“Düşünürəm ki, uşaq-idman məktəblərinin sayı artırılmalıdır”

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

Uşaqlar, yeniyetmələr və gənclər arasında idmanın təbliği ilə bağlı layihəmiz davam edir. Layihə çərçivəsində növbəti həmsöhbətimiz Bakıdakı 106 nömrəli tam orta məktəbin fiziki tərbiyə müəllimi, 1-ci və 2-ci Qarabağ müharibəsinin iştirakçısı Saleh Şirinov oldu.

- Saleh bəy, neçə ildir fiziki tərbiyə müəllimi olaraq çalışırsınız? 

- Əvvəlcə qeyd edim ki, Azərbaycan İdman Akademiyasının məzunuyam. 30 ildir ki, fiziki tərbiyə müəllimi kimi fəaliyyət göstərirəm. 

- 1 aydır, yeni tədris ili başlayıb. Ümumilikdə orta məktəblərdə fiziki tərbiyə fənninin keyfiyyətini necə qiymətləndirirsiniz?

- Məktəblərdə fiziki tərbiyə fənninin keyfiyyətini qənaetbəxş hesab etmək olar. Nəzərə almalıyıq ki, şagirdləri bu fənni sevir, aktiv iştirak edirlər. Bu da fiziki tərbiyə dərslərinin keyfiyyətini daha da artırır. 

- Bəs, fiziki tərbiyə müəllimləri dərsləri hansı səviyyədə, necə aparırlar?

- Təlimatlara uyğun tədris prosesi həyata keçirilir. Dərslər fiziki tərbiyə fənni üçün təyin edilən meyarlara uyğun aparılır. 

- ⁠Uşaqların diqqətini cəlb etmək, onları əyləndirmək üçün hansı işlər görülür?  

- Sağlam bədəndə sağlam ruh olar - biz bu şüarla addımlayırıq. Uşaqların dərslərə marağı yüksək səviyyədədir. Buna baxmayaraq, onları həvəsləndirmək üçün müəyyən addımlar atırıq. İstər normativlər, istər məşqlər, istərsə də oyunlar şagirdlər tərəfindən maraqla qarşılanır. 

- ⁠Ümumilikdə orta məktəblərdə idman zallarının, meydançaların durumu qənaətbəxşdirmi? 

- Bir-iki məktəbi çıxmaq şərti ilə, məktəblərin idman infrastrukturunu qənaetbəxş hesab etmək olar. 106 nömrəli tam orta məktəbin idman zalı və meydançaları bütün növ infrastruktur və təchizatlarla təmin edilib. Fiziki tərbiyə fənnini tədris etmək üçün hər bir şərait qurulub. 

- Məktəblilər hansı idman yarışlarında iştirak edirlər? 

- Uşaqlar müxtəlif yarışlara qatılırlar. Futbol, futzal, voleybol, basketbol, qol güləşi və s. idman növləri üzrə qüvvələrini sınayırlar.  

- ⁠Dərs keçdiyiniz, gördüyünüz uşaqlar arasında, yəqin ki, istedadlı uşaqlar çoxdur. Onlar daha çox hansı idman növünə maraq göstərirlər?

- Bəli, düz vurğuladınız. İstedadlı uşaqlar var. Onlar daha çox futbola və güləşə maraq göstərirlər. 

- ⁠Sizcə, ölkədə yeniyetmələr və məktəblilər arasında idmanın səviyyəsini artırmaq üçün hansı addımlar atılmalıdır? 

- Müxtəlif yolları sınamaq olar. Düşünürəm ki, uşaq-idman məktəblərinin sayı artırılmalıdır. Bu yolla uşaqları idmana daha asan cəlb etmək olar. 

- Bəs, uşaqları pis vərdişlərdən uzaqlaşdırmaq, təhsilə və idmana bağlamaq üçün hansı layihələri həyata keçirmək olar?

- Məktəbimizdə bu qəlibdən tədbirlər həyata keçirilir. İstər məktəb rəhbərliyi, istərsə də müəllimlə şagirdlərlə tez-tez maarifləndirici tədbirlər həyata keçirirlər. Müxtəlif söhbətlər aparılır. Şagirdləri pis vərdişlərdən uzaq tutmağa çalışırıq. 

- Şagirdlərinizə idmanla məşğul olmaq üçün necə motivasiya verirsiniz?

- İdmanda böyük uğur qazanmış idmançıları məktəbə dəvət edirik, onlar öz uğurları və həyatı haqqında maraqlı fikirlər bildirirlər. Bu, uşaqlara motivasiya verir. 

- Hələ də bəzi valideynlər idmanın qız üçün olmadığını düşünür və qızlarını idmandan uzaq tuturlar. Buradan onlara nə demək istəyərsiniz?

- İdman həm oğlanlar, həm qızlar üçündür. Əvvəla uğur qazanmazdan öncə bunun qızlarımızın sağlamlığına müsbət təsir edəcəyini bildirmək istərdim. Ölkəmizə ilk Olimpiya qızılını məhz xanım idmançının Zemfira Meftahətdinovanın qazandırması, Mariya Stadnikin dördqat Olimpiya mükafatçısı olması, Lamiyə Vəliyevanın ikiqat Paralimpiya çempionu olması və başqa məqamlar sübut edir ki, idman hər kəs üçündür.

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub