22:40
“Hazırda klublara yardım kimi dövlət tərəfindən ayrılan məbləğlərin artırılması müzakirə mövzusu deyil”.
Qol.az xəbər verir ki, bu sözləri AFFA-nın baş katibi Sərxan Hacıyev jurnalistlərə açıqlamasında deyib.
O bildirib ki, klublar dövlətin ayırdığı maliyyə vəsaitinə arxayın olmamalıdırlar: “Hesab edirəm ki, 1-ci divizion üçün 300 min manat pis rəqəm deyil. Ümumiyyətlə isə klublar bu vəsaitə arxayın olmamalıdırlar. Özləri də sponsor tapmağa çalışmalıdırlar. Dövlətimizə minnətdarıq ki, futbol klublarına bu cür dəstək göstərilir. Lakin klublar özləri də maliyyə vəsaiti cəlb etmək üçün iş görməlidirlər”.
Sərxan Hacıyev bildirib ki, klublara ayrılan maliyyə vəsaiti ilə bağlı ciddi yoxlamalar aparılır: “Dövlət tərəfindən klublara ayrılan pullarla bağlı monitorinq aparılır, ciddi yoxlamalar keçirilir. Özü də təkcə AFFA tərəfindən deyil. AFFA-nın nəzdində olan təftiş komissiyasının üzvlərindən yalnız iki nəfər AFFA-nın əməkdaşlarıdır, digərləri dövlət orqanlarının nümayəndələridir. Burda SOCAR-dan da, Hesablama Palatasından da, İqtisadiyyat Nazirliyindən də nümayəndələr yer alır”.
S.Hacıyev bəzi klubların ayrılan vəsaiti tam əldə edə bilmədiklərini vurğulayıb: “Klublar tərəfindən yerinə yetirilməyən müəyyən kriteriyalar var. Öncədən klublara hansı istiqamətlər üzrə nə qədər xərc ayrılmalı olduğu deyilmişdi. Bəli, elə klublar var ki, deyilən istiqamət üzrə ümumiyyətlə vəsait xərcləməyiblər və buna görə də həmin vəsait klublara ödənilməyib. Təbii ki, söhbət 3 milyonun hamısından getmir. Müəyyən bir hissə nəzərdə tutulur. Bəzi sənədlər yerində olmadığına görə müəyyən aylarda vəsaitlərin gecikməsi də baş verib. Lakin bu, klubların vaxtında lazımi sənədləri göndərməməsi ucbatından olub”.
