"Hücum futbolu oynayacağıq" – Roman Qriqorçuk
"Belə oyunlarda əvvəldən favorit və ya şanssız komanda haqda danışmaq olmaz. Düşünürəm ki, mərhələnin startına qədər şanslar bərabər olur. “Çukariçki” haqda kifayət qədər məlumatımız var. Çox ciddi rəqibdir. Onlar bir mərhələ adlayıb ki, bu da fikrimi təsdiqləyir".
Qol.Az-ın klubun rəsmi saytına istinadən verdiyi məlumata görə, bu sözləri "Qəbələ"nin baş məşqçisi Roman Qriqorçuk Avropa Liqasının II təsnifat mərhələsində bu gün qarşılaşacaqları “Çukariçki” (Serbiya) ilə ilk oyunöncəsi keçirilən mətbuat kofransında deyib.
Ukraynalı mütəxəssis "Çukariçki"yə qarşı hücum futbolu oynayacaqlarını bildirib: "Rəqibin oyunçu seçimi, məşqçi işi, oyunun təşkili, komandada görülən işi aydın görünür. “Çukariçki” aqressiv futbol nümayiş etdirir. Sabit heyətə malik komanda xeyli müddət oynaması ilə seçilir. Rəqibimiz çox sadə yolla rəqibi təzyiq altına salmağa çalışır. Top sürətlə rəqib qapısı önünə çatdırılır, komanda güclü mübarizə aparır. Bilirik ki, çox çətin oyun olacaq. Azərbaycanın aparıcı klubları hücum futbolu nümayiş etdirib, baxımlı, məzmunlu, maraqlı və kombinasiyalı oyun sərgiləyir.
Bizim oyun üslubu hücum futboludur. İstəyirik ki, hücumda daha çox vaxt keçirək, rəqib qapısı önündə oynayaq. İndi elə mərhələdəyik ki, futbolçular arasında anlaşmanı artırmaq üçün zaman lazımdır. “Çukariçki” ilə qarşılaşmada da hücum etmək niyyətindəyik. Çünki dəqiq əminik ki, bizim üstünlük verdiyimiz və nail olmaq istədiyimiz üslub nəticə verir. Biz ideal saydığımız hücum futbolu oynayacaq, buna çalışacağıq. Heyətimizdə kifayət qədər təcrübəli oyunçular var. İndi mübarizə apardığımız turnirin qalibi olan futbolçu – Aleksey Qay da komandamızda çıxış edir. Belə beynəlxalq oyunlar təcrübəsinə malik futbolçuların heyətdə olması yaxşıdır".
Qeyd edək ki, bu gün Serbiyada keçiriləcək "Çukariçki" - "Qəbələ" oyunu Bakı vaxtı ilə saat 23:30-da başlayacaq.
_22.01.19.jpg)
