“Qol vursaydım, mənə bu iradları tutmazdılar” – Reynaldo

“Qarabağ”ın brazilyalı hücumçusu Reynaldo Silva Qol.Az saytının Antalyaya ezam olunmuş əməkdaşına müsahibə verib.

- İlk öncə Antalyadakı hazırlıq prosesi barədə danışmağını istərdim.

- Antalyadakı düşərgəmizdə ab-hava əladır. Hər şey istədiyimiz kimi davam edir. Məşqlərdə əlimdən gələni edib, formamı bərpa etməyə çalışıram. Əsas məqsədim milli çempionatda özümü ən yaxşı səviyyədə göstərməkdir.

- Artıq zədəni sağaltdığını nəzərə alsaq Premyer liqanın 3-cü dövrəsi üçün nə düşünürsən ?

- Çox sevinirəm ki, zədədən sonra meydana döndüyüm ilk oyunda (İsveçrə “Sürix”i ilə yoxlama oyunu (1:1) nəzərdə tutulur – red.) qol vurmağı bacardım. Hazırlıq prosesində və yoxlama matçlarında da çalışıram ki, keçən ilki formama yaxınlaşım. Məqsədim yenə də ən yaxşı oyunlarımı sərgiləyib çempion olmaqdır.

- “Qarabağ”ın Avropa Liqadasındakı vacib  oyunlarını kənardan izləmək sənə necə təsir göstərirdi?

- Təbii ki, komandamın yanında ola bilməmək məni məyus edirdi. Amma komanda yoldaşlarım yaxşı oyun sərgilədilər. Buna görə onları təbrik etmək lazımdır. Təəssüf ki, hakimin bir səhvi bizim növbəti mərhələyə çıxmağımıza mane oldu. Oynaya bilməyib ən çox üzüldüyüm qarşılaşma da “İnter”lə Bakıdakı Avroliqa matçı oldu. Bu oyunda stadionda çox gözəl atmosfer vardı. Həm də bu, komandamızın ən vacib matçı idi.

- Bəzi qarşılaşmalarda ötürmə etməyib, fərdi oyuna üstünlük verməyin azarkeşlərin narazılığına səbəb olur.

- Mən həmin epizodlarda qol vursaydım, heç kim bu iradları tutmazdı. Amma oyun ərzində hər şey elə sürətli baş verir ki, yanında kimin olub-olmadığını görə bilmirsən. Bizim əsas məqsədimiz qapıçı ilə üz-üzə gələndə qol vurmaqdır. Lakin həmişə hər şey sənin istədiyin kimi alınmır.

- Qarşına qoyduğun hədəflər nədən ibarətdir?

- Əsas məqsədim komandamın yenə çempion olmasıdır. Təbii ki, hücumçu olaraq özümü yaxşı tərəfdən göstərmək və vurduğum qollarla bu yolda klubuma kömək etmək istəyirəm. Yenə də ən önəmlisi “Qarabağ”ın uğurlarıdır.

- Bu mövsümün Avroliqanın qrup oyunlarına qədər Azərbaycana gəlmiş ən səviyyəli hücumçulardan biri hesab olunurdun. Ancaq qolçuluq bacarığını qitə miqyaslı yarışda nümayiş etdirə bilmədin.

- Mənə elə gəlir ki, çox da geriləməmişəm. Əvvəlki kimi yenə də özümü yaxşı tərəflərdən göstərə bilirəm. Vacib oyunlarda qol vurmağı bacarmışam. Doğrudur, Avropa Liqasında qol vura bilmədim. Bu da hər bir futbolçunun karyerasında ola bilər. Çalışacam ki, səhvlərimi düzəldib vurduğum qollarla azarkeşləri sevindirim.

- Azərbaycan milli komandasında oynamaq firkin qalırmı?

- Ən böyük hədəfim “Qarabağ”da yaxşı oyun sərgiləməkdir. Öncə komandamın uğurları üçün çalışmalıyam ki, hamının etimadını doğruldum. Bundan sonra hamı razılığa gəlsə, Azərbaycan milli komandasında oynamaq istəyərəm. Belə təkliflərin olması mənə əlavə stimul verir.

- Heç olubmu ki, karyeranı “Qarabağ”da bitirmək haqda düşünəsən?

- “Qarabağ” mənə zamanında qucaq açmış komandadır. Hər şey əvvəlki kimi getsə və davamlı yaxşı oyun sərgiləyə bilsəm, qalmaq istəyərəm. Əsas odur ki, komandanın mənə olan münasibəti hər zaman belə qalsın. Bunun üçün də gərək hər zaman yaxşı oyun sərgiləyəm.

- “Qarabağ”ın qazandığı uğurlardan sonra komandadan istəklər artacaq. Bu məsulliyəti öz üzərində hiss edirsən?

- Bizdən gözləntilər həmişə böyük olub. Biz də bu məsuliyyəti hiss edirik. Çalışacağıq ki, azarkeşlərin etimadını doğruldaq.

Ergün SEYİD,
Antalya