"Hamı görəcək ki, Azərbaycan böyük uğurlara qadirdir"

İyunun 24-ü Avropa Oyunlarının Kristal Zalda keçirilən  boks yarışında Azərbaycanın hesabına növbəti bürünc medalı Tayfur Əliyev yazdırdı. Milli Olimpiya Komitəsində  təşkil olunan növbəti “Zəfər günləri”nin qonağı olan idmançımız Qol.Az saytının bir neçə sualını cavablandırıb

- Tayfur, Avropa Oyunlarında bürünc medal qazanmaq böyük nailiyyətdir. Yarışlara necə hazırlaşırdın?

- Əslində yarışlara keçən ildən hazırlaşırdıq. Amma yanvar ayından etibarən daha ciddi məşq etməyə başadım. Son iki aydır ki, müxtəlif xarici ölkələrdə təlim-məşq toplanışlarında olurduq. Şükürlər olsun ki, bütün bunlar öz bəhrəsini verdi.

- Bu yarışın vətənimizdə keçirilməsinin sənin çıxışlarına müəyyən təsiri oldumu?

- Əlbəttə. Nəzərinizə çatdırım ki, azarkeş dəstəyi idmançının çıxışlarına təsir edən ən mühim amillərdən biridir. Sağolsunlar ki, həmvətənlərimiz bizi tək qoymadılar, arenalara gəldilər. Hər dəfə növbəti zərbə üçün əlimi qaldıranda alqış səsləri məni daha da ruhlandırırdı. Buna görə onlara minnətdaram. Təbii ki, bu yarış başqa ölkədə olsaydı, azarkeş dəstəyi belə çox ola bilməzdi.

- Çıxışlarından razı qaldınmı?

- Belə bir böyük idman tədbirində birinci dəfədir ki, iştirak edirdim. Bunu nəzərə alaraq çıxışımdan razı qaldım. Zənnimcə, nəticəm məşqçilərimi də qane elədi.

- Bəs çempion olmağına nələr mane oldu? Səhvlərin çox oldu yoxsa başqa amillər son çıxışına təsir göstərdi?

- Çempion ola bilmədimsə, deməli, səhvlərim oldu. Amma yəqin  ki, yarımfinalda həyəcan da özünü göstərdi. Çalışacam ki, 2017-ci ildə vətənimizin ev sahibliyi edəcəyi İslam Oyunlarına qədər səhvlərimi düzəldim, həyəcanı isə ümumiyyətlə özümdən uzaqlaşdırım.


- İlk Avropa Oyunlarında keçirdiyin görüşlərdə sənin üçün ən yaddaqalan döyüş hansı oldu?

- Yarımfinalda rusiyalı rəqiblə keçirdiyim döyüş. Zənnimcə, rəqibim ədalətsiz qələbə qazandı. Bütün görüş boyu o sadəcə məni yormağa və zədələməyə çalışırdı. Mərdliklə, açıq döyüşmürdü. Qarşılaşma başa çatandan sonra hakim tərəfindən rəqibimin əli qalxması məni təəccübləndirdi.

- O an hansı hissləri keçirdin?

- Təəccübləndim və məyus oldum. Amm nə demək olar, bu idmandı. İdmanda hər şeyə hazır olmalısan.

- Digər boksçularımızın çıxışları haqda nə deyə bilərsən?

- Bütün boksçularımızın çıxışlarından razı qaldım. Ümumilikdə 15 boksçumuzdan 11-i medal qazanıb. Bu çox yaxşı nəticədir.

- Səncə, ilk Avropa Oyunları başa çatdıqdan sonra Azərbaycan üçün nələr dəyişəcək?

- İlk növbədə ölkəmizdə idmanın kütləviliyi artacaq. Azərbaycan həmişə ön sıralarda olduğunu bir daha təsdiqləyəcək. Hamı görəcək ki, biz böyük uğurlara qadirik.

Kənan  NOVRUZOV