"Avrokubok matçımızı Masazırda oynamaq istəyirik" - “Sabah”ın kapitanı

“Sabah” klubunun kapitanı Elvin Camalovun Qol.az saytına müsahibəsi

- Misli Premyer Liqasının 30-cu turunda lider “Qarabağ”a qalib gəldiniz. Bu, “Sabah”ın tarixində “Qarabağ” üzərində ilk qələbəsidir. Əvvəlcə bu oyunla bağlı fikirlərini bilmək istərdik.

- Çox şükür ki, 3 xalı əldə etdik. Vacib qələbə idi. Əslində hər oyun bizim üçün vacibdir. Liderə qalib gəlmək isə daha yaxşı oldu. Komanda olaraq yaxşı oyun göstərdik. Ümumiyyətlə, azarkeşlərin baxımlı oyun izlədiyini düşünürəm. Çalışacağıq ki, qələbə seriyasını davam etdirək.

- Bu qələbə bəlkə də, yeni mövsümün anonsu oldu. Necə düşünürsən?

- Bizim əsas məqsədimiz oyundan-oyuna inkişaf etməkdir. Bu mövsüm də bunun şahidi oluruq. Əlbəttə, gələn mövsüm daha da inkişaf etmək istəyirik. Tədricən inkişaf etmək üçün özümüzə bir yol seçmişik. Bu yolda inamla addımlamağa çalışırıq. Hələ ki, fikirlərimiz bu mövsümdədir. Təbii ki, gələn mövsüm daha yaxşı “Sabah” olmaq üçün planlarımız var.

- Bu mövsüm “Qarabağ”la 4 oyun keçirdiniz. Həm hesabda, həm də top fərqində bərabərlik var. Son oyunlarda da başabaş mübarizənin şahidi oluruq. Bu rəqiblə indiyə qədər olan və bundan sonrakı mübarizənizi necə görürsən?

- “Qarabağ”la həm ötən, həm də bu mövsüm keçirdiyimiz bütün oyunlar maraqlı alınıb. Azarkeşlər çox baxımlı futbol izləyiblər. Məncə, oyunlarımızdan həzz alıblar. “Qarabağ”ın gücü gücü, səviyyəsi göz qabağındadır. Çox şadam ki, “Qarabağ”la başabaş mübaizə aparmışıq və indi də bunu davam etdiririk. Son oyunda qalib gəlməyimiz isə ayrıca bir sevincdir. 

- “Qarabağ”la oyunda meydana çıxmamağın zədə ilə bağlı idi?

- Bəli, oyuna 3 gün qalmış ayağımda ağır hiss etdim. MRT müayinəsindən keçəndə bilindi ki, yüngül zədə var. Baş məşqçimiz buna görə risk etməməyi daha məqsədəuyğun saydı. Ancaq zədəm elə də ciddi deyil. Qarşıdakı oyunlara hazırlaşıram. 

- Qarşıdan “Turan Tovuz”la səfər matçı gəlir...

- Rəqibimiz bir neçə oyundur ki, qalib gələ bilmir. Öz meydanlarında qələbə qazanmağa çalışacaqlar. Buna görə də bizi çətin oyun gözlədiyini deyə bilərik. Artıq “Qarabağ”la oyunu unudub, bu görüşə köklənməliyik. Tovuz səfərimiz həmişə ağır olur. Çox güman ki, bu dəfə də elə olacaq. Amma əlimizdən gələni edəcəyik ki, 3 xalı biz qazanaq.

- Avrokuboklarda debüt ilində  “Sabah”dan nə gözləmək olar? 

- Hələ çempionatın bitməsinə 6 tur qalıb. Ona görə də qarşıdakı oyunları düşünməliyik. Bu görüşlərin hamısında 3 xal qazanmağa köklənməliyik. Yəni indi əsas məqsəd mövsümü yaxşı tamamlamaqdır. Bəli, artıq avrokuboklara vəsiqəni təmin etmişik. Təbii ki, buna görə də çox xoşbəxtik. Ümid edir və inanıram ki, avrokuboklarda yaxşı nəticə qazanacağıq və azarkeşlərimizi sevindirəcəyik. 

- İndiyə qədər bir neçə məşqçi ilə işləmisən. Rusiyalı baş məşqçiniz Murad Musayevin hansı fərqli xüsusiyyətləri var? 

- Murad Musayev həqiqətən həm yaxşı insan, həm də peşəkardır. Nəinki mənə, bütün komandaya onunla işləmək çox xoşdur. Ümid edirəm ki, Murad Musayevlə daha yaxşı uğurlara imza atacağıq.  İndiyə qədər işlədiyim məşqçiləri müqayisə etmək istəməzdim. Çünki hər birinin özünəməxsus müsbət keyfiyyətləri var. 

- Musayevin bəzən oyunlarda çox aqressiv olduğunu görürük. Elə “Qarabağ”la matçınızda da cəzalı durumda olduğundan texniki zonada yer almamışdı. Bilmək istərdim ki, futbolçularla münasibəti necə qurub?  Çox tələbkardır?

 - Bəli, Musayev tələbkar məşqçidir. Bu tələb bizim özümüzü daha çox inkişaf etdirməymizə, komandanın daha yaxş olmasına hesablanıb. Komandada hər birimiz bu tələbkarlığın peşəkarlıqdan qaynaqlandığını və bizim xeyrimizə olduğunu bilirik. Ona görə də daha səylə çalışırıq və səhvlərimizdən nəticə çıxara bilirik. Biz onun tələbkarlığının xeyrini görürük. 

- Avrokuboklarda ev oyununu harada keçirəcəyiniz hələlik bəlli deyil. Yəqin ki, azarkeş baxımından Masazırda oynamaq sizə daha uyğundur.

- Təbii ki, biz oyunlarımızı öz doğma meydanımızda keçirmək istəyirik. Çünki orada azarkeşlərimizin dəstəyini daha çox hiss edirik. Düzdür, bizim səfər oyunlarımıza da gəlirlər. Ev oyunlarında isə azarkeşlərimiz möhtəşəm olur. Biz o azarkeşlərin qarşısında, Masazırda oynamaq istəyirik. Ümid edirəm ki, belə də olacaq. Fürsətdən istifadə edib azarkeşlərimizə təşəkkürmü bildirirəm ki, bizə bu mövsüm yaxşı dəsək olublar. Ümid edirəm ki, qalibiyyətlərimizin ardı gəldikcə onlar daha çox yanımızda olacaqlar. 

Ramiq Ağaməmmədov