“Vüqarın “Qarabağ”da qalmasını hamıdan çox mən istəyirdim”

“Qarabağ” klubunun direktoru Əmrah Çəlikəlin Qol.Az saytına müsahibəsi

-  Əvvəlcə Vüqar Nadirovun “Qarabağ”dan gedişi haqda danışaq. “Qarabağ”ın yetirməsi olan bir futbolçunun gözlənilmədən komandadan ayrılması futbol ictimaiyyəti tərəfindən birmənalı qarşılanmadı.

- Vüqar peşəkar futbolçudur. Onun qərarına hamımız hörmətlə yanaşmalıyıq. Biz çox istərdik ki, o, “Qarabağ”da qalsın, çıxışını doğma klubunda davam etdirsin. Mən Vüqarı hələ kiçik yaşlarından tanıyıram. Ona qarşı xüsusi sevgim var. Amma bu o demək deyil ki, Vüqar ancaq “Qarabağ”da oynamalıdır. Əlbəttə ki, seçimində azaddır. Harda istəsə, orda oynayacaq.

- Mətbuatda yazılanlara görə, Vüqar ona təklif olunan məvacibin əvvəlkindən xeyli az oldğu üçün “Qarabağ”ı tərk edib. Bu, doğrudurmu? 

- Maliyyə məsələləri futbolçu və klub arasında həll olunur. Əsas odur ki, Vüqar özü “Qarabağ”da qalmamaqla bağlı qərarını açıqlayıb. Bundan sonra maliyyə məsələlərindən danışmaq əhəmiyyətli deyil. Artıq Vüqarın gələcək karyerası haqda düşünmək lazımdır.

- Azarkeşlər Vüqarın gedişini qəbul edə bilmir.  Onlar Vüqarı “Qarabağ”ın simvolu hesab etdikləri deyirlər. “Vüqarsız “Qarabağ” olmaz” deyənlər də az deyil.

- Azarkeşlərin fikri bizim üçün önəmlidir. Amma mən bu məsələdə onlarla razılaşmıram. Çünki komandanın baş məşqçisi var, futbolçu müstəqil qərar qəbul edir. Əgər Vüqar başqa klubda oynamaq üçün “Qarabağ”ı tərk edibsə, bu, azarkeşlər tərəfindən qəbul olunmalıdır.

- Vüqar “Qarabağ”dan ayrılarkən başqa klubda oynamaq istədiyini dedi?

- Hazırda vətəndə deyiləm, Türkiyədəyəm. Vüqarla danışmaq imkanım olmayıb. Fakt budur ki, Vüqar “Qarabağ”da qalmamaq haqda qərarını açıqlayıb. Deməli, başqa kluba keçəcək. Onun “Qarabağ”da qalmasını hamıdan çox mən istəyirdim. Ancaq futbolçunun gedişinə mane ola bilmərik.

- Leroy Corcun məsələsi nə yerdədi?

- Biz ona müqavilə təklif etmişik. Hələ ki, cavab gözləyirik. Corca öz şərtlərimizi demişik.

- Muarem Muarem və VüqarNadirov kimi aparıcı futbolçular getdi. Onların yerini dolduracaq futbolçular transfer olunacaq?

- Əlbəttə, bunun üçün işlər gedir. Komandanı daha da gücləndirmək istəyirik. Çempionlar Liqasında mübarizə aparan komanda ildən-ilə inkişaf etməlidir.

- Adlı-sanlı futbolçuların transferi mümkündürmü?

- Bu haqda indidən dəqiq bir söz deyə bilmərəm. Gəlin, hadisələri qabaqlamayaq. Bəzi futbolçularla danışıqlar gedir.

- Bildiyimizə görə, Namiq Yusifov, Admir Teli və İlqar Qurbanova da yeni müqavilə təklif olunub. Onlar hansı cavabı veriblər?  

- Onları da komandamızda görmək istəyirik. Komandanın özəyini saxlamaq niyyətindəyik. Ötənilki heyəti qorumağa çalırışırıq. İşimizi bu yöndə qurmuşuq. Ancaq bəzi məsələlələr var ki, hər kəs buna həssas yanaşmalıdır. Hazırda iqtisadi vəziyyət o qədər də yaxşı deyil. Devalvasiya dövrünü yaşayırıq. Ancaq bu o demək deyil ki, “Azərsun” şirkəti “Qarabağ”dan imtina edəcək. Bununla belə, hazırkı dövrdə bir qədər qənaət etmək lazımdır. Futbolçular da bunu dərk etməlidir.

Ramiq  AĞAMƏMMƏDOV