“Gəncədə oynamamağımız komandaya mənfi təsir edir” - Tərlan Əhmədov

ÖLKƏ FUTBOLU 5 May 2023 / 20:51 2025

- A +

“Qapımızda erkən qol görməyimiz komandaya bir qədər pis təsir etdi, oyun ritmimiz pozuldu. Amma ümumi götürdükdə futbolçularımdan ciddi narazılığım yoxdur”.

Qol.az xəbər verir ki, bu sözləri “Kəpəz”in baş məşqçisi Tərlan Əhmədov Misli Premyer Liqasının 33-cü turunda “Sabah”a qarşı keçirilən matç (0:3) barədə danışarkən deyib.

Mütəxəssis bildirib ki, komandası ikinci hissədə yaratdığı qol epizodlarını dəyərləndirə bilsəydi, matçın sonluğu fərqli olardı: “İkinci hissədə yaratdığımız qol epizodlarını dəyərləndirə bilsəydik, fərqli oyun görə bilərdik. Hətta sonradan mənə deyildi ki, bir epizodda top qapı xəttini keçmişdi. Hər halda fərqi azaltsaydıq, matçın sonluğu daha gərgin alınardı. “Şamaxı” ilə görüşdə hiss eləmişdim ki, komanda yorğunluq fonunda oynayır və geri gedir. Amma bu gün futbolçular sağ olsunlar ki, bu vəziyyətdə məğlub olmağımıza baxmayaraq, baxımlı futbol oynadılar. “Sabah”dan çəkinmirdik, rahat hücumlar qururduq, topa nəzarət edirdik. Rəqibin gücünü də nəzərə almaq lazımdır, hələ çempionluğa şansları var. Məni məyus edən Gəncədən bizi dəstəkləməyə gələn fanatların məyus olmasıdır. Qarşıdakı 3 oyunda bizə heç olmasa 3 xal lazımdır ki, yerimizi təmin edək”.

“Kəpəz”in baş məşqçisi ev oyunlarını Qəbələdə keçirməyin komandanın çıxışına təsir etdiyini vurğulayıb: “Meydan amilinin komandaya təsiri həddindən artıq böyükdür. Təsəvvür edin ki, Gəncədən “Turan Tovuz”la oyun üçün Qəbələyə gəldik. Sonra yenidən Gəncəyə yollandıq, ordan isə Şamaxı səfərinə getdik. Daha sonra Şamaxıdan yenidən Gəncəyə gəldik, indi isə “Sabah”la matç üçün yenidən Qəbələyə gəlmişik. Bütün bunlar isə yorğunluğa gətirib çıxarır”.

T.Əhmədov yol yorğunluğunun özünü komandasının oyununda büruzə verdiyini vurğulayıb: “Ötən tur “Şamaxı” ilə görüşdə hiss edirdim ki, komanda yol yorğunudur. Bu haqda məlumat vermişdim ki, hazırkı durum bizə böyük çətinlik yaradacaq. Yenə daha əvvəl dediyim fikirləri təkrarlamaq istəmirəm, amma bilirsiz ki, şəraitimiz ideal deyil. Bütün bu yorğunluğun fonunda komandanın istirahət üçün lazımi şəraiti yoxdur. Gəncədə oynayanda heç olmasa bilirdik ki, avtobusla gedib-gəlmirik. İndi bu gün yenə Gəncəyə qayıdacağıq. Gələn tur paytaxtda oynayırıq. 5 saat avtobusla məsafə qət edəcəyik. Daha sonra yenidən Gəncəyə geri dönüb, ardınca da “Neftçi” ilə matç üçün Qəbələyə gələcəyik. Onsuz da biz idmançıların həyatı təkər üstündədir, təyyarə, avtobus, maşın... Bir sözlə, Gəncədə oynamamağımız komandaya mənfi təsir edir. Azarkeşlərin dəstəyini hiss etmirik, Gəncədəki atmosfer yoxdur. Təsəvvür edin ki, özüm bu qədər yorulmuşamsa, futbolçular məndən 10 dəfə artıq yorulublar. Yol yorğunluğu artıq komandanın oyununda özünü büruzə verir. Təəssüf ki, bunu aradan qaldırmaq üçün nəsə edə bilmirik".

Daha çox