“Burda ilk gündən çalışan yeganə işçiyəm" - AZAL-da yubiley

Bu gün AZAL klubunda yubileydir. Klubun mətbuat xidmətinin rəhbəri Eldəniz Yusifovun 40 yaşı tamam olur. Qol.az saytı bu münasibətlə ona bir neçə sual ünvanlayıb.

- Əvvəlcə sizi təbrik edirik. Siz də çoxları kimi düşünürsünüz ki, bu 40 il necə gəldi keçdi?

- Təbrikə görə təşəkkür edirəm. Düzünü desəm, özümü bu yaşda hesab etmirəm. Bu mənada illərin necə keçdiyini hiss etməmişəm. Bəlkə də ətrafımdakı yaxşı insanlar, gözəl dostlar və işlədiyim kollektivlərdəki mühit buna səbəb olub. 40 yaşı "cavanlıgın sonu-qocalıgın başlangıcı" adlandırırlar bəzən. Nə qədər qəbul etmək istəməsəm də, əvvəlki cevikliyimin, enerjimin bir qədər azaldıgını görürəm. Deməli, istək, arzu və düşüncə tərzim əvvəlki qədər “cavan” olsa da, fizioloji amillər reallıqla barışmaq məcburiyyətində qoyur insanı...

- Ad gününü qeyd etməklə aranız necədi?

- Özümlə bağlı əlamətdar günlərə həmişə biganə olmuşam. Daha çox dostlarımın, yaxınlarımın, iş yoldaşlarım üçün əhəmiyyət daşıyan günlərə həssaslıq göstərmişəm. Ad günümü əsasən dostlarım qeyd etməyə təhrik edir məni. Bu da sadəcə görüşmək, stol açmaq üçün səbələrdən biridir. Onsuz da dostlar həmişə yanımdadır. Dünəndən həm təbrik edirlər, həm də məclis qurmaq istəyirlər. İndi bir də əsasən qızlarıma görə ad günü keçirməliyəm. Artıq onlar da böyüyüb və məni təbrik etmək istəyirlər.

- Klubunuz sizi necə təbrik etdi?

- Rəhbərlik, məşqçilər və futbolçular təbrik etdilər. Belə günlərdə həmişə təşəbbüskar mən olmuşam. Amma bu dəfə klubumuzun baş mühasibi Aygün Zeynallı məni əvəzlədi. Əvvəl hədiyyəmi verdi, sonra da kollektivi çay süfrəsi ətrafında topladı. Buna görə hamıya təşəkkür edirəm.

- Klubun mövcud durumu yubileyi qeyd etməyə mane olmur ki?

- Yubiley keçirmək fikrim yoxdu. Özümü daxilən buna hazır saymıram. Ona görə də bunu klubun indiki durumu, yaxud maddi səbəblərlə bağlamaq lazım deyil.

- AZAL-da neçənci ad gününüzü qeyd edirsiniz?

- AZAL-da ilk gündən işləyən yeganə işçiyəm. Məndən sonra ən stajlısı inzibatçı Asəf Səfərovdu. Bu kluba 2005-ci ilin iyun ayında dostum Səbuhi Səfiyarlının vasitəçiliyi ilə gəlmişəm. Onda AMMK adlanırdı və güclülər dəstəsinə yenicə vəsiqə qazamışdı. Milli komandamızın keçmiş qapıçısı Hüseyn Məhəmmədova tapşırmışdılar ki, yeni komanda yığsın. O bir gün zəng elədi ki, gəl “Neftçi baza”ya. Dostum Atəş Sultanovla onların görüşünə getdik. Hüseyn məni  azırda menecer kimi fəaliyyət göstərən Kamil Məmmədov və “Neftçi”nin indiki idman direktoru Orxan Hüseynzadəyə təqdim etdi. Qısa söhbətdən sonra “sabahdan işə çıx” dedilər. Sağ olsunlar, onlar bu sahədə mənə yol açdılar. O gündən bəri klubdayam. Artıq 12 il olur. Həmkarım Mehman Süleymanovun araşdırmalarına görə, bu sahədə rekordçuyam. Əgər belədirsə, bu çox sevindiricidir.

- Klublardan təbriklər gəlirmi?

- Bütün klublarda mənim dostlarım, tanışlarım var. Onlar da təbrik edənlər sırasındadırlar.   

- Hansı klublardan təbrik mesajları gəlib, hansılardan yox?

- Dünən “Neftçi” ilə oynadıq. Bu komandadakı dostlar zəng edib təbrik etdilər. “İnter”,  “Zirə”, “Qarabağ”, “Sumqayıt” klubunun mətbuat xidmətlərinin rəhbərləri təbrik mesajları yazıblar. AFFA-dan PFL-dən təbriklər almışam. Fürsətdən istifadə edib onların hamısına təşəkkür edirəm. Sizə də gəstərdiyiniz diqqətə görə minnətdaram. 

Ramiq AĞAMƏMMƏDOV