"Bakı-2015": Güləşçimizdən qızıl medal

"Bakı-2015" I Avropa Oyunlarında sərbəst güləş üzrə qadınların mübarizəsi davam edir.

Qol.Az-ın məlumatına görə, ikinci oyun günündə daha 4 güləşçimiz dörd çəki dərəcəsində (53, 58, 63, 75) yarışıblar.

Qeyd edək ki, ötən gün mübarizəyə qoşulan 4 güləşçimizdən ikisi yarışı medalla başa vurub. 48 kq çəki dərəcəsində Mariya Stadnik qızıl, 55 kq çəki dərəcəsində Natalya Sinişin isə bürünc medallara sahib çıxıb.

53 kq

Qadın güləşçilərin 53 kq çəki dərəcəsində mübarizə aparan Azərbaycan təmsilçisi Anjela Doroqan 1/8 finalda türkiyəli Mərvə Kəngərlə qarşılaşıb. Güləşçimiz  8:2 hesabı ilə qalib gələrək növbəti mərhələyə yüksəlib. O, 1/4 finalda Mersedes Denislə (Macarıstan) üzərində təmiz qələbə (4:0) qazanaraq yarımfinala yüksəlib. A.Doroqan yarımfinalda rumıniyalı Natalya Buduna vaxtından əvvəl  təmiz qələbə (7:2) ilə qalib gəlib. Güləşçimiz finalda polşalı Roksana Zasina ilə qarşılaşıb. 3:2 hesabı ilə qalib gələn A.Doroqan qızıl medalın sahibi olub. Bununla da Azərbaycan Avropa Oyunlarında 8-ci qızıl medalını qazanıb

58 kq

Xalça üzərinə ilk olaraq 58 kq çəki dərəcəsində yarışacaq İrina Netreba çıxıb. Milliləşdirilmiş güləşçimiz ilk döyüşündə italiyalı Raynero Karola ilə qarşılaşıb və 8:4 hesabı ilə qalib gəlib. O, 1/4 finalda Mimi Xristova (Bolqarıstan) ilə güləşib və 6:4 hesabı ilə qalib gələrək yarımfinala yüksəlib. İ.Netreba yarımfinalda macarıstanlı Emese Barkana 2:5 hesabı ilə uduzub. Lakin güləşçimizin bürünc medal qazanmaq şansı var. İ.Netreba bürünc medal uğrunda yarışda norveçli Qreys Bullenlə güləşib. Bu görüşdə idmançımız vaxtından əvvəl məğlub (0:4) olub.
63 kq

63 kq çəki dərəcəsində yarışacaq təmsilçimiz Elmira Qəmbərova 1/8 finalda isveçli Yohanson Henna ilə üz-üzə gəlib. Bu görüşdə Yohansson vaxtından əvvəl təmiz qələbə (4:0) qazanıb. O, finala yüksələ bilmədiyi üçün  E. Qəmbərova təsəlliverici görüşlərə qatıla bilməyib.  

75 kq

75 çəki dərəcəsində ölkəmizi Gözəl Zutova təmsil edib. Mübarizəyə 1/8 finaldan qoşulan güləşçimiz ilk döyüşündə ukraynalı Oksana Vaşukla qarşılaşıb və  2:4 hesabı ilə uduzub. Vaşukova da finala çıxa bilmədiyinə görə G.Zutuova bürünc medal qazanmaq şansını  itirib.