Azərbaycan klubları avrokuboklarda - Yeni formatın sadə izahı

2024/25 mövsümündən etibarən futbol üzrə Avropa kuboklarının hər üç yarışı yeni formatda keçiriləcək. Bu səbəbdən yeni qaydaların qitənin futbol həyatına, o cümlədən Azərbaycan klublarının iştirakına hansı təsirləri olacaq?

Beləliklə…

- "Real" iyunun 1-də Çempionlar Liqasının finalında "Borussiya"ya qalib gəlsə, Azərbaycan təmsilçisi “Qarabağ" 2024/25 mövsümündə ÇL-ə birinci yox, ikinci mərhələdən başlayacaq (şəxsi reytiqinin yüksək olmasına görə). Yəni Ağdam klubunun qrupa (liqaya) düşmək yolu qısalacaq. Əvvəlkitək komanda 4 deyil, 3 rəqiblə qarşılaşacaq. Hazırlıq və transferlər üçün komanda əlavə 2 həftə vaxt qazanacaq. "Borussiya" qalib gələcəyi halda Azərbaycan çempionu yenə də mübarizəyə 1-ci mərhələdən start verəcək.

- Yeni mövsümdən Çempionlar Liqası, Avropa Liqası və Konfrans Liqasında 32 komandalı qrup mərhələsi ləğv olunur, hər birində 36 komanda olmaqla 3 ayrı vahid liqa yaradılır. Püşkatmanın tarixdə ilk dəfə hibrid formada keçiriləcəyi gözlənilir. 

- ÇL-də əlavə 4 vəsiqə aşağıdakı qaydada bölünür:

* 1 vəsiqə UEFA reytinqində 5-ci olan ölkənin (indiki halda Fransa) liqasında üçüncü olan komandaya

* 2 vəsiqə son avrukubok mövsümündə ən yaxşı nəticə göstərmiş iki ölkəyə (indiki halda Almaniya və İtaliya)

* Əlavə 1 vəsiqə təsnifat/pley-off mərhələlərindən liqaya gələnə verilir, bununla da həmin mərhələ üçün vəsiqə sayı 4-dən 5-ə qalxır.

- Azərbaycanın 4 klubu mübarizəyə aşağıda qeyd edilən təsnifat mərhələlərindən başlayır:

* çempion ÇL-də 1-ci (və ya 2-ci) mərhələdən

* kubokun qalibi AL-də 1-ci mərhələdən (çempion kubokun da qalibi olarsa, Premyer Liqanın ikincisi) 

* 3-4-cü yeri tutanlar (və ya 2-3-cü yeri tutanlar) KL-də 2-ci mərhələdən

- ÇL-də təsnifatda uduzan mübarizəni AL-də, AL-də uduzan KL-də davam etdirəcək.

- Azərbaycan klubları təsnifat mərhələsində uğurlu çıxış edib vahid liqalara düşərsə, indi qrupda olduğu kimi 6 deyil, 8 oyun keçirəcək (Konfrans Liqasında isə 6). 8 fərqli rəqibin hər biri ilə 1 oyun olacaq: 4 oyun evdə, 4 oyun səfərdə. KL-də 3 oyun evdə, 3 oyun səfərdə.

- Vahid liqalarda yekunda komandaların ümumi xalları toplanacaq. Liqalarda 1-8-ci yeri tutanlar birbaşa 1/8 finala vəsiqə qazanacaq, 9-24-ci yeri tutan 16 komandadan ibarət 8 cütlük həmin mərhələyə yüksəlmək üçün 2 pley-off matçı keçirəcək. ÇL və AL-də 25-36-cı yeri tutanlar mübarizəni dayandıracaq və indiki kimi aşağı liqaya keçid etməyəcək. 

- Püşkatmada 9-16-cı yeri tutanlar “səpələnmişlər”, 17-25-ci yeri tutanlar “səpələnməmişlər” səbətində yer alacaqlar. “Səpələnmişlər” pley-off-da cavab oyunlarını evdə keçirəcəklər.

- “Pley-off”dan başlayaraq, oyunlar indiki kimi iki matçdan, final bir görüşdən ibarət olacaq. Oyunlar indi olduğu qaydada həftəortası keçiriləcək.

- ÇL və AL-də vahid liqanın oyunları sentyabr-yanvar, KL-də sentyabr-dekabr aylarına təyin ediləcək. 

***

UEFA bu qərarı liqalarda o cümlədən TOP komandalar arasında oyun sayını artırmaq, rəngərəngliyi çoxaltmaq və son turadək rəqabəti saxlamaq məqsədilə verdiyini açıqlayıb. Əlbəttə, unutmayaq ki, bu halda liqalara görə UEFA-nın sponsor gəlirləri də artacaq və bunun klublara da maddi tərəfdən xeyri dəyəcək.

Vahid liqaların formatını qəbul etməyənlər də az deyil. Amma ən azı 2024-27-ci illəri əhatə edən bu ilkin layihənin Avropa futbolunun reytiqini daha da yüksəldəcəyinə inananlar da çoxdur.

Aydın Bağırov