“Bəzi legionerlərə klubumuz haqda düzgün məlumat verilmir” – Müsahibə

“Kəpəz”in baş məşqçisi Azər Bağırovun QOL.az saytına müsahibəsi

- “Kəpəz”ə gəlişinizdən sonra komandanın oyununda yaxşı mənada dəyişikliklər olsa da, qış fasiləsinə 9-cu pillədə yollandınız. Mövsümün 2-ci yarısı üçün hansı planlarınız var? Nələri dəyişmək fikrindəsiniz?

- Bəli, oyun planında dəyişikliklərimiz çoxdur. Məsələn, biz hətta “Qarabağ”la oyunun ilk hissəsində yaxşı futbol göstərdik. İkinci hissədə “Qarabağ” taktiki baxımdan bəzi dəyişikliklər etdi. Biz isə onları edə bilmədik. Çünki əlimizdə material yoxdur. “Qarabağ” ikinci planı işə salanda bizdə o imkan olmadı. Mən “Kəpəz”ə gələndən sonra çempionatda 13 oyun keçirmişik. İlk 3-4 turda çatışmazlıqlarımız çox idi. Bu da normaldır. Hazırda çatışmayan cəhətlərimiz hücum xəttindədir. Bizə yaxşı vingerlər lazımdır. Son turlarda o qədər qol epizodlarını boşa vermişik ki, bəlkə də çempionatda heç kimdə bu qədər olmayıb. Buna görə də bəzi dəyişiklik etmək istəyirik. Yəqin ki, qış transfer pəncərəsi zamanı bunu həyata keçirəcəyik. Hücum xəttinə rəng qatmaq istəyirik. Texniki və taktiki baxımından dəyişikliklər edəcəyik ki, rəqiblər üçün sürprizlərimiz olsun.

- Heyət baxımından necə, dəyişiklik çox olacaq? Komandadan bir neçə oyunçunun getdiyi haqda xəbərlər yayılıb.

- Heyətdə də dəyişiklik edəcəcəyik. Hazırda klub tərəfindən rəsmi açıqlama yoxdursa, deməli, gedənlər yoxdur. Bu gün kimlərinsə getməyini və gəlməyini rəsmi şəkildə klub elan etməlidir. Bir məşqçinin hansısa futbolçu haqda nəsə deməsi, fakt deyil. Fakt o vaxt olur ki, artıq hər şey rəsmiləşir.

- Onda sualı belə qoyaq ki, Lassana Ndiaye və Redon Mihana mövsümün 2-ci yarısı üçün planlarınıza daxildir?

- Mihananı planlarımda görmürəm. Çünki əvəzedici heyətə göndərmişdik. Digər oyunçular barəsində isə klub özü məlumat versə, daha yaxşı olar. Bunlar hamısı müzakirə olunmalıdır. Komandadan gedənlər olacaq, amma adlar məlum deyil.

- Transfer işləri necə gedir, razılaşdığınız oyunçular var?

- Dünən gecə saat 2-yə qədər bununla bağlı işləmişik. Axtarışlar gedir. Əsasən hücum xəttini gücləndirmək istəyirik. Bəzi oyunçulardan cavab gözləyirik. Bu gün futbolçuların “Kəpəz”ə gəlməsi rahat şəkildə olmur. Bəzi oyunçuları bəyənirsən, maddi tərəfdən də razılaşırsan, amma adam iddialı klubda oynamaq, turnir cədvəlində yuxarı pillələrdə olmaq istəyir.

- Klubun sponsorunun olmaması transfer işinə necə təsir edir? Hazırda “Kəpəz”də maliyyə durumu necədir?

- Şükür ki, son aylarda klubun maliyyə tərəfdən heç bir problemi yoxdur. Klub bütün öhdəlikləri yerinə yetirib. Bu gün bonuslar da qaydasında verilir. Sadəcə, legionerlərin bir az kaprizləri olur. Bəziləri bölgəyə getmək istəmir, bəzilərinə düzgün məlumat verilmir. Məsələn, deyirlər ki, stadionları yoxdur. Amma bu gün “Kəpəz”in təbii örtüklü iki meydançası var. Əsas meydançamız da hazır olacaq.

- “Sabah”ın futbolçusu Şakir Seyidovu yenidən icərəyə götürəcəksiniz?

- Danışıqlar gedir. Ona da vaxt lazımdır. Biz istəyərik ki, yaxşı futbolçu komandamıza köməklik etsin. Çünki heyətimiz geniş deyil. Özünüz də görürsünüz ki, 4 gündən bir eyni heyətlə oynamaq çətindir. Bu, çempionata da zərbə vurur. Ona görə də istəyirik ki, heyətimizi genişləndirək. Ən aşağısı komandada eyni zəviyyədə oynayan 16-17 futbolçumuz olmalıdır.

- Mövsümün 2-ci yarısında "Kəpəz"i bu durumdan çıxarmaq mümkün olacaq?

- Mən komandanı götürəndə artıq seleksiya olunmuşdu. Biz 4 futbolçu gətirdik. Onlar komandanın gücünə güc qatdılar. Hazırda çempionatda öz naxışlarını qoyurlar. Yəni transfer sarıdan düzgün nöqtəyə vurmuşuq. Hər şey pillə-pillə olmalıdır. Mən yeni gələndə “Kəpəz” hərtərəfli şəkildə rəqiblərinə uduzurdusa, bu gün biz çox komandanı daha artıq qaçmağa vadar edirik, meydanda mübarizə görünür, pressinq edirik. Həm də bir komandanı ki, sıfırdan yığmamısansa, vaxta ehtiyac var. “Araz-Naxçıvan”da 12-13 günə komanda yığmışdıq. Amma hər şey sıfırdan olmuşdu. Komanda yığmaq sırf yaxşı oyunçuları bir yerə toplamaq deyil. Komanda yığmaq bir-birini tamamlayan futbolçuları bir yerə cəmləmək deməkdir. İstədiyimiz transferləri edə bilsək, məncə, qışdan sonra “Kəpəz”də canlanma, yeni komanda görə biləcəksiniz.

- Çempionatdakı fasilə zamanı “Qarabağ”la yoldaşlıq oyunu keçirəcəksiniz. Digər rəqibiniz bəllidir?

- Hələ dəqiqləşməyib. Böyük ehtimalla 1-ci liqa komandası olacaq. Oyunu yanvarın 13-nə planlaşdırırıq, amma rəqib hələ bilinmir.

- Hücumçu Orxan Əliyevə az şans verdiyiniz üçün münasibətinizin korlandığı və onun komandadan göndərilə biləcəyi ilə bağlı da xəbərlər var.

- Orxanla münasibətimiz korlanmayıb. Bir futbolçunun zəif və güclü oyunları olur. Orxan da bəzi oyunlarda yaxşı oynayıb. Mənim vaxtımda daha çox meydanda olub. Bir futbolçu zəif çıxış edəndə onu dalbadal meydana buraxmırsan. Bu, normal haldır. Futbolçunu “rəndələməlisən”. Bu, futbolçunun ziyanına yox, xeyrinədir.

Ramiq Ağaməmmədov