"Qarşıdakı hədəfim dünya çempionu olmaqdır"

Medianın İnkişaf Agentliyinin layihəsi

Azərbaycanın yeniyetmələrdən ibarət sərbəst güləş üzrə milli komandası bu ay Albaniyanın Tirana şəhərində keçirilən Avropa çempionatında uğurlu nəticəyə imza atıb. Yığmamız turniri 4 qızıl, 3 bürünc medalla başa vurub.

Azərbaycan medalların əyyarına görə bütün ölkələri qabaqlayıb. Komandamız xal hesabında isə 155 xalla 2-ci olub.

Avropa çempionatında qızıl medal qazananlardan biri də Hacı Kərimovdur. 55 kq çəki dərəcəsində mübarizə aparan güləşçimiz final görüşündə Ermənistan təmsilçisi Samvel Gevorqyana tam üstünlüklə (13:0) qalib gəlib və Avropa çempionu olub.

Bugünkü həmsöhbətimiz də elə Hacı Kərimovdur. Onunla güləşdəki ilk addımlarına, Avropa çempionatının final matçına və digər bir sıra məsələlərə toxunduq.

Kərimov əvvəlcə güləşlə məşğul olmağa başlamasından danışıb: "Mənim hazırda 16 yaşım var. Güləşə 9 yaşım olarkən öz istəyimlə başlamışam. Çünki məhəlləmizdə yaşayan uşaqlar da güləşlə məşğul olurdular. Mən də onlara baxaraq həvəsləndim. Atama dedim. O, 8 yaşım olanda məni "Zenit" İdman Cəmiyyətinə apardı. Amma hələ yaşım az idi deyə məni qəbul etmədilər. 1 il sonra yenidən getdim və artıq məşq etməyə başladım".

Hacı Avropa çempionu olanadək keçdiyi yoldan da söz açıb: "Avropa çempionu olmamışdan qabaq yeniyetmələrin Azərbaycan çempionatında 2-ci yerə çıxmışdım. Həmin il dünya çempionatına da getmişdim. Amma təəssüflər olsun ki, medalsız qayıtmışdım. 1 il sonra isə yeniyetmələrin Azərbaycan çempionatında 3-cü oldum və yarışlardan kənarda qaldım. Özüm özümə söz verdim ki, bunu bacaracağam. 1 il sonra Azərbaycan çempionu oldum, sonra da Avropa çempionluğu qazandım".

H. Kərimov qeyd edib ki, növbəti hədəfi dünya çempionluğudur: "İnşallah, qarşıdakı hədəfim dünya çempionu olmaqdır".

İdmançımız Avropa çempionatının finalında Samvel Gevorqyana qarşı keçirdiyi görüşdən də danışıb: "Erməni rəqiblə görüşdən 1 gün qabaq axşam düşünürdüm ki, bu, idmandır, hər şey ola bilər. Udmaq da mümkündür, uduzmaq da. Özümü kökləyərək erməni rəqibimə 13:0 hesabı ilə qalib gəldim. Qələbədən sonra keçirdiyim hissləri sözlə ifadə etmək mümkün deyil. Gərək, onu yaşayasan. Təsəvvür edin ki, bütün tribunanı ayağa qaldırırsınız. Onların içində düşmənlər də var. Məcbur edirsiniz ki, onlar sizin himniniz səslənəndə ayağa qalxsınlar. Bu hissləri izah etmək çox çətindir. Unudulmaz anlar yaşandı".

H.Kərimov bunu da qeyd edib ki, Azərbaycanın sərbəst güləş üzrə dördqat Avropa çempionu Hacı Əliyevi özünə kumir hesab etdiyini deyib: "Hacı Əliyevi özümə kumir görürəm. Onun güləşlərinə tez-tez baxıram. Onun nailiyyətlərini mən də qazanmaq istəyirəm. Bunun üçün də çalışacağam".

Hacı sonda uşaqları güləşlə məşğul olmağa və çox çalışmağa səsləyib: "Güləşin insanın inkişafında böyük rolu var. Bu, həm sağlamlıq baxımından yaxşıdır, həm də özünü müdafiə edə bilirsən. Bunu tək mən demirəm. Balaca güləşçilərə məsləhət görürəm ki, çoxlu məşq etsinlər və heç vaxt həvəsdən düşməsinlər, çalışsınlar".

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub