“Onların halına acıyıram” – Tərlan Əhmədov

AZAL klubunun baş məşqçisi Tərlan Əhmədovun Qol.Az saytına müsahibəsi

- Əvvəlcə, millimiz “Avro-2016”nın seçmə mərhələsində Bakıda Norveçə uduzduğu oyun (0:1) haqda fikirlərinizi öyrənmək istərdik.

- Hiss olunur ki, futbolçularımız Xorvatiya məğlubiyyətindən (0:6) sonra hələ də özlərinə gələ bilməyibər. Sanki sıxılırdılar. Düzdür, o qədər də pis oynamadılar, topa sahib oldular, qol epizodlarımız da oldu. Ancaq istər-istəməz futbolçularda hələ psixoloji travma qalıb. Digər amillər də var ki, millimizin oyununa təsir etdi. Hər halda seçmə mərhələnin ardıcıl dörd oyununda məğlub olmaq xoşagəlməz haldır. Bununla belə, gələcəyə ümidlə baxmaq lazımıdır.

 - Sanki futbolçularımızda istək yox idi.

- Bəli, daha əzmkar bir komanda gözləyirdik. Futbolçuların üzərində təzyiq həddən artıq çox idi. Bəlkə də onlar düşünürdülər ki, millinin baş məşqçisi olacaq şəxs matçı stadiondan izləyir. Bunların hamısı oyuna təsir edən amillərdir. Oyunda  əzmkarlığın göstərmək ən vacib şərtdir.  Bunsuz nəticə qazanmaq olmaz.

- AZAL-da işlər necə gedir, çempionatda yaranan fasilədən necə istifadə edirsiniz?

- Hər şey öz qaydasındadır. Fasilədən səmərəli istifadə edirik. İki yoldaşlıq oyunu keçirdik. “Xəzər Lənkəran” və əvəzedici komandamızla qarşılaşdıq. Müəyyən çatışmazlıqları aradan qaldırmışıq. Sabah “Qəbələ” ilə görüşümüz var. Həmin oyunda nəyi düz, nəyi səhv etdiyimizi biləcəyik.

- AZAL hazırda turnir cədvəlinIN 9-cu pilləsində qərarlaşıb və ən çox qol buraxan komandalardandır. Demək olarmı müdafiədə olan probelmlərə görə komandanız bu yerdədir?

-Hər dəfə futbolçularla söhbətimdə bu barədə danışıram. Müdafiəmizdə problem var. Tək müdafi xəttindən və ya qapıçıdan söhbət getmir. Ümumilikdə komanda şəklində daha düzgün müdafiə olunmaq lazımdır.  Hələ ki, komandamız kompakt şəkildə müdafiə qura bilmir. Oyunları çoxunda bu problemlə üzləşmişik. Hərdən elə olur ki, iki top fərqi ilə irəlidə olsaq da, sonradan qapımızdan qollar buraxırıq və qələbəni əldən veririk. Fasilə zamanı bu məsələnin üzərində xeyli işlədik. İnanıram ki, bu problem aradan qaldırılacaq.

- “Araz Naxçıvan” çempionatı tərk etməklə bir çox komandalara zərbə vurdu. Naxçıvan klubunun bu qərarına münasibətinz necədir?

- “Araz Naxçıvan”ın bu qərarı mənə çox pis təsir etdi. Hər halda futbolun inkişafından danışırıqsa, belə halların olmaması daha yaxşı olardı. Bu, çempionatımıza da böyük təsir edəcək. Çalışırdıq ki, oyunların sayı artırılsın, futbolçuların oyun təcrübəsi, fiziki hazırlığı yüksək olsun. Premyer Liqada mübarizəyə qoşulub, mövsümün yarısı olmamış çempionatı tərk etmək xoşagəlməz haldır. Ən çox “Araz Naxçıvan”ın futbolçularının halına acıyıram. Onların bəziləri özünə yeni klub tapa bilməyəcək. Klub belə bir addımı atanda fikirləşməlidir ki, kimlərə zərbə dəyə bilər, kimləri nədən məhrum edə bilərlər? Yeniyetmə futbolçuları da düşünmək lazım idi.  Bizim də bir xalımız silindi. Ancaq  mən buna fikir vermirəm.  Nəticəyə mövsümün  sonunda baxmaq lazımdır.

- “Araz Naxçıvan”ın qapıçısı Kamal Bayramovun AZAL-a keçəcəyi deyilir.

- Hələ ki, konkret bir şey yoxdur. Ancaq Kamalla söhbətimiz olub. Ola bilər ki, razılaşdıq. Cəmi bir dəfə onunla söhbətimiz olub.

- “Qarabağ”dan icarəyə götürüdüyünüz Təmkin Xəlilzadə və Eltun Yaqublunun müqaviləsi dekabrda başa çatacaq. Onlara yeni müqavilə təklif etmək fikriniz var?

- Hələ ki, dəyişiklik etmək fikrində deyilik. Dekabrın sonlarında  götür-qoy edəcəyik ki, görək bizə kimlərin xeyiri dəyib, kimlər daha çox xeyir verə bilər. Bu gün kimlərin gedəcəyi tam bəlli deyil.

Ramiq AĞAMƏMMƏDOV