Açıqlaması gərginliyə səbəb oldu - "Liverpul"da qalmaqal

Açıqlaması gərginliyə səbəb oldu - "Liverpul"da qalmaqal
DÜNYA FUTBOLU 8 Dekabr 2025 / 13:48 767
-  A +

“Liverpul”un futbolçusu Məhəmməd Salah Çempionlar Liqasının Liqa mərhələsinin 6-cı turunda “İnter”ə qarşı keçiriləcək oyunu buraxa bilər. 

QOL.az xəbər verir ki, bu haqda "Daily Mail” məlumat yayıb. Qeyd edilir ki, misirli hücumçunun klub və baş məşqçi Arne Slotla bağlı tənqidləri Mersisayd təmsilçisində narazılığa səbəb olub.

İnsayder Fabritsio Romano isə klub daxilində məsələ ilə bağlı müzakirələrin davam etdiyini bildirib. Onun sözlərinə görə, Salahın “İnter”lə qarşılaşmaya aparılıb-aparılmayacağı ilə bağlı qərar günün sonuna qədər veriləcək.

Arne Slotun bu gün keçirəcəyi mətbuat konfransında məsələyə aydınlıq gətirməsi gözlənilir.

Qeyd edək ki, Salah hadisə ilə bağlı açıqlamaları İngiltərə Premyer Liqasının 15-ci turunda “Lids”lə 3:3 hesablı oyundan sonra demişdi.

Salah nə demişdi?

Həmin matçdan sonra o bildirib: “Sadəcə inana bilmirdim ki, bütün 90 dəqiqəni ehtiyatda keçirdim. Bu artıq üçüncü dəfədir. Deyəsən, bu, mənimlə ilk dəfə baş verir.

Çox məyus olmuşam. Bu illər ərzində, xüsusilə də ötən mövsüm klub üçün çox iş görmüşəm. İndi isə mənə elə gəlir ki, klub məni sadəcə gözünün önündən atıb. Mən özümü məhz belə hiss edirəm. Kimsə istəyir ki, bütün günah mənim üzərimə düşsün. Yayda klub mənə çox şey vəd etmişdi. İndi isə ehtiyatdayam və buna görə də deyə bilərəm ki, verdikləri sözə əməl etməyiblər.

Əvvəllər mənimlə Slot arasında yaxşı münasibətlər vardı. İndi isə heç bir münasibət yoxdur və bunun səbəbini belə anlamıram. Elə bil kimsə məni klubda görmək istəmir”.


Son xəbərlər