Azərbaycan Avropa Oyunlarında 17-ci qızıl medalını qazandı

"Bakı-2015" I Avropa Oyunlarında boks yarışları davam edir.

Qol.Az-ın məlumatına görə, bu gün həm yarımfinal, həm də final görüşləri keçirilib.

Azərbaycanın 6-sı kişi, biri qadın olmaqla 7 boksçusu rinqə çıxıb Bunlardan ikisi qızıl medal uğrunda yarışıb.

Qeyd edək ki, dünən boksçularımızdan Teymur Məmmədov finalda italiyalı Valentino Manfredoniaya qalib gələrək boks yığmamıza ilk qızıl medalı qazandırıb.




26 iyun

Kişilər

52 kq

Bu çəki dərəcsində mübarizə aparan Elvin Məmişzadə bu gün boks yığmamıza ikinci qızıl medalı qazandırıb. O, həlledici görüşdə italiyalı Vinçenzo Pikkardini ilə qarşılaşıb. Elvin Məmişzadə rəqibini 3:0 (30:27, 30:27, 30:27) hesabı ilə məğlub edərək qızıl medala sahib çıxıb. Bu, ölkəmizin "Bkı-2015"dəki 16-cı qızılı olub.

60 kq

Yığmamızın üzvü Albert Səlimov finala yüksəlmək uğrunda mübarizə aparıb. Onun rəqibi Sin Makkombu (İrlandiya) olub. Səlimov rəqibinə 3:0 (29:28; 30:27; 29:28) hesabı ilə qalib gələrək finala adlayıb. O, həlledici görüşdə fransalı Sofian Oumina döyüşəcək. Səlimovun rinqə sabah, saat 18:15-də çıxacağı gözlənilir.

64 kq

Qızıl medal uğrunda yarışan digər boksçumuz Lorenzo Sotomayor olb. O, həlledici görüşdə London Olimpiyadasının bürünc mükafatçısı Vinçenzo Manqiakapre (İtaliya) ilə qarşılaşıb. 3:0 hesabı ilə qalib gələn boksçumuz Azərbaycana 17-ci qızıl medalı qazandırıb.

69 kq

Millimizin qızıl medal ümidi olan Pərviz Bağırov yarımfinal döyüşünə çıxıb. O, finala gedən yolda böyük britaniyalı Joş Kelli ilə qarşılaşıb. Bu görüşdə rəqibini 3:0 (29:28; 30:27; 30:27) hesabı ilə məğlub edən boksçumuz finala yüksəlib. O, həlledici görüşdə Rusiya idmançısı Aleksandr Besputinlə üz-üzə gələcək. Döyüşün sabah, saat 18:45-də başlayacağı gözlənilir.

75 kq

Yığmamızın digər üzvü Xaybula Musalov da yarımfinal görüşündə qüvvəsini sınayıb. O, bu mərhələdə macarıstanlı Zoltan Harksa ilə münasibətlərinə aydınlıq gətirib. Bu görüşdə 2:1 (29:28, 29:28, 27:30) hesabı ilə qələbə qazanan Musalov finalda döyüşmək hüququ əldə edib. O, qızıl medal uğrunda görüşdə irlandiyalı Maykl O'Reilli ilə döyüşəcək. Görüşün sabah, saat 19:15-də başlayacağı gözlənilir.



91 kq

Bu çəki dərəcəsində ölkəmizi Abdulqadir Abdullayev təmsil edir. O, finala vəsiqə uğrunda rusiyalı Sadam Maqomedovlə döyüşüb. Hər üç raundda rəqibindən üstün olan 3:0 (29:28, 29:28, 29:28) Abdullayev finala yüksəlib. O, qızıl medal uğrunda yarışda ukraynalı Qevorq Manukyanla döyüşəcək. Erməni əsilli boksçu ilə döyüşün saat sabah, saat 19:45-də başlayacağı gözlənilir.

Qadınlar

60 kq

Qadınların yarışında mübarizəsini davam etdirən Yana Alekseyevna yarımfinal döyüşünə çıxıb. O, finala vəsiqə uğrunda London Olimpiadasının qalibi Keti Teylorla (İrlandiya) qarşılaşıb. Gərgin keçən döyüş rəqibin qələbəsi ilə başa çatıb - 1:2 (38:38!, 38:38!, 38!:38). Alekseyevna "Bakı-2015"i bürünc medalla başa vurub. Bu, boks yığmamızın qazandığı 5-ci medal olub.