"Valideynlərin qız uşaqlarını idmandan uzaqda saxlamağını istəməzdim"

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

Uşaqlar, yeniyetmələr və gənclər arasında idmanın təbliği ilə bağlı layihəmiz davam edir. Layihə çərçivəsində növbəti həmsöhbətimiz Bakıdakı 210 nömrəli tam orta məktəbin fiziki tərbiyə müəllimi, Azərbaycan Atletika Federasiyasının Respublika dərəcəli hakimi Rəşad Musayev oldu.

O, əvvəlcə fiziki tərbiyə müəllimlərinin dərsləri yüksək səviyyədə tədris etdiyini söylədi: "Artıq 8 ildir ki, pedaqoji fəaliyyətlə məşğulam. Ümumtəhsil məktəblərində fiziki tərbiyə dərslərinin keyfiyyətini yüksək qiymətləndirirəm. Fiziki tərbiyə müəllimləri dərsləri 4 məzmun xətti üzrə tədris edirlər. Eyni zamanda şagirdləri əyləndirmək, dərsləri daha maraqlı etmək üçün estafetlərdən, sorğulardan istifadə edirlər". 

Fiziki tərbiyə müəllimi qeyd edib ki, məktəblərdə dərslərin tədrisi üçün hər bir şərait yaradılıb: "Məktəblərdə idman zallarının, meydançaların durumu yaxşıdır. İdman zallarının işıqlandırılması, avadanlıqların keyfiyyəti yüksək səviyyədədir".

O, şagirdlərin müxtəlif yarışlarda, turnirlərdə iştirak etdiyini vurğulayıb: "Şagirdlər arasında məktəbdaxili yarışlar, gənclər və idman idarələrinin təşkil etdiyi turnirlər keçirilir. Ümumilikdə şagirdlər yarışlarda yüksək səviyyədə və sevincli şəkildə iştirak edirlər. Uşaqların, yeniyetmələrin fiziki tərbiyə fənninə marağı yüksək səviyyədədir".

R.Musayev 210 nömrəli tam orta məktəbdə voleybol və basketbol idman növləri üzrə dərnəklərin fəaliyyət göstərdiyini deyib: "İstedadlı şagirdlərimiz çoxdur. Onlar müxtəlif idman növləri ilə məşğul olurlar. 210 nömrəli orta məktəbdə voleybol və basketbol üzrə dərnəklər fəaliyyət göstərir. Şagirdlər dərsdən əlavə olaraq, bu dərnəklərdə yüksək səviyyədə iştirak edirlər". 

O, şagirdləri pis vərdişlərdən uzaq tutmaq üçün müxtəlif tədbirlər təşkil ettdiklərini bildirib: "Şagirdləri pis vərdişlərdən uzaqlaşdırmaq, onları təhsilə və idmana bağlamaq üçün məktəbdaxili layihələrimiz olur. Məktəb rəhbərliyi, psixoloqlar, fiziki tərbiyə müəllimləri şagirdləri pis vərdişlərdən qorumaq üçün bir çox tədbirlər həyata keçiriblər. Şagirdləri bu tədbirlərə dəvət edirik və onlara pis vərdişlərdən uzaq olmağı tövsiyə edirik".

R.Musayev şagirdlərə idmanla məşğul olmaq üçün motivasiya vermək məqsədi ilə müxtəlif addımlar atdıqlarını dilə gətirib: "Şagirdlərlə məktəbdaxili, məktəbdən kənar, sinifdənxaric işlər aparırıq. Onlara idmanla məşğul olmaq üçün yeni motivasiyalar veririk. Olimpiya çempionlarımızı, idmanda uğur qazanmış şagirdlərimizi məktəbə dəvət edirik. Bununla da uşaqlarda motivasiya yaradırıq".

Fiziki tərbiyə müəllimi söyləyib ki, şagirdlərlə tez-tez söhbətlər aparırlar: "Şagirdlərin idmanla məşğul olmağı, yarışlarda, dərnəklərdə iştirak etməsi üçün valideynlərlə də söhbətlər aparırıq. Ümumiyyətlə, valideynlər uşaqlarının idmançı kimi yetişməyinə böyük maraq göstərirlər. Onlarla apardığımız söhbətlərin əsasında bu qənaətə gəlirik ki, övladlarının idmanla məşğul olmağına müsbət yanaşırlar. İdmanın sağlamlığa böyük faydasını nəzərə alaraq təşəbbüs göstərirlər".

R.Musayev sonda qız övladlarının idmanla məşğul olmağını istəməyən valideynlərə səslənib: "Qız uşaqlarının valideynlərinə demək istəyirəm ki, idman hər kəs üçündür. Marağı, potensialı olan hər bir kəs idmanla məşğul ola və uğurlu nəticə qazana bilər. Bunun üçün də ölkəmizdə təbliğat aparılır. Qız şagirdlərimizin idmana cəlb edilməsi üçün böyük addımlar atılır. Ona görə də valideynlərin "İdman qız üçün deyil" deyərək, qız uşaqlarını idmandan uzaqda saxlamağını istəməzdim".