi deyil. Futbol idmanın şahıdır və ona maraq böyükdür. Mən bir neçə dəfə cəhd etdim ki, digər idman növlərini də çox işıqlandıraq. Açıq etiraf edirəm ki, digər idman növləri ilə bağlı xəbərlər çox oxunmur. Sanballı bir idmançımızın uğur qazanması ilə bağlı müsahibə də az oxunur. Bu cür yazılar az oxunanda bir redaktor kimi məndə də məyusluq yaranır. Ancaq Ronaldo ilə bağlı adicə bir xəbər kifayət qədər oxucu yığır.
 
- İdman ictimaiyyətinin saytınıza münasibətini bilmək istərdik. Müsahibə, yaxud açıqlama alanda çətinlik çəkdiyiniz hallar olurmu?
 
- İdman ictimaiyyətində və cəmiyyətdə Qol.az-a münasibət çox yüksəkdir. Həm futbol federasiyaları, həm də klub rəhbərləri, məşqçilər, futbolçular səviyyəsində Qol.az ciddi və etibarlı sayt kimi qəbul olunur. Eyni zamanda da sevilir. Bu, məni qürurlandıran faktdır. İstədiyimiz idman adamından müsahibə, informasiya ala bilirik. Bununla bağlı ciddi problem yaşamamışıq. Açığı da deyim ki, futbolçuların özləri də müsahibələrinin, xəbərlərin Qol.az-da getməsində maraqlıdırlar.
 
- Kimlə müsahibələriniz olduqca geniş rezonansa, səs-küyə səbəb olub?
 
- Xeyli müsahibəni misal çəkə bilərəm. Məsələn, Qol.az 3-4 ayında olanda xanım əməkdaşımız Türkiyə millisinin futbolçusu Arda Turandan müsahibə götürmüşdü. O vaxt Arda Turan "Atletiko"ya getməyə hazırlaşırdı. Arda Turanla olan həmin müsahibəmiz Türkiyə mətbuatında böyük reaksiya doğurmuşdu. "Hürriyet", "Milliyet", "Sabah" kimi nüfuzlu türk nəşrləri müsahibəni yaymışdı.

Mən özüm  Avropa Çempionatı başa çatandan sonra məşhur türk məşqçi Fatih Terimdən müsahibə almışdım. O da yaxşı qarşılanmışdı. 

Mənim Qurban Qurbanovla hər 2-3 ildən bir geniş, 3-4 saatlıq müsahibələrim olur. Bu zaman bir çox məsələlərə toxunuruq.

- Son olaraq, 15 illiyinizi necə qeyd edəcəksiniz?

- 10 illiyimizi daha təmtaraqlı keçirmişdik. İllər keçdikcə, elə bil təmtarağa maraq da azalır. Bu dəfə dostlarımızın çoxu heç Azərbaycanda olmayacaq. Ona görə də budəfəki tədbiri təmtaraqdan uzaq qeyd edəcəyik. Bəlkə, 20 illiyimizi daha geniş formatda düşünə bilərik.

Mənbə: modern.az