"Hədəf həm sınaq, həm də qələbədir" - Ayxan Abbasov

Azərbaycan milli komandasının baş məşqçisi Ayxan Abbasov Macarıstanın Sombatxey şəhərində Malta yığmasına qarşı keçiriləcək yoldaşlıq oyunundan öncə fikirlərini bölüşüb. 

QOL.az xəbər verir ki, mütəxəssis Millətlər Liqasına hazırlıq xarakteri daşıyan bu toplanışın əhəmiyyətindən danışıb və qarşıdakı matçlarda həm bütün oyunçuları sınaqdan keçirmək, həm də qələbə qazanmaq istədiklərini vurğulayıb:

"Bu, Millətlər Liqasının startından əvvəl sonuncu toplanışımızdır. Ağır mövsümdən sonra bir araya gəlmişik. Komandanın böyük həvəslə məşq etməsi məni çox sevindirir. Malta və San-Marino ilə matçlarda bütün oyunçularımızı yoxlayacağıq. Bu oyunlar ərəfəsində komandada böyük istək var. Yoldaşlıq matçları olmasına baxmayaraq, hər iki görüşdə qələbə qazanmaq niyyətindəyik. Bizi olduqca maraqlı matçlar gözləyir".

Baş məşqçi daha sonra jurnalistlərin suallarını cavablandıraraq rəqib seçimi, start heyəti və bəzi futbolçuların fərdi durumu ilə bağlı məqamlara aydınlıq gətirib:

- Niyə məhz bu komandalar seçildi?

-  Biz matçları burada oynamaq istəyirdik, lakin heç də bütün komandalar bura gəlməyə razı deyildi. Onlar bizi öz meydanlarında qəbul etmək istəyirdilər. Lakin yorucu və uzun səfərlərə görə biz bununla razılaşmadıq. Millətlər Liqasına hazırlaşdığımız üçün oyun tərzi və güc baxımından Litva və Lixtenşteynə yaxın olan rəqibləri seçdik.

- Artıq 11 ildir ki, Maltanı məğlub edə bilmirik. Sabah bu seriyaya son qoyulacaqmı?

- Bəli, əvvəllər onlara məğlub olmuşuq, heç-heçə oynamışıq. Lakin sabah inamlı çıxış edib qalib gəlmək istəyirik. Təbii ki, rəqib də qələbə qazanmağa çalışacaq. Onların güclü komandalarda çıxış edən kifayət qədər yaxşı hücumameyilli futbolçuları var.

- Bu yoldaşlıq matçlarının nəticələri sizin üçün nə dərəcədə önəmlidir?

- Belə oyunlar bizə müəyyən qədər risk etmək imkanı verir. Ancaq harada və kimə qarşı oynamağından asılı olmayaraq, həmişə qalib gəlmək istəyirsən. Bəli, qələbə qazanmaq əsas hədəfimizdir. Lakin nümayiş etdirəcəyimiz oyunun keyfiyyəti də bizim üçün eyni dərəcədə vacib olacaq.

- Sabah Emil Balayevdən başqa daha kimlər əsas heyətdə meydana çıxacaq?

- Hər iki matç üçün fərqli heyətlərimiz olacaq. Sabah Emil əsas qapıçı kimi çıxış edəcək. Start heyətində həmçinin Anton Krivotsyuk, Bədavi Hüseynov, Elvin Bədəlov, Qismət Alıyev, Elvin Cəfərquliyev, Emil Səfərov, Aleksey İsayev, Mahir Emreli, Toral Bayramov və Xəyal Əliyev yer alacaq. İkinci oyunda isə tamamilə fərqli bir heyəti meydana buraxacağıq.

- Elvin Cəfərquliyev hazırda nə dərəcədə formadadır?

- Onunla bu barədə söhbət etdik. Çox böyük həvəsi var və böyük futbol üçün həqiqətən darıxıb. İnanıram ki, sentyabr ayınadək Elvin yeni klubunda kifayət qədər oyun praktikası qazanacaq. Biz ümumiyyətlə klubun və futbolçunun daxili işlərinə qarışmırıq, amma inanırıq ki, ona yeni komanda tapması üçün lazımi şərait yaradılacaq. O, bizim üçün çox vacib oyunçudur.