“Biz gənclər daha əzmkar və mübariz oluruq” – “Qarabağ”ın futbolçusu

“Qarabağ”ın gənc futbolçusu Namiq Ələsgərov Qol.az saytına müsahibə verib.

- Artıq təlim-məşq toplanışını başa vurmusunuz. “Qarabağ”ı çempionata hazır hesab etmək olarmı?

- Hazırlıq prosesi yaxşı keçdi. Yoxlama oyunlarında nəticəyə önəm verməsək də, əsas məqsədimiz çatışmazlıqları görmək idi. Əlimizdən gələni etdik ki, çempionata yaxşı səviyyədə hazırlaşaq. Çünki rəqiblərimizdən bir neçə xal irəlidə olsaq da, bizi çətin mübarizə gözləyir. Nə dərəcədə hazır olduğumuz çempionat oyunlarında bilinəcək. İnanıram ki, yaxşı nəticələr qazanıb əziyyətimizin bəhrəsini görəcəyik.

- “Qarabağ”dan üçüncü dövrədə əvvəlkindən fərqli nə görə biləcəyik.

- Komandamız çempionatın ilk yarısında eyni zamanda Avropa Liqasında da mübarizə aparırdı.  Son oyunumuzda hakimin ədalətsiz qərarı psixoloji durumumuza təsir etmişdi. Ona görə toparlanmağımız bir az çətin oldu. Amma indi artıq deyə bilərik  ki,“Qarabağ” çempionata həm fiziki, həm də psixoloji baxımdan tam hazırdır. Hədəfimiz Premyer Liqada bütün oyunlarda qalib gəlib çempion olmaqdır.

- Klublarımızdan bir çoxunun heyətində dəyişikliklər oldu. Bəzi klublar heyətini gücləndirdi, bəziləri gənc futbolçulara üstünlük verdi.

- Bəli, komandalarda baş verən dəyişikliklər haqqında məlumatımız var. Əsas rəqiblərimizdən olan  “İnter” və “Qəbələ” yaxşı əcnəbi futbolçular transfer ediblər. “Neftçi”  isə heyətini perspektivli  yerli futbolçularla gücləndirib. Bu komandaların bizə çətinlik yaradacağına əminik. Ona görə də hazırlığımızı yüksək səviyyədə apardıq ki, problemlərin öhdəsindən gələ bilək. “Xəzər Lənkəran” gənc futbolçulara üstünlük versə də, onların  yaxşı mübarizə aparacağını bilirik. Çünki mən də gənc futbolçuyam. Bilirəm ki, bizim yaşda olanlar daha əzmkar və mübariz olurlar.

-  Üçüncü dövrənin ilk turunda əsas rəqiblərinizin xal itirməsi sizin işinizə yarayacaqmı?

- Əslində biz rəqiblərimizin nəticələrinə ümid bağlayıb oynamırıq. Önəmli olan öz oyunlarımızdı. Amma yenə də onların xal itirməsi bizim işimizi  asanlaşdırır, çempionluq şanslarımızı çoxaldır. 
“Qarabağ”ın mübarizə əzmi heç vaxt bitməyəcək. Çalışacağıq, maksimum xal fərqi ilə çempion olaq.

- Qış fasiləsində “Qarabağ”da transfer etməməsi sənin əsas heyətdə möhkəmlənməyin üçün bir şans ola bilərmi ?

- Bu haqda heç nə deyə bilmərəm. Amma hər halda bu, mənim üçün fürsətdir. Çünki özümü sübut etmək baxımdan indi daha çox şansım olacaq. Çempionatın gedişində yaxşı oyun sərgiləyib əsas heyətə düşməyə çalışacam.

- Növbəti turda sabiq klubun “Bakı”ya qarşı oynayacaqsınız.

- Düzdü, “Bakı” məni yetişdirən klubdur. Onlara çox şey borcluyam. Çempionatın ilk yarısında onlara qarşı oynaya bilmədim. Amma indi bunu çox istəyirəm.

- “Bakı”nın hazırkı durumu sənə necə təsir edir?

- Bu vəziyyət məni çox üzür. İstərdim “Bakı” hər zamankı mübariz və çempionluğa oynayan bir klub olsun. Hafiz Məmmədov Azərbaycan futbolu üçün yaxşı işlər görüb. Klubun belə durumda olması ürəkaçan deyil.

- Milli komandamızın baş məşqçisi Ropert Prosineçki deyib ki, Namiq Ələsgərov Azərbaycanda yetişən ən yaxş gənc futbolçulardan biridir.

-  Robert Prosineçkini yaxından tanımıram, ancaq futbolçu karyerası haqqında məlumatım var . Oyunlarımızı izlədiyini görmüşəm. Deyilənə görə, gənc futbolçulara üstünlük verir. Onun mənim haqda fikirləri barədə ilk dəfədir sizdən eşidirəm. Əgər belə söyləyibsə, bu, mənim üçün çox sevindirici bir haldir.

- O həmçinin sənə milli komandada şans verəcəyini söyləyib.

- Milli komandada oynamaq hər bir futbolçunun arzusudur. Əgər məni dəvət etsə, çalışacam onun ümidlərini doğruldum. Yığmamız üçün əlimdən gələni heç vaxt əsirgəmərəm.

Ergün SEYİD