Klopp millini necə dəyişir? – 44 futbolçu, 16 debütant

Almaniya millisinin yeni baş məşqçisi Yurgen Klopp ilk heyət seçimi ilə diqqət çəkib.

QOL.az xəbər verir ki, 58 yaşlı mütəxəssis UEFA Millətlər Liqasının qarşıdakı oyunları üçün ümumilikdə 44 futbolçuya dəvət göndərib.  Onlardan 16-sı əsas milli komandaya ilk dəfə çağırılıb.

4 oyun üçün 2 heyət

Almaniya mediası yazır ki, Klopp qeyri-adi qərarını millinin qısa müddətdə dörd oyun keçirəcəyi ilə izah edib. O, futbolçuları iki qrupa bölüb. Birinci heyət sentyabrın 24-də Amsterdamda Niderland və sentyabrın 27-də Auqsburqda Yunanıstanla qarşılaşacaq. İkinci heyət isə oktyabrın 1-də Münhendə Serbiya, oktyabrın 4-də Salonikidə Yunanıstanla oyunlar üçün nəzərdə tutulub.

Klopp deyib: “Milli komanda ilə iki həftə ərzində dörd oyun keçirmək çox qeyri-adi haldır. Bu müddətdə mümkün qədər çox futbolçunu yaxından tanımaq istəyirəm. Bunlar A və B komandaları deyil. Hər iki heyəti bir-birinə uyğun şəkildə formalaşdırmışıq”.

2026-cı il dünya çempionatından sonra Almaniya millisinin baş məşqçisi təyin edilən Klopp gələcəyə hesablanmış komanda qurduğunu bildirib: “Dünya çempionatından sonra Almaniya futbolunun diz çökdüyü, istedadımızın və futbolçumuzun olmadığı təəssüratı yaranmışdı. Amma son dörd həftədə futbolçuları yaxından izlədik və çoxlu istedad diqqətimizi çəkdi. Bu, yalnız qarşıdakı dörd oyun üçün deyil, iki-üç il sonranı nəzərdə tutan heyətdir”.

"Heyətdə sizi təəccübləndirəcək bir neçə oğlan var"

Yeni heyətdə Leroy Sane, Deniz Undav, Leon Qoretzka və qapıçı Oliver Baumanna yer verilməyib. Manuel Noyer və Antonio Rüdiger isə milli karyeralarını başa vurublar. Klopp Mark-Andre ter Ştegenin hazırda yığmanın əsas qapıçısı olduğunu açıqlayıb. 31 yaşlı Yoşua Kimmix isə kapitan kimi qalacaq və klubunda olduğu kimi sağ cinah müdafiəsində deyil, mərkəz yarımmüdafiəsində istifadə olunması planlaşdırılır.

İlk dəfə milliyə dəvət alan 16 futbolçu arasında “Ayntraxt”dan Yunes Ebnutalib, “Ştutqart”dan Finn Yelç, “Brentford”dan Vitali Yanelt və “Seltik”dən Mika Baur da var. Klopp yeni futbolçularla bağlı deyib: “Burada sizi təəccübləndirəcək bir neçə oğlan var. Amma biz onlarda nəsə gördük, böyük potensialları var. Onların inkişafının bir hissəsi olmaq istəyirik”.

Deniz Undav və Sane Kloppun istədiyi formada deyil

Yurgen Klopp heyətə daxil edilməyən Deniz Undav, Leroy Sane və Leon Qoretzka ilə bağlı qərarını da açıqlayıb. O, Deniz Undavın bu mövsüm hələ istədiyi səviyyəyə çatmadığını bildirib: “Denizlə danışmışam. Onun bəzi kiçik problemləri olub. Eyni zamanda bu mövsüm hələ tam olaraq öz ritmini tapa bilməyib. Dörd hücumçu seçmək istəyirdim və hazırda seçimimi digərlərindən yana etdim”.

Almaniyalı mütəxəssis “Qalatasaray”ın vingeri Leroy Sane barədə də danışıb: “Leroy da bu mövsüm hələ öz oyununu tam tapa bilməyib. Onunla danışacağam, amma hələ bunu etməmişəm”.

Klopp zədəli olan “Aston Villa”nın yarımmüdafiəçisi Leon Qoretzka ilə isə danışmadığını bildirib: “Leon Qoretzka ilə də danışmamışam, amma o, zədəlidir. 50-dən, hətta 60-dan çox telefon danışığı etmişəm. Bu zənglərin bir mənası olmalıdır. Sadəcə, "Salam, mənəm" demək üçün zəng etməyin mənası yoxdur. Danışılacaq məsələ olanda danışacağıq”.