“Neftçi” üzərində qələbəyə görə çox yaxşı mükafat ayrıldı”

ÖLKƏ FUTBOLU 9 Avqust 2023 / 15:54 5862

- A +

“Neftçi” ilə oyuna çox həvəslə, ciddi hazırlaşmışdıq. Yəqin ki, komandaların durumunu nəzərə alanda “Neftçi” bu oyunun favoriti hesab edilirdi. Ancaq mən “Kəpəz”in baş məşqçisi olaraq belə düşünmürdüm. Yəni biz rəqibin kimliyindən asılı olmayaraq meydana qələbə üçün çıxırıq”.

Bu sözləri Qol.az-a açıqlamasında “Kəpəz”in baş məşqçisi Azər Məmmədov deyib.

Misli Premyer Liqasının ilk turunda Gəncədə “Neftçi”yə qalib gəldikləri oyundan (1:0) danışan mütəxəssis qələbəyə baxmyaraq, komandasında çatışmazlıqların çox olduğunu bildirib:

“Bizim üstünlüyümüz onda idi ki, “Neftçi” 3 gün əvvəl Konfrans Liqasının oyununa çıxmışdı, onlarda yorğunluq var idi. Biz bu fürsətdən yaxşı istifadə etdik. Hələ ki, heyətimiz tam komplektləşməyib. Yəni “Neftçi” üzərində qələbə bizim gücümüzün göstəricisi deyil. Bir neçə turdan sonra gücümüz nəyə qadirdir, biləcəyik. Bundan yaxşı da ola bilər, pis də. Bununla belə, komandamızın “Neftçi” ilə görüşdə nəticədən başqa, oyunu da var idi. Düzdür, çatışmazlıqlarımız da çoxdur. Bunun üzərində işləməliyik.

Mən azarkeşlərimizdə təşəkkür etmək istəyirəm. Bizə çox böyük dəstək verdilər. İsti havada bir an belə dayanmadılar. Turun ən çox azarkeşi bizim oyunda oldu. Qələbəmizdə onların payı da böyükdür”.

A.Məmmədov “Neftçi” üzərində qələbəyə görə komandaya yaxşı mükafat ayrıldığını bildirib: “İdarə Heyətinin sədri İlqar Nadiriyə təşəkkür edirəm ki, belə bir çətin vaxtda komandaya yaxşı mükafat ayrıldı. Məbləği mən açıqlamasam yaxşı olar, amma futbolçular üçün ayrılan mükafat gözləniləndən xeyli yaxşıdır. Təbii ki, bu cür addımlar futbolçularda əlavə motvasiya verir. Sözsüz ki, mükafat olmasa da, ilk oyunda, həm də “Neftçi” üzərində qələbə komandada böyük ruh yüksəkliyi yaradıb. Qarşıdakı oyuna böyük istəklə hazırlaşırıq”.

Baş məşqçi qeyd edib ki, bir neçə yeni oyunçu alınmasa, onlar üçün çempionatda uğurlu çıxış etmək çətin olacaq: “Heyətimizə bir neçə yeni transfer etməyi düşünürük. Onların arasında yerlilər də var, əcnəbilər də. Ancaq müəyyən məsələlər var ki, onlar həll olunmadığından bu transferlər haqqında ətraflı danışmaq istəmirəm. Gəncə Azərbaycanın ikinci ən böyük şəhəri olsa da, bəzi oyunçular bura gəlmək istəmir, ancaq Bakıda oynamağı üstün tuturlar. Elələri də var ki, ailəsi Gəncəyə gəlməyə razı deyil. Buna görə də futbolçu gətirməkdə bir qədər çətinliklər yaranır. Ancaq heyətimiz mütləq genişlənməlidir. Bilirsiniz ki, hazırda ən kasad heyət bizdədir. Bir neçə transfer etməsək, bizim üçün çempionatda mübarizə aparmaq çətin olacaq”.

Ramiq Ağaməmmədov

Daha çox