"Bakı-2015": güləşçilərimizdən üç bürünc medal

Bu gün "Bakı-2015" I Avropa Oyunlarında sərbəst güləşçilərin mübarizəsinə yekun vurulub.

Qol.Az-ın məlumatına görə, yarışın son günündə daha 4 çəki dərəcəsinin qalibləri müəyyənləşib.

Dünən iki qızıl və bir bürünc medal qazanan güləşçilərimiz bu gün də ölkəmizin hesabında olan medalların sayını artırmağa çalışıb.  Bu gün keçiriln görüşlərdə Hacı Əliyev ( 61 kq), Ruslan Dibiehacıyev (70 kq), Camaləddin Maqomedov (125 kq) bürünc medala yiyələnib.

Qeyd edək ki, sərbəst güləş yarışlarının ilk günündə Toğrul Əsgərov (66 kq) və Xetaq Qazyumov (97 kq) qızıl, Cəbrayıl Həsənov (74 kq) isə bürünc medal qazanıb.

Kişilər

61 kq

Avropa Oyunlarını 5-ci pillədə başa vuran və 1/4 finalda erməni Qarik Barsekyanı məğlub edən Yaşar Əliyevin qardaşı Hacı Əliyev mübarizəyə 1/8 finaldan qoşulacaq. O, ilk görüşündə Ermənistan təmsilçisi Valodya Franqulyanla qarşılaşıb. H.Əliyev erməni rəqibini 7:0 hesabı ilə məğlub edərək 1/4 finala vəsiqə qazanıb.  O, bu mərhələdə Mikolo Bolotnyuku 11:0 hesabı ilə məğlub edib. İdmançımız yarımfinalda Aleksandr Boqomoyevlə üz-üzə gəlib və 2:5 hesabı ilə uduzub. Məğlubiyyətə baxmayaraq, Əliyev bürünc medal uğrunda mübarizəni davam etdirəcək. O, türkiyəli Recep Munir Aktaşla yarışıb.  İdmançımız 10:2 hesabı ilə qalib gələrək Avropa Oyunlarını 3-cü yerdə bitirib.
70 kq

Bu çəkidə ölkəmizi Avropa çempionumuz Ruslan Dibirhacıyev təmsil edəcək. Lakin onun 1/8 finalda Maqomedmurad Hacıyevlə (Polşa) döyüşüb və 2:7 hesabı ilə məğlub olub. Polşa idmançısı finala qədər irəlilədiyi üçün Ruslan Dibirhacıyev təsəlliverici yarışlara qatılıb. İlk öncə bolqarıstanlı Miroslav Kirovu 4:1 hesabı ilə məğlub edən güləşçimiz daha sonra macarıstanlı Zsombor Qulyasla üz-üzə gəlib. Bu döyüşü də qələbə ilə başa vuran (4:3) Dibirhacıyev bürünc medal uğrunda mübarizə aparıb. O, (70 kq) 3-cü yer uğrunda görüşdə Gürcüstan təmsilçisi Davit Tlaşadzeni 6:2 məğlub edərək bürünc medalı qazanıb.
86 kq

Yığmamızın üzvü Nurmaqomed Hacıyev 1/8 finalda bolqarıstanlı Georgi Sredkovla üz-üzə gəlib. Təmsilçimiz 14:2 hesabı ilə qalib gələrək növbəti mərhələyə yüksəlib. O,1/4 finalda Abdulrəşid Sadulayevə (Rusiya) 1:11 hesabı ilə uduzub. Buna baxmayaraq, rusiyalı güləşçi finala vəsiqə qazandığından Nurmaqomed təsəlliverici görüşlərə qatılacaq. Təmsilçimiz bu mərhələdə Vasile Zuz Tudorla (İtaliya) qarşılaşıb və parlaq qələbə qazanıb - 10:0. Güləşçimiz 3-cü yer uğrunda görüşdə polşalı Radoslav Marcinkyeviczlə qarşılaşıb. Bu görüşdə Hacıyev  3:5 hesabı ilə uduzub və  yarışı 5-ci pillədə bitirib.
125 kq

Ən ağır çəki dərəcəsində ölkəmizi təmsil edəcək güləşçimiz Camaləddin Məhəmmədov mübarizəyə 1/8 finaldan start verib. Avropa və dünya çempionatının mükafatçısı ilk görüşünü Yonas Rudaviçiusa (Litva) qarşı keçirib.  Rəqibi üzərində təmiz qələbə qazanan (10:0) Maqomedov 1/8 finalda türkiyəli Taha Akgüllə qarşılaşıb və 2:5 hesabı ilə uduzub. Akgül finalda iştirak hüququ qazandığından Məhəmmədov təsəlliverici görüşlərə qatılacaq. O, Robert Baranla (Polşa) güləşib. Rəqibinə 11:0 qalib gələn Camaləddin bürünc medal uğrunda yarışda slovakiyalı Soslan Qaqloyevlə qarşılaşıb. Məhəmmədov rəqibini 7:2 hesabı ilə məğlub edərək, bürünc medala yiyələnib.