“Məktəblərimizdə fiziki tərbiyə dərsləri layiqincə təşkil olunur"

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

Uşaqlar, yeniyetmələr və gənclər arasında idmanın təbliği ilə bağlı layihəmiz çərçivəsində növbəti həmsöhbətimiz Bakıdakı 193 nömrəli orta məktəbin fiziki tərbiyə müəllimi Əhliman Hüseynov oldu.

O, özü haqda məlumat verərkən 26 ildir 193 nömrəli məktəbdə çalışdığını bildirib: "Mən 1958-ci ildə Zəngilan rayonunda anadan olmuşam. 1974-cü ildə orta məktəbi bitirmişəm və 1976-cı ildə Azərbaycan Dövlət Bədən Tərbiyəsi İntitutuna daxil olmuşam. 1980-ci ildə ali təhsilimi başa vurmuşam. Daha sonra təyinatla Zəngilan rayonuna göndərilmişəm. 1993-cü ildə məcburi köçkün olaraq Sumqayıt şəhərinə gəlmişəm. Burada Zəngilan rayon 15 nömrəli orta məktəbdə fiziki tərbiyə müəllimi kimi işləməyə başlamışam. Orada işləyə-işləyə 1999-cu ildə Nəriman Nərimanov rayonundakı 193 nömrəli orta məktəbə müəllim təyin olunmuşam. Həmin dövrdən indiyədək bu məktəbdə fəaliyyət göstərirəm. Məktəbimizdə idmana xüsusi diqqət yetirilir. Biz də idman müəllimi olaraq həm öz gücümüzdən, həm də kollektivin gücündən istifadə edərək həmişə məktəbdə idman əhval-ruhiyyəsinin yüksək olması, sağlam uşaqların böyüdülməsi, çalışqan vətəndaşların, uzunömürlü insanların formalaşması üçün əlimizdən gələni edirik".

Ə.Hüseynov idmanın səviyyəsinin daha da yüksəlməsi üçün fiziki tərbiyə dəslərinin daha sıx-sıx keçirmək lazım gəldiyini deyib: "Fiziki tərbiyə dərslərinin yüksək səviyyədə tədris olunması üçün ilk növbədə avadanlıq, infrastruktur, resurslar lazımdır. İkinci yerdə isə müəllimin bacarığıdır. Müəllim öz bacarığı ilə həmin şəraitdən istifadə edərək verilmiş mövzuları şagirdlərə çatdırmalıdır. Məncə, hazırda Azərbaycan Dövlət Bədən Tərbiyəsi və İdman Akademiyasının yetişdirdiyi hazırlıqlı gənclər sayəsində fiziki tərbiyə dərsləri daha yüksək səviyyədə tədris olunur. Şagirdlər arasında idmanın səviyyəsini yüksəltmək üçün isə fiziki tərbiyə dərslərinin sıxlığının artırılmağı vacib şərtdir. Bu, bütün şagirdlərin dərslərdə bərabər səviyyədə işləməsinə, fəaliyyət göstərməsinə şərait yaradır. Əgər şagirdlərin hamısı hərəkətləri eyni maraqla yerinə yetirərsə, dərsləri öyrənərsə, dərsin keyfiyyəti artar. Uşaqları idmana cəlb etmək üçün qabaqcıl şagirdlərdən yararlanmaq lazımdır. Əvvəlcə onlara idman həəkətlərini icra etdirməli, başa salmalıyıq. Bu vəziyyət bütün şagirdlərin diqqətinə səbəb olur. Şagirdlər inam qazanırlar ki, onlar da bu hərəkəti yerinə yetirə bilərlər və işə başlayırlar. Fikrimcə, bu gün idmanın səviyyəsinin yüksəldilməsi üçün heç bir maneə yoxdur. Məktəblərimizdə fiziki tərbiyə dərsləri layiqincə təşkil olunur".

Həmsöhbətimiz fiziki tərbiyə müəllimi olmağın çətinliklərindən söz açıb: "Fiziki tərbiyə müəllimi olmağın çətinliyi budur ki, fiziki tərbiyə dərsləri açıq havada və ya zal şəraitində, şagirdlərin dağınıq, oyun üslubunda çalışdığı halda keçirilir. Müəllim hər bir şagirdi nəzarətdə saxlaya bilmək üçün daha çalışqan, gözüaçıq olmalıdır. Əgər müəllim şagirdlərin səhvlərini görürsə, onları uşaqlara izah edirsə, heç bir çətinlik yaranmayacaq, şagirdlərin müəllimə inamı çoxalacaq. Bu inam şagirdlərlə müəllim arasında gözəl bir körpü yaradır".

Fiziki tərbiyə müəllimi məktəblərdəki idman zallarının və meydançaların durumu haqda da fikirlərini bölüşüb: "193-cü nömrəli məktəbdə idman zalının uzunluğu 27 metr, eni 13 metrdir. Meydança isə müəyyən qədər yığcamdır. 60 metrlik qaçış məsafələri var. Ətraf məktəblərdə də olmuşam, yarışlarda, iclaslarda iştirak etmişik. Həmin məktəblərdə də infrastruktur normal səviyyədədir. Ümumilikdə məktəblərdə idman meydançalarının durumu yaxşıdır. Normal şərait var. Hər bir müəllim də öz üzərinə düşən vəzifəni başa düşərək, mövcud şəraitdən yararlanaraq sağlam vətəndaşlar yetişdirməyə çalışmalıdır". 

Ə.Hüseynov sonda şagirdlərinin idman yarışlarında uğur qazanmaq üçün həvəslə çalışdığını söyləyib: "Məktəblərdə əsasən, idman oyunlarına maraq daha çoxdur. Oğlanlar futbola, voleybola, basketbola maraq göstərirlər. Şagirdlər atletika yarışlarına da həvəslə yanaşırlar. Mən dərs tədris edərkən görmüşəm ki, şagirdlər yüksək nəticələr qazanmaq üçün səylə çalışırlar. Uşaqları pis vərdişlərdən qorumaq üçün dərsdən sonrakı vaxtlarda onları müxtəlif məşğələlərə, idman bölmələrinə cəlb etmək lazımdır. Bu, həm həm də uşaqların daha sağlam, bacarıqlı şəkildə formalaşmasına yol açar. Uşaqların asudə vaxtlarını səmərəli keçirməsinə şərait yaratmaq vacib şərtdir. Uşaqları idmana cəlb etmək bizim borcumuzdur. Şagirdlər harmonik, bərabərsəviyyəli inkişafla həm daxilən, həm də xaricən gözəlliyə sahib olurlar".

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub.