"Azərbaycan futboluna faydası olacaqsa, lazımi addımı atacağıq” - Qurban Qurbanov

“Tovuzda olmaq mənim üçün hər zaman xoşdur. Hər bir azarkeşə təşəkkür edirəm. Komandamı belə xoş qarşıladıqlarına görə onlara minnətdaram. Sağ olsunlar. “Turan Tovuz”a da gələcək oyunlarda uğurlar arzulayıram”. 

QOL.az xəbər verir ki, bu sözləri “Qarabağ”ın baş məşqçisi Qurban Qurbanov Misli Premyer Liqasının 27-ci turunda “Turan Tovuz”a qarşı səfərdə keçirilən oyundan sonra mətbuat konfransında deyib. 

Təcrübəli mütəxəssis komandasının 3:1 hesablı qələbəsini belə şərh edib: “Bizim üçün vacib oyun idi. Mən həmişə istəmişəm ki, gərgin səfər matçlarından sonra bu cür oyunlarda futbolçularım xarakter göstərsinlər. 2 gün yollarda olduq. Bununla belə, komanda toplarlandı. Matçın əvvəlində gərginlik var idi. Sonradan oyunu ələ ala bildik. Yekunda qələbə qazandıq. Futbolçularıma təşəkkür edirəm. Son bir ayda çox sıx qrafikdə oynayırdıq. Bu qrafikə dözmək futbolçular üçün çox vacib idi. Buna peşəkarlıq lazım idi. Onu da futbolçularımda gördüm. Öz azarkeşlərimizə də minnətdaram. Uzun yol qət edərək bu gün bizi tək qoymadılar”. 

Q.Qurbanov qeyd edib ki, komandası qarşıdakı 2-3 turda çempionluğu təmin etsə, növbəti görüşlər üçün motivasiya ilə bağlı problem yaşamayacaq: “Çünki daha yaxşı olmaq üçün qarşıdakı matçlara yaxşı hazırlaşmalıyıq. Təəssüf ki, milliyə gedən futbolçular istirahət edə bilməyəcəklər. Digərlərinə xeyli istirahət verəcəyik ki, bərpa olsunlar. Qarşıda yenə çempionat, kubok matçları gəlir. Yenə 4 gündən bir oynamalı olacağıq. İnanmıram ki, hər hansı çətinlik olsun. Əksinə, daha çox çalışacağıq”. 

O, millinin oyunları ilə bağlı yaranacaq fasilə ilə bağlı planlarından da söz açıb: “Futbolçulara 4 gün istirahət verəcəyik. İnanmıram ki, yoxlama görüşü keçirək. Sabah proqram hazırlayacağıq. Bəlkə, əvəzedici heyətimizlə yüngül oyun keçirdik. Bakıda olacağıq”. 

Q.Qurbanov bugünkü matçda mərkəz müdafiəçisi kimi sınadığı Mateus Silvadan razı qalıb: “Ümumən normal təsir bağışladı. Səhvləri çoxdur. Xüsusən də mövqe səhvləri. Lakin üstün cəhətləri də var. Mərkəz müdafiəçisində olası xüsusiyyətlərə sahibdir. Sürətindən faydalanır, birəbir mübarizələrdən qalib ayrılır. Oynadıqca özünü bu mövqedə daha rahat hiss edəcək. Amma Silva bizə öz mövqeyində daha çox lazımdır”. 

“Hesab fərqli olsaydı, əsas heyət futbolçularını ikinci hissədə meydana buraxardınız?” sualını Qurbanov belə cavablandırıb: “Oyunun gedişatına görə addım atacağdıq. Meydandakı oyunçuların durumu vacib idi. Yorulanlar, zədə almaq ehtimalı olanlar var idi. Amma Zubir, Juninyonu meydana buraxmaq düşüncəm yox idi. Gedişata uyğun addım atdıq”. 

Q.Qurbanov legioner limiti barədə konkret fikir bildirməkdə çətinlik çəkdiyini deyib: “Eyni səviyyəli komanda saxlamaq üçün fərqli düşüncədə oluruq. Eyni səviyyəli heyət olsa, hamı oynayacaq. Əlimizdə olanlar nəticə verən futbolçulardır. Belədə Nəriman üçün daha çox şans yaranır. Tural, Elvin artıq püxtələşiblər. 1-2 fərqli futbolçu olsa, heyət daha geniş olardı. Amma bugünkü heyətimizdən də razıyam. Hər bir oyunçu nəticə verməyi bacarır. 1-2 əlavə olsaydı, pis olmazdı”. 

Hazırda “Qarabağ”ın legionerlərinə Avropa klublarından maraq olsa da, bu məqam Qurbanovu narahat etmir: “Hazırda heç bir danışıq yoxdur. Hər hansı təklif olsa, buna normal yanaşacam. Gözləniləndir. Biz də istəyirik ki, heyətimizi qoruyub saxlayaq. Bir problem görmürəm. Transfer bazarına girməliyik. Azərbaycan futbolunu tanıtmaq üçün bazarda da iştirak etməliyik”. 

Təcrübəli mütəxəssis qeyd edib ki, hazırda ikinci pillədən 24 xal öndə olmalarında Azərbaycan futbolu adına hər hansı problem görmür: “Buna normal baxıram. Xal fərqini düşünürüksə, Avropanın çox ölkələrində belə hal olur. Bu o demək deyil ki, bizdə vəziyyət bərbaddır. Ola bilər bu mövsüm oyunumuz daha uğurlu alınıb. Bu o demək deyil ki, hər il belə olacaq. Bundan da yaxşı formada olduğumuz vaxtlarda elə olub ki, çempionluğu sona 2-3 tur qalmış rəsmiləşdirmişik”. 

“AFFA-nın yeni rəhbərliyindən təklif gəlsə, yenidən İcraiyyə Komitəsində yer alarsınızmı?” sualına Qurban Qurbanov belə cavab verib: “Ümumən biz Azərbayan futbolu üçün çalışırıq. Tək özümü düşünməyim düzgün olmaz. Bəzən küsürsən, inciyirsən, amma ümumən Azərbaycan futboluna faydası olacaqsa, lazımi addımı atacağıq”.