"Kəpəz"in iddiası mütləq artacaq" – Şahin Diniyev

AFFA Məşqçilər Komitəsinin üzvü, "Kəpəz"in baş məşqçisi Şahin Diniyevin Qol.Az saytına müsahibəsi

- Əvvəlcə milli komandamızın Serbiya ilə yoldaşlıq oyunu (1:4) haqda fikirlərinizi bilmək istərdik.

- Serbiya həm heyətin, həm də taktikanın yoxlanılması üçün əlverişli rəqib idi. Millimiz təzyiq altında oldu. Səhvlərimizi gördük. Onu deyim ki,  asan qollar buraxdıq. Havanın dəhşətli isti olması komandamızın fiziki durumda problemlər yaratdı. Sürətli oynamaq mümkün deyildi. Hiss olunurdu ki, futbolçularımızda ağırlıq var. Bu da yəqin ki, intensiv məşqlərlə bağldır.

- Millimizin oyunu nəyəsə ümid verir?

- Bəli, Norveçlə oyuna ümidlə baxmaq olar. Komandamızın oyununu artırmaq potensialı var. Məncə, dünən hesab oyuna görə olmadı. Millimiz çox adi epizodlarda qollar buraxdı. Yəni bu cür məğlubiyyətə layiq deyildik. Norveçdə isə yaxşı nəticə qazanmaq olar.

- "Kəpəz"də işlər necə gedir?

- İyunun 20-dən 28-nə qədər Gəncədə sırf gəncəli futbolmularla toplanışımız olacaq. İyulun 1-dən 10-na qədər Bakıda hazırlıq keçəcəyik. Həmin mərhələdə komanda 60-70 faiz hazır olmalıdır.Bir neçə yoldaşlıq oyunu keçirməyi nəzərdə tutmuşuq.  Təlim-məşq toplanışı üçün hansı ölkəyə gedəcəyimiz komandanın komplektləşdirilməsindən asılı olacaq.

- Transfer işləri nə yerdədir?

- Bu sahədə hərtərəfli işlər gedir. Əfsuslar olsun ki, hələlik təkcə Bəxtiyar Soltanovla müqavilə imzalamışıq. Ancaq bir neçə futbolçu ilə danışıqlar gedir. Yaxın günlərdə onların bəziləri ilə müqavilə imzalanacaq.

- "Kəpəz" ev oyunlarını Gəncədə keçirə biləcəkmi?

- Bu yaxınlarda Gəncə şəhər icra hakimiyyətinin başçısı ilə görüşümüz oldu. Artıq danışıqların nəticlərini görürük. Bakıda olan ingiltərəli mütəxəssislər bir neçə gün əvvəl Gəncə şəhər stadionunda oldular. Onlar meydançanın durumu ilə maraqlandılar və nə edilməli olduğu haqda qərar çıxardılar. Əsas stadionun yanındakı süni örtüklü meydança hazır olanda ev oyunlarını orda keçirəcəyik. Bazamız da bərbad vəziyyətdədir. Bazanın yenidən qurulması üçün də işlər gedir.

- Maraqlıdır ki, məşqçilik karyeranızda uzun müddət fasilədən sonra "Rəvan"ı çalışdırdınız. İndi isə "Kəpəz". O qədər də iddialı olmayan komandaları öhdənizə götürəndə tərəddüd etmirsiniz?

- Mənim xarakterim elədir ki, həmişə nəyisə sübut etməyə çalışıram. Bəli, hazır komandaya getməkdənsə hər şeyi yenidən başlamağı üstün tuturam. Burda bir üstünlüyüm var ki, öz futbol fəlsəfəmə uyğun komanda yaradıram. Komandanı sıfırdan qurmaq nə qədər ağır olsa da, mənə belə xoşdur. Rəhbərlik tərəfdən mənə hər bir səlahiyyət verilib ki, istədiyim komandanı qurum. Bilirəm ki, ilk altı ay çətin olacaq. Ardıcıl məğlubiyyətləri, uğursuzluqları gözümün qarşısına gətirirəm. Ancaq inanıram ki, rəhbərliyin dəstəyi ilə uğura gəlib çıxacağıq. Mən daha əvvəl də "Kəpəz"i çalışdırmışam. Ancaq indi hər şey fərqlidir. O vaxt "Gəncə" adlanan komanda Premyer Liqada çıxış edirdi. İndi isə "Kəpəz" birinci divizionu 9-ci pillədə tamamlayıb. Bu komanda ilə Premyer Liqada "Qarabağ", "Qəbələ", "Neftçi" kimi komandalara qarşı mübarizə aparmaq çətin olacaq. Ona görə də komandanı sıfırdan yığmalıyıq.

- Üstəlik, indi Gəncədə əvvəlki kimi futbolçular yetişmir.

- Bəli, demək olar ki, yox dərəcəsindədir. Son 2-3 ildə Gəncədə futbolçu qıtlığı yaranıb.

- Bu çətinliklərin fonunda "Kəpəz" nə dərəcdə iddalı ola biləcək?

- Hər bir işdə çətinliklərlə bərabər məqsəd də olur. Biz də məqsədimizə doğru geədəcəyik. Qarşımıza hədəf qoymuşuq ki, ilk "altılığ"a düşək. Ancaq növbəti mövsüm iddialarımız mütləq artacaq. Bununla kifayətlənmək fikrində deyilik.

- Məşqçilər Komitəsindəki işinizi davam etdirəcəksiniz?

- İyulun 1-də "Kəpəz"lə müqavilə bağlayacam. Həmin vaxta qədər Məşqçilər Komitəsindəki işimi  davam etdirəcəm. İş yerimə hörmət edirəm. Rəhbərlik hansı qərarı çıxarsa, razılaşacam.

Ramiq AĞAMƏMMƏDOV