"Qəbələ" öz imkanlarından daha yaxşı işlər görür" - Asif Məmmədov

"Hər iki oyunda üstün tərəf biz idik. Yaxşı oynadıq, finala çıxdıq. Bu, çox xoşdur".

Bu sözləri Qol.az saytına açıqlamasında "Qəbələ"nin kapitanı Asif Məmmədov deyib.

35 yaşlı yarımmüdafiəçi əvvəlcə Azərbaycan kubokunun yarımfinalında "Səbail"ə qalib gələrək (evdə 3:2, səfərdə 1:0) finala adlamaları barədə danışıb: "Sevinirəm ki, komandamız finaldadır. İnşallah, layiqli mübarizə aparıb qalib gələrik".

Məmmədov komandasının ümumi oyun keyfiyyəti haqda da fikirlərini bildirib. O, bunları deyib: "Biz əvvəlki oyunlarda da pis mübarizə aparmırdıq. Qol vurduğumuz oyunda uda bilmirdik. Amma son matçlarda qol buraxsaq da, sonradan qalib gəldik. 2 top geridə olduğumuz oyunları uduruq. Məncə, bu, xoş bir siqnaldır. Öz aramızda da müzakirə edirdik ki, niyə belə olur, bəlkə, çox arxayınlaşırıq. Çempionatın sonuna yaxınlaşırıq. Mövsümün əvvəlində o səhvləri edirdik. Bəlkə də fikirləşirdik ki, hələ qarşıda oyunlar var. Amma indi məsuliyyətimiz birə-beş artıb".

Futbolçu qeyd edib ki, ölkə kubokunda final oynamazdan əvvəl Premyer Liqada 4-cü yeri tutmaq istəyirlər: "Azərbayan kubokunun finalından əvvəl 4-cü yeri tutub sonra final oynasaq, məncə komandamız daha rahat olacaq. Çünki 4-cü yeri tutsaq, "Neftçi" də finaldadır deyə avrokuboklara vəsiqəni rəsmiləşdirəcəyik. Bundan sonra kuboku qazansaq da, olar, qazanmasaq da. Çünki mövsümün əvvəlindən qarşımıza qoyulan məqsəd avrokuboklara vəsiqə əldə etməkdir. Amma ölkə kubokunu da qazanmaq istəyirik. Buna çox yaxınıq. Titul məsələsi var də. Biri var deyək ki, "Qəbələ" Azərbaycan kubokunun qalibidir, biri də var avrokubokların iştirakçısıdır".

A.Məmmədov finaldakı rəqibləri "Neftçi" haqqında da danışıb: "Məncə, "Neftçi" haqqında çox danışmağın mənası yoxdur. "Neftçi"Azərbaycandakı 2-3 ən yaxşı klubdan biridir. Ona görə də bizi çətin oyun gözləyir. "Neftçi"yə rəqib olmağımızın xüsusi marağı var. Həm də daha da məsuliyyətli olarıq ki, "Neftçi"yə qarşı oynayırıq. Fikrimcə, bu mövsüm nisbətən aşağı pillələrdəki komandalara qarşı bir az zəif, liderlərə qarşı isə dah yaxşı oynayırıq. Bu mənada rəqibimizin "Neftçi olması pis deyil. Kubokun finalı çempionat matçı kimi deyil. Finalda hər şey ola bilər. Buna görə də bizi çətin və maraqlı bir oyun gözləyir".

Məmmədov "Qəbələ"nin Azərbaycan futbolu üçün əhəmiyyətli bir klub olduğunu xüsusi vurğulayıb: "Qəbələ"nin yaşaması, üzdə qalması üçün avrokuboklara vəsiqə qazanmaq vacibdir. "Qəbələ" kimi akademiyası olan bir klubun avrokuboklarda mübarizə aparması məncə, hər şeydən vacibdir. Sabah "Qəbələ"nin Premyer Liqada olmaması, zəifləməsi akademiyaya, hər bir şeyə öz təsirini göstərəcək. Azərbaycanda futbolun daha da inkişaf etməsini, uşaq futbolunun yaxşılaşmasını istəyiriksə, "Qəbələ" kimi bir klub yaşamalıdır. Özü də yüksək səviyyədə yaşamalıdır. Çünki "Qəbələ"nin akademiyasına futbolçu cəlb olunmalıdır. "Qəbələ"nin əsas komandası ideal komandadır. Orada oynamaq bu uşaqlar üçün arzudur. Onlar özlərini o yerə gətirib çıxarmaq üçün çox əziyyətlər çəkməlidirlər. "Qəbələ" futbol klubunun bu gün Avropa ilə müqayisə oluna biləcək bir bazası var. Komandanın oynaması, klubun yaşaması, sponsorların cəlb olunması çox vacibdir. "Qəbələ" olmasa, Azərbaycan futbolunda nələr baş verər, bunu fikirləşəndə "havalanıram". Çünki bu cür bazası olan, gözəl bir məkanda yerləşən komandaya dəstək olmaq lazımdır".

Məmmədov bunu da qeyd edib ki, daha yaxşı işlər görmək üçün kluba geniş büdcə, sponsor lazımdır: "Hamı bilir ki, bizim indiki büdcəmiz ilə böyük işlər görmək olmaz. Biz həmin büdcə ilə bacardığımızdan da çox iş görürük. Çünki burada bilinməyən o qədər şeylər var ki. Uşaq futbolu, məskunlaşma, avtobus və başqa şeylər. Bunların hamısı çox çətindir. Belə büdcə ilə ancaq bunu etmək olar. Əgər yaxşı addımlar atmaq istəyiriksə, büdcə də artmalıdır. Əsas komanda da yaxşı vəziyyətə gəlməlidir. Çünki uşaq görməlidir ki, klubu əsas komandası idealdır. Əsas komanda axırıncı yerdə gedirsə, mən uşaq futbolunu neynirəm? Axı, həmin uşaqlar həvəsdən düşəcəklər. Deyəcəklər ki, əşi mənim komandam 10-cu yerdədir, o komandanın heyətinə cəlb olunmaqdansa, futbolla vidalaşsam yaxşıdır. Hər şey kompleks halda olmalıdır. Əsas komanda da yaxşı vəziyyətdə olmalıdır, akademiya da. Uşaq görməlidir ki, bu komandanın heyətinə düşmək üçün çox zəhmət çəkməlidir. Amma əsas komanda zəif oynasa, uşaq deyəcək ki, həftədə 1 dəfə məşq etsəm də, gedib o 10-cu yerdə olan komandada oynaya bilərəm".

Futbolçu sonda əlavə edib ki, klub hazırkı büdcəsinin məhdud olmasına baxmayaraq, öz öhdəliklərini artıqlaması ilə yerinə yetirir: "İndiki büdcəmizi nəzərə alsaq, komandanın durumu superdir. Bizə əvvəldən deyilən maaş, büdcə, mükafatların hamısı vəd edildiyindən də yaxşıdır. Məvacibimizi nəinki vaxtında, vaxtından da əvvəl alırıq. Yəni, bu cəhətdən problem yoxdur. Sadəcə yaxşı futbolçular cəlb etmək, inkişaf etmək üçün bu büdcə bəs etmir. Amma çempionatın əvvəlində klub rəhbərliyi söhbət edəndə nə vəd etmişdisə, həmin öhdəlikləri artıqlaması ilə yerinə yetirir".