"Hesabda 3:1, yaxud 4:1 öndə ola bilərdik" - Rəşad Sadıqov

“Çox hərəkətli oyun oldu. Baxımlı qarşılaşmaya şahidlik etdik. Oyunda çoxlu qol epizodları var idi”.

Qol.az xəbər verir ki, bu sözləri “Zirə”nin baş məşqçisi Rəşad Sadıqov Misli Premyer Liqasının 28-ci turunda “Neftçi”yə qarşı keçirilən matçdan sonra deyib. 

Mütəxəssis 1:1 hesablı heç-heçəni komandası üçün pis nəticə hesab etmədiyini bildirib: “Hər iki komanda standart vəziyyətdən sonra fərqləndi. Halbuki oyunun gedişatına daha gözəl qollar yaraşırdı. Bu gün qələbə qazanmaq istəyirdik. Bu mövsüm “Neftçi” ilə matçlarda nəticə qazana bilməsəkdə də, oyun planında rəqibdən geri qalmırdıq. Turnir cədvəlində dördüncü pillə uğrunda mübarizədə xal fərqi azalıb. Bütün bunları nəzərə alaraq meydana 3 xal üçün çıxmışdıq. Oyunun gedişatı elə alındı ki, 1 xal da bizim üçün pis nəticə deyil”.

R.Sadıqov turnir cədvəlinin ilk üçlüyündə qərarlaşan komandalar üzərində qələbə qazana bilməmələrinə belə münasibət bildirib:  “Bu barədə özüm də düşünürəm. Ümumi götürdükdə bu komandalara qarşı oyunlarımız pis alınmır. Oyun planında böyük fərq olduğunu düşünmürəm. Məsələn, “Sabah”la son matçda uduzsaq da, oyunu pis keçirmədik. Oyunun təhlili zamanı da gördük ki, heç nədən, olmayan epizoddan 2 qol vurdular. “Qarabağ”la son ev oyununda sonda avtoqolla uduzduq. Səfərdə uduzduğumuz matçda yetərincə qol epizodumuz olmuşdu. Bir sözlə, oyun planında rəqiblərdən geri qalmasaq da, nəticə qazanmaqda çətinlik çəkirik. Bu tip oyunlarda sanki son fazada problem yaşayırıq. Bugünkü matça baxsaq, 70-ci dəqiqəyə kimi bəlkə də 3:1, yaxud 4:1 öndə ola bilərdik. Gəl ki, əlimizdə düşən fürsətlərdən yararlana bilmirdik. Brkiçin də ustalığını qeyd etməliyəm. Bizimlə matçlarda bu qapıçı çox inamlı təsir bağışlayır”. 

Sadıqov milli üzvlərinin fiziki durumunun qaydasında olmadığını bildirən yığma komandamızın məşqçisi Arif Əsədovun fikrini də şərh edib:  “Mən futbolçularımın fiziki durumundan razıyam. Uzağa getmək lazım deyil, biz bunu “Qəbələ”, “Sabah”, “Neftçi” ilə oyunlarda görmüşük. Fiziki durumla bağlı sıxıntımız yoxdur. Eləcə də milli komandamızın fiziki baxımdan hər hansı sıxıntısı görsənmir. Məğlubiyyətlərimizin də fiziki durumla bağlı olduğunu düşünmürəm. Bizim 60-70 dəqiqə mübarizə aparmağımız 96, 97-ci illərdə qaldı. “Qarabağ” 90 dəqiqə bütün Avropanı fiziki cəhətdən üstələyir. Ona görə də, məncə, bu söhbət artıq qurtarıb. Millinin buraxdığı qolların fiziki duruma nə aidiyyatı var? Bəli, rəqiblər həmişə fiziki durum baxımından bizi üstələyiblər. Bu, aydın məsələdir. Lakin ilk hissələrdə komandamız rəqibi açıq-aşkar üstələyirdi. Dinamikada da, sürətdə də. Ona görə də ikinci hissədə fiziki dözümlülüklə bağlı çətinlik yaşadığımızı düşünmürəm. İkinci hissədə bu tip rəqiblər həmişə təzyiqi artırır. Qələbə seriyası olanda heç kim demirdi ki, maşallah, klublardan futbolçular hazırlıqlı gəlirlər”.

Mütəxəssis milli komandamızın probleminin nədən ibarət olması barədə sualı belə cavablandırıb: “Geniş şərh vermək istəmirəm. Məqamı gələndə bu mövzu ətrafında xeyli danışmışıq. Milli uduzanda mən çox danışmamışam. Amma indiki milli müasir futbol oynamaq üçün ən optimal heyətə malikdir. Bəli, itkilərimiz var idi. Qapı xəttində, müdafiədə. Əslində, qapıçılarımız da pis deyil. Səlahət Ağayev olsun, yaxud Emil Balayev. Sadəcə millidəki gənclərin  beynəlxalq arenada təcrübələri kifayət qədər deyil. Klubları avrokuboklarda mübarizə aparsa, yaxud mütəmadi milliyə çıxış etsələr, bu baxımdan problem yaşamazlar. Problem praktikadadır. Oyunların gərginliyi, stressi, rəqibin heyətindəki adlar təsir edir”.