Azərbaycanlı futbolçuların Türkiyəyə sürətli axını - Səbəb nədir?

Azərbaycanlı futbolçuların Türkiyəyə sürətli axını - Səbəb nədir?
MEDİA 19 Yanvar 2024 / 15:00 5917
-  A +

Medianın İnkişafı Agentliyinin layihəsi

Son aylar azərbaycanlı futbolçuların Türkiyə futboluna axını sürətlə artmaqdadır. Hazırda legioner həyatı yaşamaq istəyən yerli futbolçularımız əsasən qardaş ölkənin klublarını seçirlər. Onların arasında Azərbaycan millisində çıxış edən oyunçular çoxluq təşkil edir. 

Təkcə bu mövsüm Şahruddin Məhəmmədəliyev və Renat Dadaşov superliqa təmsilçilərindən "Adana Demirspor" və "Hatayspor", Coşqun Diniyev birinci liqa təmsiçilərindən "Ümraniyespor", Vüsal İsgəndərli "Boluspor", Sərtan Taşkın "Manisa", Bəxtiyar Həsənalızadə isə "Tuzlaspor"la müqavilə bağlayıb. Ötən gün isə birinci liqanın başqa bir təmsilçisi "Kocaelispor" yığmamızın üzvü Ramil Şeydayevi transfer etdiyini rəsmən açıqlayıb.

Beləliklə, bu mövsümdə Türkiyə superliqası və birinci liqalarına keçən azərbaycanlı futbolçuların sayı 7-ə çatıb.

Bunadək ən son 2021-2022-ci illərdə Namik Ələsgərovun "Bursaspor"un formasını geyinməsini, 2023-cü ilin fevralından may ayınadək Mahir Emrelinin icarə əsasında "Konyaspor"da oynamasını xatırlatmaya bilmərik.

Bəs, yerli futbolçuların Türkiyə klublarını seçməsinin səbəbləri hansılardır?

Futbol eksperti və meneceri Səbuhi Səfiyarlı düşünür ki, Türkiyədə azərbaycanlı futbolçulara legioner limitinin tətbiq edilməməsi bizim futbolçuların qardaş ölkəyə axın etməsinin əsas səbəblərindəndir: “2021-ci ildə Türkiyəyə bəzi transferlər olsa belə, daha böyük sayda gedişlər 2023-ci ilin yayından başladı. Bu da Türkiyə Futbol Federasiyası tərəfindən tədbiq olunan “Mavi lisenziya”dan sonra oldu. Lisenziyaya əsasən, türkdilli ölkədən olan futbolçu legioner sayılmadan oynaya bilər. Ona görə Türkiyə klubları Azərbaycan, Qazaxstan, Özbəkistan kimi ölkələrdən futbolçularla maraqlanmağa başladılar. Yəqin ki, növbəti ildə bu maraq daha çox olacaq. Düzdür, Superliqada bu ölkələrdən olan futbolçuların sayı o qədər də çox deyil, amma aşağı liqalarda daha çoxdur. Əsas məsələ isə bizim futbolçunun legioner sayılmamasıdır. Bu da əsas təkanverici vasitə oldu. Bir az da dərinə gedib soruşsaq ki, niyə bu ölkələr arasında Azərbaycandan futbolçular daha çoxdur, bunun əsas səbəbini bizim mədəniyyətin, bizim dilin digərlərinə nisbətən daha yaxın olmasını qeyd etmək olar. Bizim türklərlə işləməyimiz daha rahatdır”.

O, Azərbaycan futbolçuların Türkiyəyə olan maraqlarının səbəblərindən də danışıb: “Bizim futbolçuların Türkiyəyə maraq göstərməsinə gəldikdə, birinci maliyyə məsələsi ortaya çıxır. Maaliyyə cəhətdən onların təklifləri çox sərfəlidir. Burada qazandıqlarından daha artıq qazanırlar. İkinci məsələ isə perspektivdir. Oyunçular inanırlar ki, aşağı liqalarda özlərini yaxşı göstərsələr, Superliqa klublarını diqqətini özlərinə cəlb edə bilərlər. Çünki Türkiyənin 1-ci Liqasından Superliqaya getmək daha asandır, nəinki Azərbaycan Premyer Liqasından. Həm də Türkiyənin 1-ci liqasında belə futbol atmosferi, televeziya yayımı bizdən daha maraqlıdır. Bu isə bizim futbolçuları cəlb edən əsas faktorlardandır”.

Futbol meneceri Vaqif Heydərli isə Azərbaycan oyunçularının Türkiyəyə kütləvi keçidlərinin yeganə səbəbini tədbiq olunan qaydada görür: “Bizim futbolçuların Türkiyəyə axını çıxan son qaydalarla əlaqəlidir. Həmin qaydaya görə, azərbaycanlı futbolçular orda legioner sayılmır. Legioner sayılanda maraq az idi. Namiq Ələsgərovun “Bursaspor”a gedən dövrlərdə indiki limit yox idi. Türkdilli ölkələrdən olan futbolçulara yerli kimi baxılandan sonra Türkiyəyə maraq daha da artdı”.

V.Heydərli Ramil Şeydayevin "Kocaelispor"a keçidi haqda da fikirləri ilə bölüşüb: “Məncə, Ramil Tailandda qalmaq istəmirdi. Komandasını dəyişmək istəyirdi. Həm son hadisələrə görə, həm, yəqin ki, komanda heyətinə uyğunlaşa bilməməsinə görə. Türkiyədə, bəlkə də, Superliqadan hansısa klub onunla maraqlana bilərdi. Amma oyun praktikası mənasında orda o qədər də şansı olmazdı. Yəqin ki, maliyyə şərtləri də yaxşıdır. Hər şey onu göstərir ki, bu keçid uğurlu olacaq. Ancaq bu, futboldur. Bəzən uğurlu düşündüyün transfer uğursuz olur və ya əksinə. Ona görə Ramilə ancaq uğurlar arzulaya bilərik”.

Cavad Musayev

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub

Daha çox


Son xəbərlər
23.04.24  19:30

"Liverpul"da ciddi itki

23.04.24  17:55

Mourinyo əsəbiləşdi