"Bu yoldan çəkiləsi deyiləm" - Tərlan Əhmədov

“Mövsümün son oyunu olduğu üçün komandanın sönük çıxış edə biləcəyini düşünürdüm. Amma futbolçular sağ olsunlar ki, meydanda layiqincə mübarizə apardılar. Mövsümü yaxşı-əhval ruhiyyədə başa vurduq. 1 xal turnir cədvəli baxımından ciddi önəm daşımasa da, bizim üçün hər xal vacibdir”. 

Qol.az xəbər verir ki, bu sözləri “Kəpəz”in baş məşqçisi Tərlan Əhmədov Misli Premyer Liqasının sonuncu - 36-cı turunda “Qəbələ” ilə heç-heçə etdikləri (1:1) oyundan sonra deyib. 

Mütəxəssis “Qəbələ” ilə matçda heyətdəki müəyyən dəyişikliklər etdiyini bildirib: “Heyətlə bağlı itkilərimiz var idi. Ona görə də heyətdə müəyyən yerdəyişmələr etmişdik. Amma bəzi futbolçular əvvəlki matçlarda oynamamalarına baxmayaraq, bu gün yüksək səviyyədə çıxış etdilər. Onların hər birinə təşəkkür edirəm”.

Əhmədov növbəti mövsümdə də “Kəpəz”i çalışdırmaq istədiyini qeyd edib: “Fevral ayında Tovuzda demişdim ki, komandanı Premyer Liqada saxlayıb gedəcəyəm. O gündən bu yana təzyiqlərə, çatışmazlıqlara dözdüm. Üstəlik, Gəncədə azarkeşlərin çox hissəsi komandada qalmağımı istəyir. Həm də 9 ayda çəkilən əziyyətin hədər getməsini istəmirəm. Ona görə də bu yoldan çəkiləsi deyiləm. Rəhbərliklə söhbətimiz olacaq. Ümid edirəm ki, komandadakı işimi davam etdirəcəm. Çalıcağam ki, “Kəpəz” növbəti mövsümdə daha yaxşı çıxış etsin”. 

O, ikinci hissədə komandasının daha yaxşı oynamasını rəqibin hesabda öndə olması ilə əlaqələndirməyib: “Deməzdim ki, hesabda öndə olduğu üçün rəqib bizə oynamağa imkan verdi. Fasilədən dərhal sonra Ayzaya və Juniorun meydana çıxması oyunumuza müsbət təsir göstərdi. Daha diqqətli oynadıq, topa nəzarəti ələ keçirdik və nəticədə də cavab qolunu vura bildik”. 

O, “Kəpəz”in qapısında çox qol görməsinə belə münasibət bildirib: “Birdən-birə komandada çox şeyi dəyişmək olmur. Mən “Kəpəz”i qəbul edəndə futbolçularda məğlub olmaq qorxusu var idi. İlk növbədə komandaya qalib ruhunu qaytarmağa çalışdıq. Eləcə də hücum futbolu sərgiləməyə çalışdıq. Komandanın özünəinamı qaytarması üçün bir neçə qələbə vacib idi. Bütün bunları nəzərə alaraq, oyunlar zamanı müdafiə ilə müqayisədə hücuma daha çox diqqət ayırırdıq. Bu da istər-istəməz müdafiədə boşluqlara gətirib çıxarırdı. Qapımızdan çox qol buraxmağımızdan hardasa bundan qaynaqlanır. Sırf müdafiənin üzərində işləsəydik, inkişaf etməyimiz çətin olardı. Qapımızda çox qol görməyimiz üzücü olsa da, əsas hədəf Premyer Liqada qalmaq idi və buna da nail olduq”. 

T.Əhmədov bildirib ki, “Kəpəz”in büdcəsi onun üçün ciddi əhəmiyyət daşımır: “1 həftə əvvəl rəhbərliklə görüşümüz olub. Gələcək planlarla bağlı müzakirə apardıq. Gələn həftə yenidən bir araya gələcəyik. Açığını deyim ki, büdcə məsələsi mənim üçün bir o qədər də önəmli deyil. “Kəpəz”ə gələndə maliyyə vəziyyətinin necə olduğunu bilirdim. Təbii ki, mən də büdcənin daha çox olmasını, daha keyfiyyətli futbolçularla işləməyi istərdim. Amma reallığı bilirəm. Bugünkü büdcə ilə daha yaxşı komanda formalaşdırmağa çalışacağıq”.

Mütəxəssis “Kəpəz”in problemlərini mətbuat vasitəsi ilə qabartdığı üçün peşman olmadığını söyləyib: “Heç bir peşmançılıq yaşamamışam. Bəlkə də komandadakı problemləri açıqlamasaydım, bu gün “Kəpəz” sonuncu pillədə olardı. Üzərimizdə çox böyük təzyiq var idi. Mən mətbuata danışanda hər şeyi deməmişəm. Elə şeylər var ki, onları açıqlasam... Hər halda söz-söhbətlərin də bir həddi var. Hardasa partlama olmalı idi. Bu söhbətlər Tərlan Əhmədova yox, “Kəpəz”in, Gəncə futbolunun Premyer Liqada qalması üçün lazım idi. Mən dediklərimə görə təəssüf hiss keçirmirəm. Yalnız ona təəssüflənirəm ki, açıqlanan problemlər bu günə qədər öz həllini tapmayıb”.