“Onların itirəcəyi heç nə yoxdur” - Ayxan Abbasov

Azərbaycan millisinin baş məşqçisi Ayxan Abbasov UEFA Millətlər Liqasının D Liqasının 2-ci qrupunda Lixtenşteynlə sabah keçiriləcək oyun barədə fikirlərini bölüşüb.

QOL.az xəbər verir ki, mütəxəssis Bakıda keçirilən mətbuat konfransında qələbənin vacibliyini vurğulayıb və rəqibin motivasiyalı olduğunu bildirib:

“Qrupda ikinci oyunumuzu keçirəcəyik. Əgər birinci yeri tutmaq istəyiriksə, qalib gəlməliyik. Rəqibi yaxşı tanıyırıq. Motivasiyalı komandadır, itirəcəyi heç nə yoxdur və mübarizə aparacaq. Onların müdafiəsini yarmağımız lazımdır. Qalib gəlmək istəyi ilə tələskənliyə yol versək, hər şeyi düzgün analiz etmədən və oyunumuzu doğru qurmadan meydana çıxsaq, çətinliklərlə üzləşə bilərik. İnanıram ki, futbolçularımız yaxşı oyun göstərəcək və qalib gələcəyik”.

- Heyətdə zədəli futbolçular var?

- Litva ilə oyundan sonra bir neçə futbolçumuzda xırda zədələr oldu. Ümid edirəm ki, bu gün məşqdə hamısı hazır olacaq. Amma Renat Dadaşovu itirmişik. Məlum oldu ki, bu oyunda bizə kömək edə bilməyəcək. Digər futbolçularda da kiçik zədələr var. Amma oynaya bilməyəcək qədər ciddi deyil. Hamı meydana çıxmaq istəyir. Bu da bizi sevindirir.

- Litvadakı matçdan sonra komandanın oyununda nə dəyişiklik etmək istəyirsiniz?

- Hər oyunda rəqibə uyğun analiz aparırıq. Bunlar fərqli komandalardır. Litva və Lixtenşteyn tamamilə fərqli futbol oynayır. Bu görüşdə onların müdafiəsini yarmaq və hücumlarımızı daha yaxşı başa çatdırmaq vacib olacaq. Artıq üç məşqdir bunun üzərində işləyirik. İnanıram ki, bizə lazım olan qolları vuracağıq. Rəqibin ən güclü tərəfi əks-hücumlardır.

- Avropada, dünyada zəif komanda yoxdur. Gözlənilməz vəziyyətə hazırsınız?

- Düz qeyd edirsiniz. Millilər arasında zəif rəqib olmur. Hamı xal qazana bilir. Biz hazırlıq dövründə də qeyd etmişdik ki, Millətlər Liqasında rəqiblərə qarşı çox hücum etməliyik, dominant oynamalıyıq. Bundan əvvəlki oyunlarda bu az idi. Çünki rəqiblər Fransa və Ukrayna idi.

- Sizcə, sabah azarkeşlər milliyə dəstək olacaq?

- Milliyə dəstək lazımdır. İnanıram ki, azarkeşlər stadiona gələcək. Futbolçular da bu stadionda oynamağı sevirlər. Ümid edirəm ki, azarkeşlər bizi dəstəkləyəcəklər.

- Zamiq Əliyev milliyə dəvət olunmayıb. Onunla bağlı fikriniz necədir? 

- Bütün futbolçular müsahibə verirlər və mən həmişə onları haqlı hesab edirəm. Hamı milli komandada oynamaq istəyir. Amma yəqin ki, Zamiq bizim onun bütün oyunlarını izlədiyimizi bilmir. Hər turun sonunda xaricdə çıxış edən futbolçuların oyunlarına baxıram. Zamiq də diqqətimizdədir. Hazırda onun mövqeyində Anton Krivotsyuk, Rəhman Daşdəmirov və Murad Xaçayev var. Onlara üstünlük vermişik. Amma bu, Zamiqdən razı olmadığımız anlamına gəlmir. Ola bilsin, sabah ona da dəvət göndərilsin. Onunla bağlı heç bir şəxsi problem yoxdur.

Xatırladaq ki, Azərbaycan - Lixtenşteyn matçı oktyabrın 1-də saat 20:00-da start götürəcək.

Bizi İnstaqramda izləmək üçün kliklə!