"Yığmadakı taleyim Azərbaycanla oyundan asılı deyil"

Moldova millisinin baş məşqçisi Ştefan Stoyka beynəlxalq yoldaşlıq matçı çərçivəsində noyabrın 17-də Bakıda yığmamızla qarşılaşacaqları oyunöncəsi mətbuat konfransı keçirib.

Qol.Az-ın Moldova mətbuatına istinadən verdiyi məlumata görə, Stoyka millimizlə oyunöncəsi jurnalistlərin suallarını cavablandırıb.


- Azərbaycanla yoldaşlıq görüşündə komandanız necə oynayacaq?

- Biz hələ də yığmanın futbolçularının hansı vəziyyətdə olduğunu görməyə çalışırıq. Çətin oyun olacaq. Siz də bilirsiniz ki, bizim ən qiymətli və tanınmış futbolçularımız zədəlidir. Milinçanu başından zədə alıb və Azərbaycana qarşı oynamayacaq. Bununla belə, kim varsa, yığmaya çağırmağa cəhd etdik. Moldova üçün əlimizdən gələni edəcəyik. Çünki Azərbaycanla oyun bizim üçün önəmlidir. Düşünürəm ki, milliyə dəvət etdiyim bütün futbolçular özlərini yaxşı tərəfdən göstəriblər. Biz də yığmaya klublarında 90 dəqiqə oynayan və Azərbaycanla görüşdə bütün gücünü ortaya qoyacaq futbolçuları çağırmışıq.

- Miliçanuya nə olub?

- Anladığım qədər, o başından zərbə alıb və hazırda xəstəxanada həkim nəzarətindədir. Zədə o qədər də ciddi deyil. Ancaq bir-iki həftə oynaya bilməyəcək.

- Radu Qınsarı niyə heyətdən kənarlaşdırdınız?

- Onu yaxşı tanıyıram. Qınsar uzun müddət Moldova millisində oynayıb. Lakin son 3-4 oyunda klubunun heyətində çıxış etməyib. Bu o demək deyil ki, Qınsar yığmaya qayıtmayacaq. Əgər "Şerif"in əsas heyət futbolçusuna çevrilsə, yenidən onu milliyə dəvət edəcəm.

- Azərbaycanla görüşdə nəticə önəmlidir, yoxsa, bu matçda yeni futbolçular sınaqdan keçiriləcək?

- Bu matç bizim üçün yoxlama görüşü olacaq. Çünki hazırda hansı vəziyyətdə olduğumuzu bilməliyik. Bayaq dediyim kimi 4 əsas futbolçumuz zədəlidir. Həmçinin Rusiya Premyer Liqasında çıxış edən bəzi futbolçularımız var ki, vacib qarşılaşmaları olduğu üçün onları yığmaya çağırmadıq.

- Yığmamız FİFA reytinqində 154-cü pillədə qərarlaşıb. Reytinqdə irəliləyiş nə zaman olacaq?

- Biz yaxşı çıxış etmək və səmərəli komanda yaratmaq üçün hər gün çalışırıq. Əminəm ki, yığmaya dəvət olunan hər bir futbolçu komanda üçün canını qoyacaq. Bizdə alınacaq ya yox, bu artıq başqa sualdır. Yığmaya ən güclü və keyfiyyətli futbolçuları dəvət etməyə çalışırıq.

- Dünya reytinqində Qabon və Sinqapurla eyni pillələri bölüşürük.
Daha yuraxı pillədə qərarlaşan Azərbaycan millisi bizim üçün nə qədər güclüdür?

- Azərbaycan futbola ciddi sərmayə qoyan böyük ölkədir. Son 10 ildə ora dünya səviyyəli məşqçilərin getdiyini bilirik. Azərbaycan futbolda tərəqqiyə nail olub. Ancaq biz də inkişaf edirik. Lakin böyük rəqiblərlə mübarizə aparmaq çətindir. Çünki bizim cəmi 3 milyon əhalimiz var. Ancaq təslim olmayacağıq, bütün rəqiblərimizlə mübarizə aparacağıq. Hər keçə gün Moldova futbolunun daha da yüksəlməsinə çalışacağıq.

- Moldova Futbol Federasiyası ilə müqavilə yeniləmisiniz? Yoxsa, buna Azərbaycanla oyundan sonra aydınlıq gələcək?

- Bu önəmli deyil. Əsas məsələ yığmanın yaxşı oyun sərgiləməsidir.

- Azərbaycanla görüşü sizin baş məşqçi vəzifənizdə həlledici matç kimi dəyərləndirmək olar?

- Xeyr. Yığmadakı taleyim Azərbaycanla oyunun nəticəsindən asılı deyil. Mənim taleyim elə mənim taleyimdir. Eləcə də Moldova millisinin.