Gənclərimizin millidəki ilkləri haqda

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

Bildiyimiz kimi, Azərbaycan millisinin son oyununda - Şimali Makedoniya ilə yoxlama matçında (3:1) gənc futbolçularımız öz oyunları ilə diqqət mərkəzinə düşməyi bacardılar. "Sabah"dan Ceyhun Nuriyevin debüt etdiyi görüşdə "Qarabağ"ın gənc futbolçuları Elvin Cəfərquliyev və Musa Qurbanlı fərqlənə bildilər. Şimali Makedoniya ilə görüş Ceyhunun millidəki birinci oyunu olduğu kimi, bu qollar da Musa və Elvinin yığmada ilk qolları olub. Həmçinin onlar matçın nəticəsinə təsir etməklə yanaşı, öz uğurlu və inkişafa yönələn çıxışları ilə də diqqət çəkiblər.

Buna görə də Qol.az gənclərimizin millidəki oyunu ilə bağlı futbol mütəxəssislərinin fikirlərini öyrənib. Futbol mütəxəssisi Bəxtiyar Musayev Elvin və Musanın millidə ilk qolunu vurmasını sevindirici hal kimi qiymətləndirib:

"Çox sevindirici haldır ki, millimizdə gənc futbolçular fərqləndilər. Onlar həm öz oyunları ilə həm də vurduqları qollarla qələbəyə töhfə verdilər. İstər Elvin Cəfərquliyev, istərsə də Musa Qurbanlı yığmamızın perspektivli gənc futbolçularıdırlar".

Mütəxəssis "Sabah"ın oyunçusu Ceyhun Nuriyevin millimizdə debütü barədə də danışıb: "Mən onu uşaqlıq illərindən tanıyıram. Ceyhun çox fərqli düşünən, kreativ fikirlərə malik, topla rəftarı yaxşı olan bir futbolçudur. Bir az güc və sürət baxımından axsamaları var. Ümid edirəm ki, Ceyhun topla daha da yaxşı rəftar edib, iti düşünərək bu sadaladığım əksiklərin yerini doldurar".

B.Musayev gənc futbolçularımızın yığmadakı oyununu xüsusi dəyərləndirib: "Qeyd etdiyim kimi, gənclərin oyunu çox xoş təsir bağışladı. Mən onlara uğurlar arzulayıram. Mənim gənc futbolçulardan gözləntim nə ola bilər? Stabil çıxışlarını davam etdirsinlər, daim milli komandaya namizəd futbolçular kimi göstərilsinlər və yığmanın əsas heyət oyunçusu olsunlar. Gənclər nəyə görə komandaya cəlb olunurlar? Ona görə ki, bu futbolçuların bugün normal oynamaq, sabah da daha çox inkişaf etmək qabiliyyətləri var".

Mütəxəssis bunu da qeyd edib ki, gənc futbolçuların yaxşı tərəfləri olduğu kimi, mənfi xüsusiyyətləri də var: "Onların xoş təsir bağışlaması və yaxşı keyfiyyətlərinin olmasından əlavə, bir sıra mənfi xüsusiyyətləri də var. İstərdim ki, onlar daim öz üzərində işləsinlər, bəzi əksiklikləri aradan qaldırsınlar. Bu futbolçular artıq 21-22 yaşlı oyunçulardırlar. Onların gənclik dövrləri də başa çatmaq üzrədir. Buna görə də onlara məsləhət görürəm ki, hər gün, hər saat, hər dəqiqə öz üzərlərində işləsinlər. Rejimlərinə diqqət etsinlər. Çünki futbolçu ömrü çox azdır. Əgər böyük bir futbolçu olmaq, daha da inkişaf etmək istəyirlərsə, bu amillər mütləqdir".

B.Musayev gənc oyunçuların uzun müddət milli komandada oynayaraq yığmaya fayda verə biləcəklərini düşünür: "Belə futbolçuların milliyə faydası bundan ibarət ola bilər ki, çox uzun illər yığmada çıxış edə bilərlər. Hər bir baş məşqçi də istəyər ki, yığmanın sabit heyəti olsun. Əgər uzun zaman öz üzərlərində işləyəcəklərsə, sabit çıxış edəcəklərsə, milliyə dəvət alacaqlarsa, onların komandaya ancaq faydası dəyə bilər. Bunun üçün də çox diqqətli olmalıdırlar, daha çox çalışmalıdırlar. Mən bütün gənc futbolçulara uğurlar arzulayıram. İndi fürsət var. Bir az bacarığı olan futbolçular dərhal milli komandaya namizəd göstərilirlər. Çüki o qədər də çox yaxşı keyfiyyətli oyunçularımız yoxdur. Ona görə də hər bir gənc futbolçunun bunun dəyərini bilməsini istəyərdim. Onların uzun zaman milli komandamıza faydalı olmasını arzulayıram".

Futbol mütəxəssisi Şahin Diniyevin də bu mövzuda fikirlərini öyrəndik. O, gənc futbolçuların Azərbaycan millisində çıxış etməsinin müsbət tendensiya olduğunu deyib:

"Əlbəttə ki, futbol inkişaf edirsə, bir-birini əvəz edən futblçular da gəlməlidirlər. Son vaxtlar belə gənc futbolçuların oynaması müsbət tendensiyadır. Ümumiyyətlə, dünya futboluna baxanda görürük ki, 18-19 yaşlı futbolçular dünya çempionatlarında oynayırlar. Bu, təəccüblü gəlməməlidir. Elvin Cəfərquliyev, Musa Qurbanlı, Ceyhun Nuriyevin 17 yaşı yoxdur. Onlar artıq yetişmiş futbolçulardırlar. Həm də Elvin və Musa milliyə yaşlarına görə yox, "Qarabağ"da nümayiş etdirdikləri oyuna görə dəvə olunublar. Elvin və Musa 20-21 yaşındadırlar. Buna görə də onların millidəki çıxışa müsbət tendensiya kimi yanaşıram. "Qarabağ"la Avropa Liqasında oynayan gənc futbolçularımız var. Onlar artıq təcrübə toplayıblar və beynəlxalq arenada özlərini rahat hiss edirlər. Bir çox futbolçular var ki, onlar gələcəkdə millidə oynaya bilərlər".

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub.