Bu onu tərifləsin, o da bunu, belə inkişaf olmur...

ÖLKƏ FUTBOLU 11 Aprel 2023 / 13:34 2781

- A +

Dəvət alsam da, üzürlü səbəbdən dünən İctimai Televiziyanın "Sabaha saxlamayaq" verilişində futbolla bağlı müzakirədə iştirak edə bilmədim. İndiyə kimi İTV-də müxtəlif verilişlərdə futbolla bağlı problemlərə çox toxunulub. Şəxsən qonaq olduğum "Sabaha saxlamayaq", xüsusən "Bol idman" verilişlərində AFFA, klublar, ümumən futbol, eləcə də digər idman növlərindəki nöqsanlar, problemlər barədə dəfələrdə danışmış, fikirlərimi canlı yayımda bəzən sərt formada ifadə etmişəm.

İnanıram ki, digər kanal rəhbərlərinə olduğu kimi, İTV-nin rəhbərliyinə də AFFA tərəfdən onlara xoş olmayan bu tənqidlərlə bağlı hansısa təsirlər olub. Və söhbət heç də AFFA rəhbərliyinin kreslosunun laxladığı bugünlərdən yox, daha əvvəldən - onların SOCAR-dakı mövqelərinin güclü olduğu 4-5 il öncədən gedir. Amma nə kanalın rəhbərliyi, nə də verilişlərin məsul şəxsləri, aparıcıları tərəfindən bir dəfə də olsun, bununla bağlı hər hansı eyham belə vurulmayıb, "bunu danışmağının bizə ziyanı olar kimi" sözlər deyilməyib. Deyilsə idi belə hər hansı bir inciklik etmədən anlayışla qarşılayardım. Amma deyilməyib. Əksinə bilə-bilə ki, futboldakı problemləri qabartmağa davam edəcəm, canlı yayıma dəvətləri davam etdiriblər.
Sağ olsunlar. Belə mərdliklər unudulmur.

O ki qaldı dünənki futbol müzakirəsinə, faydalı oldu. Gələcəkdə bütün futbol ictimaiyyətinin də görməsi üçün belə müzakirələr davamlı şəkildə başqa kanallarda da təşkil edilməlidir. Xüsusən sırf idman yönümlü "İdman TV" və "CBC Sport"da. Ona görə ki bu tip diskussiyalarda fərqli fikirlər yaranır: tənqid, təklif... Yoxsa, 3-4 nəfər yığılsın, bu onu tərifləsin, o da bunu, belə olmur, bununla futboldakı problemlər düzəlməz. Məhz haqlı, sağlam tənqid və təklifə açıq olmaq, mütəxəssislərin, idman mediasının bir qisminin iştirakı sayəsində futbolumuzdakı problemlər zamanla düzələ bilər. Yəni, belə müzakirələrdən qorxmaq lazım deyil.

AFFA-nın rəhbərliyi əvvəllər həmişə bu tip müzakirələrdən qaçıb. Elə dünənki müzakirədə də futbolun bu günə düşməsinin əsl səbəbkarları, qərarvericiləri yox idi. Bilirlər ki, çıxsalar, özlərini müdafiə edə, kontur arqument gətirə bilməzdilər. Elxan Məmmədovun mesajını, İlkinin də ona tutarlı cavabını gördünüz yəqin :))

AFFA-nın yeni baş katibi Sərxan Hacıyevə gəlincə, bir-iki dəfə onunla söhbətimiz olub, fikirlərə açıq biri təsiri bağışlayır, problemləri çözmək üçün iş görmək istədiyi sezilir. Uşaq futbolunun inkişafı üçün xarici şirkətlə əməkdaşlıq ideyasını bəyəndim. Hələlik müsbət məqam olaraq bunları qeyd edə bilərəm. Amma əsas odur ki, o, sonra "zərərvericilərin" təsiri, yaxud təzyiqi altına düşüb indiki doğru yoldan çəkinməsin. Qətiyyətli olsun...

Aydın Bağırov
(Feysbuk paylaşımı)

Daha çox