“İnter” əsas heyətlə gəlsəydi, “Qarabağ” üçün daha yaxşı olardı”

U-19 millimizin sabiq baş məşqçisi, veteran futbolçu  Vəli Qasımov Qol.Az saytına müsahibəsində “Qarabağ”ın dekabrın 11–də Avropa Liqasının qrup mərhələsində İtaliya “İnter”i ilə qarşılaşacağı oyun və milli komandamız haqda sualları cavablandırıb.

- “Qarabağ”ın “İnter”lə oyununda nə gözləyirsiniz?

-“Qarabağ” həm Avropa Liqasında, həm də ölkə çempionatında özünü yaxşı tərəfdən göstərir. “İnter”lə oyun isə bu günə qədərki  matçlardan ən vacibidir. Məncə, “İnter” cütün favoritidir. Ancaq “Qarabağ” da qalib gələ bilər. Hər halda komandamızdan yaxşı nəticə gözləyirəm.

- İtaliya mətbuatı “İnter”in Bakıya əsas heyətlə gəlməyəciyini yazıb. Bu, “Qarabağ”ın işinə yaraya bilər?

-  Düşünürəm ki, “İnter” əsas heyətlə Bakıya gəlsə, “Qarabağ” üçün daha yaxşı olardı. Çünki Mançininin komandası artıq qrup lideri kimi “pley-off”a vəsiqəni təmin edib. Belə olan halda  “İnter”in əsas futbolçuları Bakıdakı oyunda meydana rahat çıxardı. Ancaq gənclərə şans verilsə, onlar özlərini ən yaxşı tərəfdən göstərməyə çalışacaqlar. Bununla da, “Qarabağ”a çox çətin olacaq. Əgər komandamız “İnter”ə qalib gələ bilməsə də, buna təəssüflənmək lazım deyil. Çünki qrup mərhələsinə vəsiqə qazanmağı və göstərdiyi oyunlar artıq “Qarabağ” üçün böyük uğurdur.

- Komandamızın “pley-off”a yüksəlmək şansını necə qiymətləndirirsiniz?

- Sevindirici haldır ki, “Qarabağ”ın taleyi öz əlindədir. Yəni qalib gəlməklə, “pley-off”a yüksələ bilər. Yəqin ki, komandamız meydana yalnız qələbə üçün çıxacaq. Hamımız istəyirik ki, “Qarabağ” qrupa düşdüyü elə ilk ilində böyük uğurlara doğru getsin.

- “Qarabağ”ın Reynaldo, Çumbinyo və Dias kimi futbolçuları “İnter”lə görüşü buraxacaq.

- “Qarabağ” kollektiv oyun nümayiş etdirir.  Düzdür, zədəlilərin hər biri vacib futbolçulardır. Ancaq “Qarabağ”ın oyun sistemi elədir ki, hər bir futbolçunu əvəzləyə bilirlər. Məncə, braziliyalı oyunçuların yoxluğu “Qarabağ”a problem yaratmayacaq.

- Bir qədər də milli komandamızda son baş verənlər haqda danışaq.
Həmişə millimizi yerli mütəxəssislərin çalışdırmasını istəmisiniz. Prosineçkinin təyinatına münasibətiniz necədir?

- Düzdür, həmişə istəmişəm ki, millimizi azərbaycanlı məşqçilər çalışdırsın. Ancaq gördüyünüz kimi, bunu etmədilər. Yenə də əcnəbi məşqçiyə güvəndilər. Amma Prosineçkinin təyinatının  müsbət tərəfləri  var. O, cavandır, hiss olunur ki, həvəslidir. İnanıram ki, milliyə xeyri dəyə bilər. Ən azından Prosineçki Foqtsdan daha faydalı olar. Foqtsun dövründə seçmə mərhələlərdə xal toplaya bilsək də, oyunumuz yox idi. Həmişə bildirmişəm ki, qazanılan xallara yox, oyuna fikir vermək lazımdır. Bundan əlavə futbolumuzun gələcəyini düşünmək lazımıdr. Bunun üçün gənc futbolçulara şans vermək lazımdır.

- Prosineçki Azərbaycan futbolu haqda o qədər də məlumatlı deyil. Yerli mütəxəssis kimi ona hansı tövsiyələriniz var?

- İlk növbədə Azərbaycan futbolunun gələcəyi üçün işlər görmək lazımdır. U-21 və U-19 komandalarına diqqət edilməli, oradan  futbolçular seçilməlidir.  Sonra tədricən komandanı qurmaq olar. Oyun sisteminə gəldikdə isə bunu baş məşqçi özü müəyyənləşdirəcək. İnanmıram ki, bir daha Foqtsun sisteminə qayıdaq. Qeyd etdiyim kimi, Prosineçki cavan məşqçidir. Bu isə ona imkan verir ki, futbolumuza yenilik gətirsin. Hiss olunur ki, Prosineçki millidə gənclərə yer verəcək.

Ramiq AĞAMƏMMƏDOV