"Rəşad Sadıqov yaxşı seçim olar" - Cavid Hüseynov

"Rəşad Sadıqov yaxşı seçim olar" - Cavid Hüseynov
MÜSAHİBƏ 8 Mart 2020 / 13:37 2813
-  A +

Azərbaycan millisinin yarımmüdafiəçisi Cavid Hüseynovun müsahibəsi

- UEFA Millətlər Liqasındakı rəqiblər barədə nə deyə bilərsiniz?

- Asan kimi görünə bilər. Amma heç də zəif komandalar deyil. Məsələn, Lüksemburq 4-5 il əvvəl məğlub etdiyimiz komandadan fərqlidir. Son oyunlarına da nəzər yetirsək, necə inkişaf etdiklərini görərik. Şübhəsiz ki, qrupda ağır oyunlar olacaq. Bununla belə, qarşımıza məqsəd qoyub, vəziyyəti öz xeyrimizə dəyişməyə çalışacağıq.

- Monteneqro, Kipr, yoxsa Lüksemburq daha təhlükəlidir?

- Bu qrupda konkret favorit demək çətindir. Monteneqro favorit göstərilsə də, mənim ən çox çəkindiyim komanda Lüksemburqdur. Onların millisi son illər çox inkişaf edib.

- Milliyə çağırılsanız, kiprlilərə qarşı xüsusi motivasiyada hazırlaşacaqsınız?

- Xeyr, eyni formada hazırlaşacağam. Digər komandalara necə, Kiprə də o cür yanaşacağam.

- Rəqib komandaların ölkələrində millimiz autsayder qismində göstərilir. Bu amil sizdə qıcıq yaratmır?

- Ümumi götürsək, Azərbaycan millisini heç vaxt saymayıblar, bizə həmişə yuxarıdan aşağı baxılıb. Bütün futbolçular ilk təlim-məşq toplanışının birinci günündən etibarən buna hazırlaşmalıdırlar. Onlara düşünülənin əksini sübut etmək lazımdır. Bu həyatda hər gün nəyisə sübut etməlisən.

- Rəqiblərin heyətində legioner həyatı yaşayan kifayət qədər futbolçular var. Bu amil komandamızın vəziyyətini çətinləşdirməyəcək?

- Düzdür, rəqib ölkələr Avropaya daha yaxındırlar. Əsas onların harada oynamaları yox, bizim komanda şəklində yığışıb, sözü bir yerə qoymağımızdır. Belədə yüksək nəticə də əldə etmək olar. Onlar nə Portuqaliya, nə Almaniyadırlar. Amma yenə də güclüdürlər. Eybi yox, bizə yuxarıdan aşağı baxsınlar. Meydanda döyüşərək yaxşı nəticə qazanmağa çalışmalıyıq. Elə çıxış edək ki, həmişəlik yadlarında qalsın. Bu cür düşünmələri bizim üçün əlavə bir stimuldur. Bunu uşaqlara da çatdırmaq lazımdır ki, heç kim bizi saymır, meydana çıxıb, özümüz özümüzə hörmək qazandırmalıyıq.

- Futbol ictimaiyyəti arasında belə bir fikir var ki, ilk Millətlər Liqasında daha zəif qrupa düşmüşdük və yığmamız orada 1-ci yeri tuta bilmədisə, bu dəfə necə bacarsın?

- Həmin vaxt şansımız var idi. Amma futbolda belə hallar olur. O qrupda  bizdən üstün olan yalnız Kosovo idi. Onların futbolçuları güclü çempionatlarda çıxış edirdilər. İndiki qrupda isə rəqiblərimizin hər üçündə yaxşı futbolçular var. İndiki qrup nisbətən daha güclüdür.

- Millimiz nəyə iddia etməlidir?

- İddia həmişə birincilik olmalıdır. Bunun başqa yolu yoxdur. Hansısa yarışa gedəndə idmançının ilk düşüncəsi birinci yeri tutmaq olur. Komandamız yaxşı futbol oynamağı bacarır. Kollektiv şəkildə istəsək, oyuna düzgün şəkildə yanaşsaq, köklənsək, arzuladığımız nəticəni əldə edə bilərik.

- Milli komandanın baş məşqçi postu hələ də boş qalır. Hazırda italyan və türk məşqçilərin adları hallanır. Almaniya və Xorvatiya modelindən sonra hansı ölkənin baş məşqçisinin gətirilməsini istərdiniz?

- Şəxsən mən Azərbaycan futbolunu stil olaraq İspaniya futboluna yaxın hesab edirəm. Onlar kimi, bizdə də daha çox texniki futbola üstünlük verilir. Seçimi AFFA edəcək, əsas odur ki, komandaya xeyirli mütəxəssis olsun.

- İspaniyalı məşqçinin gəlişini arzulayırsınız?

- Sadəcə, öz fikrimi bildirdim. Əslində Robert Prosineçkinin qaytarılmasını istəyərdim. Son vaxtlar Rəşad Sadıqovun adı hallanır. Rəşad yaxşı seçim ola bilər. Çünki o, millinin, çempionatın içindən çıxan mütəxəssisdir. Hamı onun xarakterinə, xasiyyətinə bələddir. Tez münasibət qurmağı bacarır.

- Ancaq Rəşad Sadıqovun məşqçilik təcrübəsi, demək olar ki, yoxdur. Birdən-birə yığmaya gəlməklə özünü “yandırmaz”?

- Seçim onun üzərində olsa, qərarı yalnız Rəşad özü verə bilər. Riski, təhlükəni yalnız o özü gözə almalıdır. Sadıqovun uzaqgörənliyi var. Uşaqların ona böyük hörməti var. Yəqin ki, bir sözünü iki eləməzlər. Həmişə qarşısındakına başa düşəcək şəkildə izah etməyə çalışır. (Apasport.az)

Daha çox


Son xəbərlər
27.03.24  21:58

Keyn sağaldı