"Rəqabətin olmaması klublarımıza avrokuboklarda çətinlik yaradacaq"

AFFA, Peşəkar Futbol Liqası və "CBC Sport" kanalının birgə təşkilatçılığı ilə keçirilən "CBC Sport" kubokunda ötən gün ilk matç oynanılıb. “Bayıl Arena”da “Neftçi”nin qonağı olan AZAL rəqibinə minimal hesabla (0:1) məğlub olub. Matçdan sonra AZAL-ın vitse-prezidenti Fikrət Hüseynov Qol.Az saytına müsahibə verib. O, ilk olaraq turnir barədə danışıb.

- Təlim-məşq toplanışını ölkə daxilində keçirən klublar üçün belə turnirlərdə iştirak etmək yaxşı haldır. İlk dəfə olduğu üçün təbii ki, problemlər olmalı idi. İlk olaraq klubların hamısı ilə danışmışdıq. "Kəpəz" ilk gündən planları ilə əlaqədar turnirdən imtina etdi. Sonra 8 klub qaldı.  "Xəzər Lənkəran" da maliyyə məsələləri ilə bağlı geri çəkildi. Bildirdilər ki, 10 gün Bakıda qalmaq maliyyə baxımından onlar üçün çətin olacaq. "Rəvan" da 1 gün əvvəl bu turnirdən imtina etdi. Onlarda 3-4 gün idi ki, futbolçular məşqə çıxmırdı. Son olaraq 5 komanda qaldıq. Mənə elə gəlir ki, bu turnirin gələcəyi var. Növbəti ildən klublarımıza xarici komandalar da qoşulacaq. Çox ehtimal ki, bu klublar Rusiyadan, Gürcüstandan olacaq.

- Bu dəfə də əcnəbi komandanın olması gözlənilirdi, amma nədənsə iştirak etmədilər.

- Bəli, gözlənilirdi. Elə oldu ki, biz 8 komanda ilə danışdıq və 2 qrup yaratdıq. Amma alınmadı. Hamımız görürük ki, hava necədir. Heç indi  Antalyada da belə hava olmur. Üstəlik, maliyyə tərəfdən çətinlik çəkən komandalar var. Ancaq kimin maliyyəsi yaxşıdırsa, həmin klub Antalyaya gedir.

- AZAL-da maliyyə durumu necədir?

- Mövsümün əvvəlində strategiyamızı dəyişdiyimizdən o qədər də təsiri yoxdur. Çünki biz daha çox yerli futbolçulara üstünlük verərək, maaşları da manatla ödəyirik. Ancaq elə klub yoxdur ki, devalvasiya onlara təsir etməsin.

- Bir müddət əvvəl komandaya legioner hücumçunun gətiriləcəyini demişdiniz...

- Bəli ola bilər ki, əcnəbi futbolçularımız da olsun. Hazırda  Rusiyadan Aleksandr Sobolev adlı bir hücumçu gəlib və o "Sumqayıt"a qarşı 90 dəqiqə oynadı. Ona görə də "Neftçi" ilə oyunda istirahət verdik. Bir hücumçu da gözləyirik.

- Dediniz ki, komandada gəncləşdirmə və milliləşdirmə siyasəti aparırsınız. Artıq bir neçə klub bu addımı atır. Necə düşünürsünüz, bu addım "Qarabağ" və "Qəbələ"nin Premyer Liqada hegemonluğuna şərait yaratmayacaq?

- Düzdür, şərait yaradır. Amma rəqabətin olmamağı o komandalar üçün də yaxşı deyil. Çünki ola bilsin sabah Avropada oynayanda bu amil onlara problem yaradacaq. Ötən il "Qarabağ" və "Qəbələ" Avropa Liqasında idi. Mənə elə gəlir ki, ötən mövsüm ən güclü rəqabət olan çempionatımız idi. Ancaq indi rəqabət bir az zəifləyir. Məsələn, bu gün "Neftçi" maliyyə tərəfdən AZAL-dan bəlkə də artıqdır. Amma fərq o qədər də görünmür. Ona görə də ola bilsin ki, çempionatda "Qarabağ" və "Qəbələ" hegemon olsun. Ancaq rəqabətin olmaması avrokuboklarda onlara çətinlik yaradacaq.

- "CBC Sport"un oyunların yayımı ilə bağlı ödəyəcəyi məbləğ klubların balansına AFFA tərəfindən mövsümün sonunda köçülürəcək. Hazırda klublarda maliyyə durumu ürəkaçan deyil. Bununla bağlı rəhbərlik etdiyiniz Klublar Komitəsində nə vaxt görüş keçirməyi planlaşdırırsınız?

- Müzakirə olunur. Yanvarın 22-də görüş keçirəcəyik. Orada bu məsələ birinci olacaq. PFL-ə olan borclar ödəniləcək, necə olacaq, bu məsələlər hamısı danışılacaq.

- PFL borclarla bağlı heç bir klubun rəsmi müraciət etmədiyini bildirib. Siz necə bu qurumla danışıqlar aparmısınız?

- Biz danışıqlar aparırıq. Bu məsələyə 2-3 günə aydınlıq gətirəcəyik. Təbii ki, mən AZAL adından danışıram. İnanıram ki, razılaşma olacaq və hər şey yoluna düşəcək. İstəmərik ki, neçə illərdir davam edən çempionatımız belə olsun. Qabağa getmək lazımdır, arxaya getməyək.

- Hazırda bir-iki klubdan başqa Azərbaycan çempionatında vəziyyət elə də ürəkaçan deyil. Sizcə, bu gedişat çempionatı hara aparır?

- Bu gün dünyada maliyyə problemləri var. Avropada 100 illərlə davam edən çempionat var. Bizdə isə demək olar ki, yenidir. Əlbəttə ki, yavaş-yavaş irəli getməliyik. "Xəzər Lənkəran" və "Rəvan" bu gün elə durumdadılar ki... Acınacaqlı haldır və heç kim bundan sığortalanmayıb.

Ergün SEYİD