"Qarabağ" büdcəsinə görə Rusiyada ilk 10-luğa düşə bilməz" - Müsahibə

"Qarabağ"ın qapıçısı Şahruddin Məhəmmədəliyev Rusiyanın championat.com saytına verdiyi geniş müsahibədə "Qarabağ"la bağlı sualları da cavablandırıb.

Qol.az müsahibənin həmin hissəni oxucularla bölüşür.

- Şəxsən sizin neçə qızıl medalınız var - altı, ya yeddi? Bu haqda məlumatlar fərqlidir...

- Yeddi. Son Azərbaycan çempionatında sona iki tur qalmış qalib gəldik.

- Qeyd etdiniz?

- Təvazökar formada. Biz hər il bu məqsədə doğru irəliləyirik. Bitdi, növbəti birinə keçirik -  Çempionlar Liqasına. Biz həqiqətən qrupa düşmək istəyirik.

- “Qarabağ” Azərbaycan standartlarına görə “Zenit” kimidir?

- Hegemonluq baxımından bəli. O, son 10 ildə Azərbaycan futbolunun simasıdır.

- Yəqin ki, Rusiya çempionatında maaşların səviyyəsini təsəvvür edə bilərsiniz. Azərbaycanda daha aşağıdır?

- Ümumiyyətlə, müqayisə olunmayan rəqəmlərdir. Arada böyük boşluq var. Hətta Rusiya Premyer Liqasının sonuncu komandaları, "Fakel"lə müqayisədə belə. Mən büdcəsi az klublar olan “Sumqayıt”ı, “Səbail”i yox, “Qarabağ”ı müqayisə edirəm. Hesab edirəm ki, büdcəsinə görə 10 qat Azərbaycan çempionu Rusiyada ilk 10-luğa düşə bilməz.

- Hətta bu qədər fərq var?

- Bəli, bəli, Rusiyada çox yüksək maaş verilir.  Azərbaycan futbolunda pul Rusiyadakından qat-qat azdır. Mən bilirəm ki, orada oynayanların nə qədər pulu var, ona görə deyirəm. Hətta birinci liqada çox ciddi büdcəsi və yüksək maaşı olan klublar var - “Rubin”, “Arsenal" Tula kimi. Klubların heyətində İvanov, Dzaqoyev, Belenov, Düpin kimi futbolçuları saxlamaq imkanı var.

- Çempionlar Liqasında, Avropa Liqasında, milli komandada oynaya-oynaya Rusiya birinci liqasındakı komandaların ödədiyindən az pul qazanmaq sizə eyib gəlmir?

- Heç bir inciklik və paxıllığım yoxdur. Hər kəs öz qazandığına qanedir. Çox adam sərf olunan əməyi başa düşmür. Amma onlar aldıqları pula layiqdirlər. Əgər futbolda bir adam 40 min rubl qazanırsa, deməli, buna layiqdir. Mən ancaq o zaman sevinirəm ki, insan yaxşı pul qazanır, normal yaşayır, ətrafa, ailəsinə, valideynlərinə kömək edə bilir.

- Komfort yaşamağımız üçün sizi nə qədər pul lazımdır?

- Hər şey nisbidir. Məsələn, "Şahdağ"da mənim üçün otaq kirayələyib həftədə də bir dəfə yemək verirdilər (2013-cü ildə - red.). 450 manat maaş alırdım. Bu isə üçümüz - həyat yoldaşım, qızım və mənim üçün kifayət edirdi. İnsan nə qədər çox qazanırsa, bir o qədər də tələbatı artır. Hər kəs imkanları çərçivəsidə yaşayır.

- Azərbaycanda qiymət səviyyəsi Rusiyadan aşağıdırmı?

- Aşağı deyil. Bakı ciddi şəhərdir, o cümlədən qiymətlər baxımından. Həyat yoldaşım deyir ki, Moskva və Bakıda ərzağın qiyməti fərqlənmir. 

- Daim Bakıdasınız?

- Bəli, bəli. Komandanın bazası buradadır. Axı, Ağdam 30 ildir işğal altında idi. İndi orada hər şey bərpa olunur. Hətta bizə söz veriblər ki, bir neçə ildən sonra orada, heç olmasa bir neçə matçda oynaya biləcəyik. Artıq stadionun layihəsi var. Ağdam azad olunduqdan sonra komanda olaraq ora getdik. Hər şey dağıdılıb, həyat yoxdur, yalnız xarabalıqlardır. Hər yer minalanıb... Ümid edirəm ki, zamanla evə qayıdıb Ağdamda oynayacağıq.

- “Qarabağ” son Avropa mövsümündə yaxşı çıxış etdi. Bunu özünüzdən gözləyirdiniz?

- Əla. Hər yerdən uçduq, ha ha... Hər yerdə son anda şansı əldən verdik.

- Qulaq asın, siz real olaraq uzağa getdiniz. 

- Bizim üçün bu, şok deyildi. Biz buna hazırlaşır və bunu istəyirdik. Belə bir şey yox idi ki, vau, filan komandaları keçdik. Çox ciddi komandalarla oyunda mərhələ adladıq - "Lex", "Sürix", "Ferensvaroş". Yalnız sonda "Viktoriya" ilə matçda büdrədik.

- Yəqin ki, bütün bu klublar iqtisadi cəhətdən “Qarabağ”dan güclüdür. Komandanız nəyin hesabına onları keçə bildi?
 
- Məşqçimizin qurduğu komanda sisteminə görə. Bunun artıq sirr olduğunu düşünmürəm. Bizim necə oynadığımızı hamı görür. Bütün Avropa "Qarabağ"ı tanıyır. Əvvəllər bizi çox da ciddi qəbul etmirdilər. İndi isə həmin “Nant” və ya “Frayburq” bizə daha hörmətlə yanaşır.

- Qurban Qurbanov 15 ildir komandaya rəhbərlik edir. O, "Qarabağ"ın əfsanəsidir?

- Tək klubun deyil, bütün ölkənin əfsanəsidir. O, komandanı Çempionlar Liqasının qrupuna da çıxarıb və Azərbaycan futbolu üçün çox şey edir.